Pahalgam Attack: જમ્મુ-કાશ્મીરના પહલગામમાં થયેલા લોહિયાળ આતંકી હુમલાના બરાબર એક વર્ષ બાદ, તે આખી નૃશંસ સાજિશનો મુખ્ય સૂત્રધાર સાજિદ જટ્ટ હવે દુનિયાની સામે બેનકાબ થઈ ગયો છે. એક મોટી તપાસમાં આ મોસ્ટ વોન્ટેડ આતંકીની પ્રથમ તસવીર અને પાકિસ્તાનમાં તેના છુપાવાના પાયાના પુરાવાઓ સામે આવ્યા છે. લશ્કર-એ-તૈયબા અને TRF (ધ રેઝિસ્ટન્સ ફ્રન્ટ) નો આ ખતરનાક કમાન્ડર અત્યારે પાકિસ્તાનમાં ફફડાટમાં જીવી રહ્યો છે. પાકિસ્તાની જાસૂસી એજન્સી ISI ની મદદથી તે પોતાની ઓળખ, નામ અને ચહેરો બદલીને એક ગુમનામ જિંદગી જીવી રહ્યો છે, જેથી તે 'અજ્ઞાત હુમલાખોરો'ના નિશાનથી બચી શકે.
આ તપાસમાં બહાર આવ્યું છે કે, કાશ્મીરમાં અનેક નિર્દોષ લોકોના લોહી વહેવડાવનાર આ આતંકી અત્યારે પાકિસ્તાનમાં સાજિદ જટ્ટ નહીં, પરંતુ 'સલીમ લંગડા' અને 'હબીબુલ્લા તબસ્સુમ' જેવી નકલી ઓળખ સાથે રહે છે. NIA (નેશનલ ઇન્વેસ્ટિગેશન એજન્સી) એ સાજિદ પર 10 લાખ રૂપિયાનું ઇનામ જાહેર કરેલું છે. જે આતંકી ક્યારેક કાશ્મીરની ખીણમાં આતંકનો પર્યાય હતો, તે આજે પોતાની જાન બચાવવા માટે પાકિસ્તાનના કસૂર અને રાવલપિંડીની સાંકડી ગલીઓમાં ભાડાના મકાનો બદલી રહ્યો છે. તેના નકલી આઈડી કાર્ડ્સ અને બદલાયેલા હુલીયાની વિગતો હવે ભારત પાસે પહોંચી ગઈ છે.
નકલી ઓળખપત્ર અને ઉંમરમાં છેડછાડ: પાકિસ્તાનના જૂઠાણાનો પર્દાફાશ
સાજિદ જટ્ટની અસલિયત છતી કરતા બે અલગ-અલગ ઓળખપત્રો હાથ લાગ્યા છે, જે પાકિસ્તાન આતંકીઓને કેવી રીતે આશ્રય આપે છે તેની સાબિતી છે. પ્રથમ આઈડી કાર્ડ 2015માં જારી થયું હતું, જેમાં તેનું સરનામું કસૂર જિલ્લો અને જન્મતારીખ 1976 છે. જોકે, નવા કાર્ડમાં તેણે ચાલાકી વાપરીને પોતાની ઉંમર 6 વર્ષ ઘટાડી દીધી છે અને ઇસ્લામાબાદના સુરક્ષિત ગણાતા G-6 વિસ્તારનું સરનામું લખાવ્યું છે. આ દસ્તાવેજો પરથી સ્પષ્ટ થયું છે કે, તેનું અસલી નામ હબીબુલ્લા તબસ્સુમ છે અને તેના પિતાનું નામ મોહમ્મદ રફીક છે.
‘અજ્ઞાત હુમલાખોરો’નો ખૌફ: સામાન્ય માણસ બનીને જીવી રહ્યો છે આતંકી
પાકિસ્તાનમાં હાલમાં જે રીતે ભારત વિરોધી આતંકીઓનો સફાયો થઈ રહ્યો છે, તેનાથી સાજિદ જટ્ટ એટલો ડરી ગયો છે કે તેણે પોતાનો લશ્કરી ઠાઠમાઠ છોડી દીધો છે. તે હવે રાવલપિંડીના એક સામાન્ય ઘરમાં સાવ જૂના કપડાંમાં અને કોઈ ટ્રેક ન કરી શકે તેવા સાદા કી-પેડ વાળા મોબાઈલ ફોન સાથે રહે છે. ISI તેને 'સેફ હાઉસ' પૂરું પાડી રહી છે. સાજિદને વર્ષ 2022માં તેના એક નજીકના સાથીની થયેલી હત્યા બાદ પોતાની જિંદગીનો પણ ડર સતાવી રહ્યો છે, તેથી તે અત્યંત 'લો-પ્રોફાઇલ' રહીને કાશ્મીરમાં આતંકી નેટવર્ક ચલાવવાનો પ્રયાસ કરે છે.
સલીમ લંગડા: એન્કાઉન્ટરમાં ગોળી વાગ્યા બાદ પડ્યું આ નામ
ગુપ્તચર સૂત્રોના જણાવ્યા અનુસાર, સાજિદ જટ્ટ લાંબા સમય સુધી જમ્મુ-કાશ્મીરમાં આતંક ફેલાવતો હતો. એક સુરક્ષા દળો સાથેના એન્કાઉન્ટર દરમિયાન તેના પગમાં ગોળી વાગી હતી, જેના કારણે તે લંગડાઈને ચાલે છે. આ શારીરિક મર્યાદાનો ઉપયોગ તેણે પાકિસ્તાનમાં પોતાની નવી ઓળખ 'સલીમ લંગડા' તરીકે કર્યો છે, જેથી તે એક સામાન્ય લાચાર વ્યક્તિ જેવો દેખાય અને કોઈ તેના પર શક ન કરે. તે સીધો ISI ના મોટા અધિકારીઓના સંપર્કમાં છે અને ત્યાં બેસીને જ કાશ્મીરમાં સૈન્ય પર હુમલાની યોજનાઓ ઘડે છે.
પહલગામ હુમલાની ફાઈલ હવે પૂરેપૂરી ખુલી ગઈ
પહલગામમાં જે રીતે બેરન ખીણમાં નિર્દોષ પ્રવાસીઓ પર અંધાધૂંધ ગોળીબાર કરવામાં આવ્યો હતો, તે પાછળ આ જ 'સલીમ લંગડા' ઉર્ફે સાજિદ જટ્ટનો દિમાગ હતો. NIA અને સુરક્ષા એજન્સીઓએ હવે તેના ચહેરા પરથી નકાબ હટાવી દીધો છે. તે ભલે ગમે તેટલા હુલીયા કે નામ બદલી લે, પરંતુ પહલગામના ગુનેગાર તરીકે તેની કુંડળી હવે સુરક્ષા એજન્સીઓના ટેબલ પર છે. હાલમાં તે પોતાની જાન બચાવવા ફાંફા મારી રહ્યો છે, કારણ કે તેને ખબર છે કે હવે ન્યાયની ઘડી નજીક છે.
