યાત્રીગણ કૃપયા ધ્યાન દે! : રેલવેએ અનેક ટ્રેનોના રૂટમાં કર્યો ફેરફાર, ટ્રાવેલિંગ કરતા પહેલા મુસાફરો જાણી લેજો

Indian Railway News: જો તમે આગામી દિવસોમાં ટ્રેન દ્વારા મુસાફરી કરવાનું વિચારી રહ્યા છો, તો આ સમાચાર તમારા માટે ખૂબ જ મહત્વના છે. સામાન્ય રીતે જ્યારે આપણે પ્રવાસ પર નીકળીએ છીએ ત્યારે સામાન અને ટિકિટનું તો ધ્યાન રાખીએ છીએ, પરંતુ ઘણીવાર ટ્રેનના સમય કે રૂટમાં થયેલા ફેરફાર જોવાનું ચૂકી જઈએ છીએ. ભારતીય રેલવેએ હાલમાં પ્રયાગરાજ સ્ટેશન પર ચાલી રહેલા મેન્ટેનન્સ કાર્યને કારણે ઘણી મહત્વની ટ્રેનોના રૂટ બદલ્યા છે. આ ફેરફારને કારણે મુસાફરોને સ્ટેશન પર હાલાકી ન ભોગવવી પડે તે માટે રેલવે દ્વારા અગાઉથી યાદી જાહેર કરવામાં આવી છે.

શા માટે લેવાયો રૂટ ફેરફારનો નિર્ણય?

રેલવે પ્રશાસન દ્વારા આપવામાં આવેલી માહિતી મુજબ, ઉત્તર પ્રદેશના પ્રયાગરાજ સ્ટેશન પર 'યાર્ડ રિમોડેલિંગ' (Yard Remodeling) નું કામ ખૂબ જ ઝડપથી ચાલી રહ્યું છે. સ્ટેશનની ક્ષમતા વધારવા અને ટ્રેનોના સંચાલનને વધુ આધુનિક બનાવવા માટે આ પ્રક્રિયા હાથ ધરવામાં આવી છે. આ ટેકનિકલ કામકાજ દરમિયાન સુરક્ષા અને કામગીરીમાં અડચણ ન આવે તે હેતુથી ટ્રેનોને તેમના નિર્ધારિત રૂટને બદલે વૈકલ્પિક (ડાયવર્ટ) રૂટ પરથી દોડાવવાનો નિર્ણય લેવામાં આવ્યો છે.

આ પણ વાંચો: પહલગામ હુમલાનો માસ્ટરમાઇન્ડ પાકિસ્તાનમાં બેનકાબ : નામ અને હુલીયો બદલી ‘સલીમ લંગડા’ બની છુપાતો ફરે છે સાજિદ જટ્ટ

આ ટ્રેનોના રૂટમાં થયો છે ફેરફાર

રેલવે દ્વારા જાહેર કરવામાં આવેલી યાદી મુજબ નીચે મુજબની ટ્રેનો હવે નવા રૂટ પરથી પસાર થશે:

• ટ્રેન નંબર 12324 (બાડમેર-હાવડા): આ ટ્રેન દર બુધવાર અને શનિવારે કાનપુર સેન્ટ્રલથી ઉપડે છે. હવે આ ટ્રેન તેના નિયમિત રૂટને બદલે મિર્ઝાપુર થઈને આગળ વધશે.

• ટ્રેન નંબર 12505 (કામાખ્યા-આનંદ વિહાર ટર્મિનલ): 29 એપ્રિલના રોજ આ ટ્રેન પંડિત દીન દયાલ ઉપાધ્યાય (DDU) - વારાણસી - લખનૌ - કાનપુર સેન્ટ્રલ થઈને પોતાની મુસાફરી પૂર્ણ કરશે.

• ટ્રેન નંબર 12506 (આનંદ વિહાર-કામાખ્યા): 30 એપ્રિલના રોજ આ ટ્રેન કાનપુર સેન્ટ્રલ - લખનૌ - વારાણસી - પંડિત દીન દયાલ ઉપાધ્યાય રૂટ પરથી દોડશે.

• ટ્રેન નંબર 12488 (આનંદ વિહાર-જોગબની): 30 એપ્રિલના રોજ આ ટ્રેન પણ કાનપુર સેન્ટ્રલ - લખનૌ - વારાણસી - પંડિત દીન દયાલ ઉપાધ્યાય થઈને પસાર થશે.

• ટ્રેન નંબર 11071/11072 (લોકમાન્ય તિલક - બલિયા): 29 એપ્રિલના રોજ આ ટ્રેનો જાંઘાઈ - લખનૌ - કાનપુર સેન્ટ્રલ - ભીમસેન - વિરાંગના લક્ષ્મીબાઈ ઝાંસી અને બીના થઈને દોડશે.

• ટ્રેન નંબર 12816 (આનંદ વિહાર-પુરી): 30 એપ્રિલના રોજ આ ટ્રેન મિર્ઝાપુર રૂટને બદલે સીધી કાનપુર સેન્ટ્રલ - લખનૌ - વારાણસી રૂટ પર ડાયવર્ટ કરવામાં આવી છે.

મુસાફરો માટે ખાસ સૂચના

રૂટ ડાયવર્ટ થવાને કારણે ટ્રેનોના સમયમાં થોડો ફેરફાર થઈ શકે છે અથવા મુસાફરીનો સમય વધી શકે છે. રેલવે વિભાગે મુસાફરોને વિનંતી કરી છે કે ઘરની બહાર નીકળતા પહેલા 'National Train Enquiry System' (NTES) એપ્લિકેશન અથવા રેલવે હેલ્પલાઇન નંબર 139 પર સંપર્ક કરીને પોતાની ટ્રેનનું સ્ટેટસ ચોક્કસ ચેક કરી લેવું.