IPL In Two Phases : વિશ્વભરના ક્રિકેટ પ્રેમીઓ માટે આગામી સમયમાં ખૂબ જ રોમાંચક અને મોટા સમાચાર આવી શકે તેમ છે. દુનિયાની સૌથી લોકપ્રિય અને અમીર ક્રિકેટ લીગ એટલે કે ઈન્ડિયન પ્રીમિયર લીગ (IPL) ના ફોર્મેટમાં ભારતીય ક્રિકેટ કંટ્રોલ બોર્ડ (BCCI) એક ઐતિહાસિક ફેરફાર કરવાની તૈયારી કરી રહ્યું છે. અત્યાર સુધી આપણે આખી ટૂર્નામેન્ટ એક જ ધાર્યા શેડ્યૂલમાં પૂરી થતી જોતાં આવ્યા છીએ, પરંતુ હવે તેને વર્ષમાં એકસાથે રમાડવાને બદલે બે અલગ અલગ તબક્કામાં (Two Phases) યોજવા પર ગંભીર વિચારણા ચાલી રહી છે. BCCI ના આ ગુપ્ત માસ્ટરપ્લાન પાછળ માત્ર ક્રિકેટનો રોમાંચ વધારવાનો જ નહીં, પરંતુ લીગની વૈશ્વિક બ્રાન્ડ વેલ્યુને એક અલગ જ સ્તરે લઈ જવાનો મોટો હેતુ છુપાયેલો છે.
મેચોમાં મોટો વધારો
હાલના ફોર્મેટની વાત કરીએ તો IPL ની એક સિઝનમાં 10 ટીમો વચ્ચે કુલ 74 મેચો રમાડવામાં આવે છે, જે લગભગ બે મહિના સુધી ચાલે છે. પરંતુ ક્રિકેટ ફેન્સની ભારે ડિમાન્ડ અને લીગની લોકપ્રિયતાને જોતા ભવિષ્યમાં આ મેચોની સંખ્યા વધારીને 94 કરવાની યોજના બનાવવામાં આવી રહી છે. જો મેચોની સંખ્યા વધશે, તો સ્વાભાવિક છે કે ટૂર્નામેન્ટનો સમયગાળો પણ ઘણો લાંબો થઈ જશે. સામાન્ય રીતે માર્ચના અંતથી મે મહિના દરમિયાન ભારતના મોટાભાગના રાજ્યોમાં તીવ્ર ગરમી અને લૂ પડતી હોય છે. આવી કાળઝાળ ગરમીમાં સતત અઢી કે ત્રણ મહિના સુધી બેક-ટુ-બેક મેચોનું આયોજન કરવું એ ખેલાડીઓની ફિટનેસ અને સ્વાસ્થ્ય માટે મોટો પડકાર બની શકે છે. આ જ ગંભીર સમસ્યાથી બચવા માટે હવે આખું શેડ્યૂલ બદલવાની જરૂરિયાત ઊભી થઈ છે.
બે ભાગમાં ટૂર્નામેન્ટ
આ ગંભીર મુદ્દા પરથી પડદો હટાવતા IPL ના ચેરમેન અરુણ કુમાર ધુમલે એક ઇન્ટરવ્યુમાં જણાવ્યું છે કે, જો આંતરરાષ્ટ્રીય ક્રિકેટ કાઉન્સિલ (ICC) ના ફ્યુચર ટૂર્સ પ્રોગ્રામ (FTP) અને ટીવી-ડિજિટલ બ્રોડકાસ્ટર્સ સાથેની વાતચીત સકારાત્મક રહેશે, તો એક જ સિઝનને બે ભાગમાં વહેંચી દેવાશે. આ નવા રોડમેપ મુજબ, IPL નો પહેલો તબક્કો દર વર્ષે ફેબ્રુઆરીના અંતથી શરૂ થઈને એપ્રિલ મહિના સુધી ચાલશે, જેમાં અડધી મેચો રમાશે. ત્યારબાદ ટૂર્નામેન્ટ પર થોડો સમય બ્રેક લગાવી દેવાશે અને બાકી બચેલી મેચોનો બીજો તબક્કો સપ્ટેમ્બર અને ઓક્ટોબર મહિનાની વચ્ચેના સમયગાળામાં રમાડવામાં આવશે. આનાથી ખેલાડીઓને લાંબી ટૂર્નામેન્ટ થવા છતાં વચ્ચે આરામ કરવાનો પૂરતો સમય મળી રહેશે.
