Iran Travel Advisory: છેલ્લા કેટલાક દિવસોથી વધતી સુરક્ષા અસ્થિરતા અને સંઘર્ષની સ્થિતિને ધ્યાનમાં રાખીને ભારત સરકારે પોતાના નાગરિકો માટે નવી ટ્રાવેલ એડવાઇઝરી જાહેર કરી છે. તેહરાન સ્થિત ભારતીય દૂતાવાસ દ્વારા જારી કરવામાં આવેલી આ સુધારેલી એડવાઇઝરીમાં ઈરાન જવાની યોજના બનાવી રહેલા ભારતીયોને હાલ પૂરતી મુસાફરી મોકૂફ રાખવાની સલાહ આપવામાં આવી છે. સાથે જ હાલમાં ઈરાનમાં રહેતા ભારતીયોને પણ પરિસ્થિતિનું સતત મૂલ્યાંકન કરીને શક્ય હોય તો ઉપલબ્ધ ફ્લાઇટ્સ મારફતે તાત્કાલિક ભારત અથવા અન્ય સુરક્ષિત સ્થળે પરત ફરવા અપીલ કરવામાં આવી છે. ભારતીય દૂતાવાસે સ્પષ્ટ કર્યું છે કે, ઈરાનમાં સુરક્ષાની સ્થિતિ હજુ પણ ચિંતાજનક છે અને આગામી દિવસોમાં પરિસ્થિતિ કેવી રીતે બદલાશે તે અંગે અનિશ્ચિતતા યથાવત છે. આવી સ્થિતિમાં ભારતીય નાગરિકોની સુરક્ષા સર્વોચ્ચ પ્રાથમિકતા હોવાથી આ નવી માર્ગદર્શિકા બહાર પાડવામાં આવી છે. દૂતાવાસે તમામ ભારતીયોને સત્તાવાર સૂચનાઓ પર જ વિશ્વાસ રાખવા અને અફવાઓથી દૂર રહેવાની પણ અપીલ કરી છે.
ઈરાન જવાની યોજના હોય તો હાલ મુસાફરી ટાળો
ભારતીય દૂતાવાસે પોતાની એડવાઇઝરીમાં જણાવ્યું છે કે જે ભારતીય નાગરિકો કોઈપણ કારણસર ઈરાન જવાની યોજના બનાવી રહ્યા હોય તેમણે હાલ પૂરતી પોતાની મુસાફરી મુલતવી રાખવી જોઈએ. સુરક્ષા સ્થિતિમાં સુધારો ન થાય ત્યાં સુધી ઈરાનની યાત્રા ટાળવી હિતાવહ રહેશે. દૂતાવાસના જણાવ્યા અનુસાર, હાલની પરિસ્થિતિને ધ્યાનમાં રાખીને માત્ર અત્યંત આવશ્યક સંજોગોમાં જ પ્રવાસ અંગે નિર્ણય લેવો જોઈએ. સામાન્ય પ્રવાસ, વ્યાવસાયિક મુલાકાત અથવા અન્ય કારણોસરની મુસાફરી પણ હાલ માટે ટાળવાની સલાહ આપવામાં આવી છે.
આ પણ વાંચો: ટ્રોફી ઉઠાવવા આગળ વધ્યા ટ્રમ્પ : આખું સ્ટેડિયમ હૂટિંગથી ગૂંજી ઉઠ્યું! સ્પેનની જીત બાદ વાયરલ થયા દૃશ્યો
ઈરાનમાં રહેલા ભારતીયોને દેશ છોડવા અપીલ
એડવાઇઝરીમાં ઈરાનમાં પહેલેથી જ હાજર ભારતીય નાગરિકો માટે પણ મહત્વપૂર્ણ સૂચનાઓ આપવામાં આવી છે. દૂતાવાસે જણાવ્યું છે કે જેમને તક મળે તેઓ ઉપલબ્ધ વ્યાવસાયિક ફ્લાઇટ્સનો ઉપયોગ કરીને તાત્કાલિક ઈરાન છોડવાનું વિચારે. ભારત સરકારે આ સલાહ સાવચેતીના ભાગરૂપે આપી છે જેથી કોઈપણ સંભવિત જોખમની સ્થિતિમાં ભારતીય નાગરિકોની સુરક્ષા સુનિશ્ચિત કરી શકાય.
