રાજ્યની આ 3 બેઠકો પર ફરીથી ચૂંટણી થશે! : જાણો ક્યાં અને શા કારણોસર રદ થઈ હતી ચૂંટણી? જુઓ આખું શેડ્યૂલ

Gujarat Local Body by-election 2026: ગુજરાતમાં સ્થાનિક સ્વરાજ્યની સંસ્થાઓમાં ખાલી પડેલી બેઠકો ભરવા માટે રાજ્ય ચૂંટણી આયોગ એક્શન મોડમાં આવ્યું છે. રાજ્યની ત્રણ અલગ-અલગ તાલુકા પંચાયતોની બેઠકો પર ચૂંટણી લડી રહેલા ઉમેદવારોના આકસ્મિક અવસાનને કારણે જે-તે સમયે ચૂંટણી પ્રક્રિયા રદ કરવામાં આવી હતી. હવે આ અટકેલી પ્રક્રિયાને ફરી વેગ આપતા આયોગે નવી તારીખોની સત્તાવાર જાહેરાત કરી દીધી છે. આ જાહેરાતની સાથે જ સાબરકાંઠા, સુરત અને અમદાવાદ જિલ્લાના સંબંધિત વિસ્તારોમાં રાજકીય ગરમાવો ફરી જોવા મળી રહ્યો છે.

ત્રણ બેઠકો પર જંગ: ક્યાં અને કેમ યોજાશે ફરી ચૂંટણી?

રાજ્ય ચૂંટણી આયોગ દ્વારા જાહેર કરાયેલી વિગતો અનુસાર, આ પેટાચૂંટણી ત્રણ મુખ્ય બેઠકો પર યોજાવાની છે. આ બેઠકો પર અગાઉની ચૂંટણી પ્રક્રિયા દરમિયાન ઉમેદવારોના નિધન થતા કાયદાકીય જોગવાઈ મુજબ ચૂંટણી મોકૂફ રાખવામાં આવી હતી. હવે નવા ઉમેદવારો સાથે આ બેઠકો પર ફરીથી મતદાન પ્રક્રિયા હાથ ધરવામાં આવશે.

આ બેઠકો પર યોજાશે પેટાચૂંટણી:

• વિજયનગર (સાબરકાંઠા): ચિતરીયા બેઠક પર ભાજપના ઉમેદવાર લીનાબેન નીનામાનું અવસાન થતા અહીં ચૂંટણી અટકી હતી.

• બારડોલી (સુરત): અસ્તાન બેઠક પર કોંગ્રેસના ઉમેદવાર ધર્મેશ રાઠોડના અવસાનને કારણે પ્રક્રિયા રદ થઈ હતી.

• બાવળા (અમદાવાદ): દહેગામડા બેઠક પર ભાજપના ઉમેદવાર જશીબેન ડાભીનું નિધન થતા ચૂંટણી ફરી યોજાશે.

આ પણ વાંચો: સુરતમાં 59.21% મતદાન બાદ કોનું પલડું ભારે? : ભાજપનો કેસરીયો લહેરાશે કે 'આપ' કરશે મોટો ઉલટફેર? જાણો તમામ વોર્ડના સચોટ સમીકરણો

ચૂંટણી કાર્યક્રમ: 24 મેના રોજ મતદાન અને 26 મેના રોજ પરિણામ

ચૂંટણી આયોગ દ્વારા જાહેર કરવામાં આવેલા સત્તાવાર કાર્યક્રમ મુજબ, મે મહિનામાં જ સમગ્ર પ્રક્રિયા પૂર્ણ કરી લેવામાં આવશે. ઉમેદવારી ફોર્મ ભરવાથી લઈને પરિણામ સુધીની વિગતો નીચે મુજબ છે:

રાજકીય પક્ષોમાં તૈયારીઓ તેજ: લોકલ લેવલે જામશે જંગ

નવી તારીખો જાહેર થતાની સાથે જ ભાજપ, કોંગ્રેસ અને અન્ય સ્થાનિક સંગઠનો ફરીથી એક્ટિવ થઈ ગયા છે. તાલુકા પંચાયતની આ બેઠકો ભલે નાની લાગે, પરંતુ સ્થાનિક સ્તરે પક્ષનું પ્રભુત્વ સાબિત કરવા માટે આ જંગ મહત્વનો માનવામાં આવે છે. ખાસ કરીને જે બેઠકો પર જે-તે પક્ષના ઉમેદવારનું અવસાન થયું હતું, ત્યાં તે પક્ષ સહાનુભૂતિ અને સંગઠનની શક્તિના જોરે બેઠક જીતવા પૂરો પ્રયાસ કરશે.

પારદર્શક પ્રક્રિયા પર આયોગનો ભાર

રાજ્ય ચૂંટણી આયોગે તમામ જિલ્લા કલેક્ટરો અને ચૂંટણી અધિકારીઓને આદેશ આપ્યો છે કે પેટાચૂંટણીની પ્રક્રિયા સંપૂર્ણપણે નિષ્પક્ષ અને પારદર્શક રીતે પૂર્ણ થાય. આ ત્રણેય વિસ્તારોમાં આચારસંહિતાના અમલ સાથે જરૂરી સુરક્ષા બંદોબસ્ત પણ ગોઠવી દેવામાં આવશે. હવે જોવાનું એ રહેશે કે 26 મેના રોજ કોના ફાળે વિજયનો તાજ આવે છે.