‘આ શું બકવાસ સવાલ છે?’: ગુજરાતની હાર બાદ રિપોર્ટર પર ભડક્યો ગ્લેન ફિલિપ્સ
તહેવારોની સિઝનનો ફાયદો
BCCI દ્વારા સપ્ટેમ્બર અને ઓક્ટોબર મહિનાની વિન્ડો પર ખાસ પસંદગી ઉતારવા પાછળ એક મોટું ગણિત કામ કરી રહ્યું છે. આ સમય દરમિયાન ભારતમાં ચોમાસું વિદાય લઈ ચૂક્યું હોય છે અને ગુલાબી શિયાળાની શરૂઆત થતી હોવાથી હવામાન ક્રિકેટ રમવા માટે એકદમ અનુકૂળ અને સુખદ બની જાય છે. આ સિવાય સૌથી મહત્વની વાત એ છે કે, ઓક્ટોબર અને નવેમ્બરની આસપાસ ભારતમાં દિવાળી અને નવરાત્રી જેવા મોટા તહેવારોની સિઝન હોય છે. આ ફેસ્ટિવલ સિઝનમાં દેશભરનું માર્કેટ તેજીમાં હોય છે અને મોટી વિદેશી તેમજ દેશી કંપનીઓ જાહેરાતો (Advertisements) પાછળ કરોડો રૂપિયાનું આંધણ કરતી હોય છે. જો આ સમયે IPL નો બીજો તબક્કો રમાય, તો બ્રોડકાસ્ટર્સ અને BCCI બંનેને સ્પોન્સરશિપ અને કમાણીની દ્રષ્ટિએ અભૂતપૂર્વ ફાયદો થઈ શકે તેમ છે.
ગેલનો રેકોર્ડ તોડી વૈભવ RR ને આગળ લઈ જશે?: અભિષેક અને આર્ચર વચ્ચે જામશે જબરદસ્ત ટક્કર
ક્યારે અમલમાં આવશે નિયમ
જોકે, ક્રિકેટ ફેન્સે આ નવા ફોર્મેટને જોવા માટે હજુ થોડી રાહ જોવી પડશે, કારણ કે આ યોજના અત્યારે પ્રારંભિક ચર્ચાના તબક્કામાં છે. આટલા મોટા ફેરફારને તાત્કાલિક લાગુ કરવો શક્ય નથી, કારણ કે તેના માટે દુનિયાભરના અન્ય દેશોના ક્રિકેટ બોર્ડ સાથે ચર્ચા કરીને આંતરરાષ્ટ્રીય ક્રિકેટ કેલેન્ડરમાં સ્પેશિયલ વિન્ડો ખાલી કરાવવી પડશે. મીડિયા રિપોર્ટ્સ અને આયોજન મુજબ, જો બધી જ પરિસ્થિતિઓ સાનુકૂળ રહેશે, તો વર્ષ 2027 પછીના મીડિયા રાઇટ્સના નવા ચક્રમાં આ ફેરફાર સત્તાવાર રીતે જોવા મળી શકે છે. સરળ શબ્દોમાં કહીએ તો, વર્ષ 2028 અથવા 2029 થી ક્રિકેટ રસિકોને વર્ષમાં એક નહીં પણ બે અલગ અલગ મહિનાઓમાં IPL નો અસલી રોમાંચ માણવા મળી શકે છે.
