ભાજપ ગુજરાત પ્રદેશ અધ્યક્ષ જગદીશ વિશ્વકર્માએ ગઇકાલે સાંજે ગાંધીનગર ખાતે નિકોલ વિધાનસભા વિસ્તારના સંગઠનના પદાધિકારીઓ તેમજ તાજેતરમાં ચૂંટાયેલા નગરસેવકો સાથે મહત્વપૂર્ણ બેઠક યોજી હતી. બેઠક દરમિયાન સંગઠન મજબૂત બનાવવું, જનસેવા અને સુશાસનના મુદ્દાઓ પર વિસ્તૃત ચર્ચા કરવામાં આવી હતી.
આ અવસરે પ્રદેશ અધ્યક્ષ જગદીશ વિશ્વકર્માએ નવા ચૂંટાયેલા કાઉન્સિલરોને શુભકામનાઓ પાઠવી હતી અને જનતા વચ્ચે સતત સક્રિય રહી લોકોના પ્રશ્નોના નિરાકરણ માટે કાર્ય કરવાની અપીલ કરી હતી. તેમણે ભારપૂર્વક જણાવ્યું હતું કે ભારતીય જનતા પાર્ટીનું મૂળ તત્વ સેવા, સંકલ્પ અને સુશાસન છે અને દરેક જનપ્રતિનિધિએ આ મૂલ્યોને પોતાના કાર્યકાળ દરમિયાન જીવન્ત રાખવા જોઈએ.
સંગઠન અને જનસંપર્ક પર ભાર
બેઠક દરમિયાન સ્થાનિક સ્તરે સંગઠનને વધુ મજબૂત બનાવવાના મુદ્દાઓ પર પણ ચર્ચા થઈ હતી. પ્રદેશ અધ્યક્ષે કાર્યકરો અને ચૂંટાયેલા પ્રતિનિધિઓને લોકો સાથે સતત સંપર્કમાં રહેવા, વિસ્તારના પ્રશ્નો અંગે સંવેદનશીલતા દાખવવા અને સરકારની યોજનાઓનો લાભ અંતિમ વ્યક્તિ સુધી પહોંચાડવા અનુરોધ કર્યો હતો.
તેમણે જણાવ્યું કે નગરસેવકો માત્ર ચૂંટાયેલા પ્રતિનિધિ નથી, પરંતુ લોકો અને પ્રશાસન વચ્ચેનો મહત્વપૂર્ણ સેતુ છે. તેથી જનતાના પ્રશ્નો, પાણી-ગટર, રસ્તા, સફાઈ, આરોગ્ય અને શહેરી સુવિધાઓ જેવા મુદ્દાઓને પ્રાથમિકતા આપવી જરૂરી છે.
નવા કાઉન્સિલરોને માર્ગદર્શન
તાજેતરમાં ચૂંટાયેલા નગરસેવકો માટે આ બેઠક માર્ગદર્શન અને સંગઠનાત્મક સંકલનના દૃષ્ટિકોણથી મહત્વપૂર્ણ માનવામાં આવી રહી છે. બેઠકમાં સ્થાનિક સંગઠનના પદાધિકારીઓએ પણ પોતાના વિસ્તારના પ્રશ્નો અને આગામી આયોજન અંગે રજૂઆત કરી હતી.
ભાજપ સંગઠન દ્વારા આગામી સમયમાં વિવિધ વિસ્તારોમાં જનસંપર્ક અભિયાન, સેવા કાર્યક્રમો અને સંગઠન મજબૂતી માટે વિશેષ કાર્યક્રમો યોજવાની પણ ચર્ચા થઈ હોવાનું સૂત્રો દ્વારા જાણવા મળ્યું છે.
આ પણ વાંચો: અમદાવાદના VIP વિસ્તારમાં ભીષણ આગ! : ફાયરબ્રિગેડની 6 ગાડીઓ ઘટનાસ્થળે
સ્થાનિક રાજકારણમાં સક્રિયતા વધારવાનો પ્રયાસ
અમદાવાદ શહેર અને ખાસ કરીને નિકોલ વિધાનસભા વિસ્તારમાં ભાજપ સંગઠન છેલ્લા કેટલાક સમયથી સ્થાનિક સ્તરે વધુ સક્રિય બનવા પ્રયત્ન કરી રહ્યું છે. તાજેતરમાં ચૂંટાયેલા નગરસેવકો સાથે પ્રદેશ અધ્યક્ષની સીધી બેઠકને સંગઠનાત્મક સંદેશ અને રાજકીય સમન્વય તરીકે પણ જોવામાં આવી રહી છે.
પાર્ટી નેતૃત્વ દ્વારા સ્થાનિક સ્તરે વિકાસના મુદ્દાઓને કેન્દ્રમાં રાખીને કાર્ય કરવાની સૂચનાઓ આપવામાં આવી રહી છે જેથી શહેરી વિસ્તારોમાં જનવિશ્વાસ વધુ મજબૂત બની શકે.
