Iran US tensions: યુએસ પ્રમુખ ડોનાલ્ડ ટ્રમ્પએ ઈરાનને હોર્મુઝ સ્ટ્રેટ ખોલવા અથવા સમાધાન કરવા માટે 48 કલાકનું અલ્ટીમેટમ આપ્યું છે. તેમણે ટ્રુથ સોશિયલ પર પોસ્ટ કરીને ચેતવણી આપી હતી કે, “સમય પૂરો થઈ રહ્યો છે. માત્ર 48 કલાક બાકી છે. તેમના પર વિનાશ આવે તે પહેલાં... all Hell will reign down on them.”
મેજર જનરલ અલી અબ્દુલ્લાહી અલિયાબાદી
ઈરાને આ ધમકીને તરત જ નકારી કાઢી છે. ખાતમ અલ-અંબિયા સેન્ટ્રલ હેડક્વાર્ટર્સના કમાન્ડર મેજર જનરલ અલી અબ્દુલ્લાહી અલિયાબાદીએ ટ્રમ્પના પગલાને “લાચાર, ગભરાયેલું, અસંતુલિત અને મૂર્ખામીભર્યું કૃત્ય” ગણાવ્યું છે. તેમણે કહ્યું, “આ સંદેશનો સાદો અર્થ એ છે કે તમારા (અમેરિકા) માટે નરકના દરવાજા ખુલશે.”
બુશેહર પરમાણુ પ્લાન્ટ પર હુમલા પછી ઈરાનની કડક ચેતવણી
શનિવારે ઇઝરાયલ અને અમેરિકાએ ઈરાનના બુશેહર પરમાણુ સુવિધા પર ચોથો હુમલો કર્યો હતો. આ પછી ઈરાને પહેલી વાર પરમાણુ હુમલાની આડકતરી ધમકી આપી છે. ઈરાનના વિદેશ મંત્રી અબ્બાસ અરાઘચીએ X (ટ્વિટર) પર પોસ્ટ કરીને કહ્યું કે, “ઇઝરાયલ-અમેરિકાએ અત્યાર સુધીમાં અમારા બુશેહર પ્લાન્ટ પર ચાર વખત બોમ્બમારો કર્યો છે. જો કિરણોત્સર્ગી અસર થશે તો તે તેહરાનમાં નહીં, પરંતુ સાઉદી અરેબિયા, UAE, કુવૈત, બહેરીન, કતાર અને ઓમાન જેવા GCC દેશોની રાજધાનીઓમાં જીવનનો સંપૂર્ણ નાશ કરશે.”
આ પણ વાંચો: હોર્મુઝ સ્ટ્રેટ પર યુદ્ધ જેવી પરિસ્થિતિ : અમેરિકાનું શું છે અલ્ટિમેટમ?
અન્ય મહત્વના મુદ્દા
અમેરિકાએ કાસેમ સુલેમાનીની નિકટના સંબંધીઓ (તેમની ભત્રીજી અને તેમની પુત્રી)ના ગ્રીન કાર્ડ રદ કરી દીધા છે. તેમને અટકાયતમાં લઈને દેશનિકાલની પ્રક્રિયા શરૂ કરવામાં આવી છે.
તાજેતરમાં ઈરાને ઇઝરાયલ અને કુવૈત તરફ મિસાઈલ-ડ્રોન હુમલા કર્યા હોવાના અહેવાલો છે, જેમાં કુવૈતમાં તેલ સંકુલમાં આગ લાગી હતી.
આ ઘટનાઓથી મધ્ય પૂર્વમાં તણાવ વધુ વધ્યો છે. હોર્મુઝ સ્ટ્રેટ વિશ્વના તેલ પરિવહન માટે અત્યંત મહત્વપૂર્ણ છે અને તેના બંધ થવાથી વૈશ્વિક ઊર્જા બજાર પર અસર પડી શકે છે. સ્થિતિ અત્યંત ગંભીર છે અને આગામી 48 કલાકમાં વધુ વિકાસની શક્યતા છે.