ઈરાનમાં રહેવું હોય તો રાખો વિશેષ સાવચેતી
દૂતાવાસે જણાવ્યું છે કે, જે ભારતીયો હાલ ઈરાનમાં જ રહેવાનો નિર્ણય કરે તેઓએ અત્યંત સાવધાની રાખવી જરૂરી છે. સ્થાનિક સમાચાર અને સત્તાવાર માહિતી પર સતત નજર રાખવી, સુરક્ષા સંબંધિત દરેક અપડેટને અનુસરવું અને પરિસ્થિતિ અંગે સંપૂર્ણ માહિતી મેળવવી જરૂરી છે. ખાસ કરીને ઈરાનના દક્ષિણ કિનારાના એવા વિસ્તારો જ્યાં સૈન્ય ગતિવિધિઓ વધુ હોય તેવા સ્થળોથી દૂર રહેવાની સલાહ આપવામાં આવી છે. ઉપરાંત સ્થાનિક વહીવટી તંત્ર દ્વારા આપવામાં આવતી દરેક સૂચનાનું કડક પાલન કરવાની પણ અપીલ કરવામાં આવી છે.
ભારતીય દૂતાવાસમાં નોંધણી કરાવવાની સૂચના
ભારતીય દૂતાવાસે વધુ એક મહત્વપૂર્ણ સૂચના આપી છે. ઈરાનમાં રહેતા અને હજુ સુધી દૂતાવાસમાં પોતાની વિગતો નોંધાવ્યા ન હોય તેવા તમામ ભારતીયોને તાત્કાલિક નોંધણી કરાવવા જણાવાયું છે. નોંધણી કરાવવાથી કોઈપણ ઇમરજન્સી સ્થિતિમાં દૂતાવાસ ભારતીય નાગરિકો સુધી ઝડપથી પહોંચી શકે છે અને જરૂરી સહાય પૂરી પાડી શકે છે. ઉપરાંત દૂતાવાસની સત્તાવાર વેબસાઇટ અને સોશિયલ મીડિયા પ્લેટફોર્મ પર આપવામાં આવતા અપડેટ્સ પર સતત નજર રાખવાની પણ સલાહ આપવામાં આવી છે.
આ પણ વાંચો: ઈરાનમાં બળવાના ભણકારા : વિદેશ મંત્રી અને રાષ્ટ્રપતિ સામે ગંભીર આરોપો, સત્તા પરિવર્તનની અટકળો તેજ
ઇમરજન્સી માટે હેલ્પલાઇન જાહેર
ભારતીય દૂતાવાસે ઈરાનમાં રહેલા ભારતીયોની સહાય માટે ઇમરજન્સી સંપર્ક નંબર અને ઇમેલ પણ જાહેર કર્યા છે.
હેલ્પલાઇન નંબર:
+98 912 810 9115
+98 912 810 9102
+98 912 810 9109
+98 993 217 9359
ઈ-મેલ: [email protected]
કોઈપણ પ્રકારની મદદ, માર્ગદર્શન અથવા ઇમરજન્સી પરિસ્થિતિમાં ભારતીય નાગરિકો સીધા દૂતાવાસનો સંપર્ક કરી શકે છે. દૂતાવાસે જણાવ્યું છે કે, પરિસ્થિતિને સતત મોનિટર કરવામાં આવી રહી છે અને જરૂરિયાત મુજબ નવી સૂચનાઓ સમયાંતરે જાહેર કરવામાં આવશે. તેથી ભારતીય નાગરિકોને માત્ર સત્તાવાર માહિતી પર જ વિશ્વાસ રાખવા અને દૂતાવાસ સાથે સતત સંપર્કમાં રહેવા અપીલ કરવામાં આવી છે.
