Vadodara gas pipe burst: વડોદરા શહેરના અકોટા વિસ્તારમાં ગુજરાત હાઉસિંગ બોર્ડના બ્લોક નંબર 18માં રસોઈ બનાવતી વખતે ગેસ સિલિન્ડરની પાઈપ અચાનક ફાટી જતાં ભયાનક આગ ભભૂકી ઉઠી હતી. આ અકસ્માતમાં એક યુવક મહેન્દ્ર ગંભીર રીતે હાથના ભાગે દાઝી ગયો હતો અને તેને તાત્કાલિક હોસ્પિટલમાં ખસેડવામાં આવ્યો છે.
ગેસ લીક થતાં જ થોડી જ ક્ષણોમાં આગના ગોટા ઉડ્યા
ઘટના દરમિયાન ગેસ લીક થતાં જ થોડી જ ક્ષણોમાં આગના ગોટા ઉડ્યા હતા, જેનાથી આખા વિસ્તારમાં દહેશત અને અફરાતફરીનો માહોલ સર્જાયો હતો. ઘરમાં હાજર લોકો ગભરાઈ ગયા હતા, પરંતુ આસપાસના પાડોશીઓ અને સ્થાનિક યુવાનોએ તાત્કાલિક પાણીનો મારો ચલાવી આગ પર કાબૂ મેળવ્યો હતો. તેમની સમયસૂચકતા અને સહકારને કારણે આગ વધુ ફેલાઈ શકી નહીં અને મોટી જાનહાનિ તથા સંપત્તિનું નુકસાન ટળી ગયું.
પોલીસની ટીમ તાત્કાલિક ઘટનાસ્થળે પહોંચી
ઘટનાની જાણ થતાં જ 108 એમ્બ્યુલન્સ, ફાયર બ્રિગેડ અને પોલીસની ટીમ તાત્કાલિક ઘટનાસ્થળે પહોંચી હતી. ફાયર બ્રિગેડે આગને સંપૂર્ણપણે બુઝાવી દીધી હતી અને સુરક્ષા પગલાં લીધાં હતાં. ઈજાગ્રસ્ત યુવકને પ્રાથમિક સારવાર બાદ વધુ સારવાર માટે હોસ્પિટલમાં દાખલ કરવામાં આવ્યો છે.
ઘરની ઘણી વસ્તુઓ બળીને ખાખ
આ અગ્નિકાંડમાં ઘરની ઘણી વસ્તુઓ બળીને ખાખ થઈ ગઈ હતી, પરંતુ સદભાગ્યે આગ અન્ય મકાનો સુધી ફેલાઈ નહોતી. હાલ પોલીસ અને સંબંધિત વિભાગો દ્વારા આગ લાગવાના કારણની વિગતવાર તપાસ શરૂ કરવામાં આવી છે.આ ઘટના ગેસ સિલિન્ડર અને પાઈપલાઈનની સુરક્ષા અંગે ફરી એક વાર ચેતવણી આપે છે.
