Gujarat Politics: કોંગ્રેસના આંતરિક ભંગાણ, અપક્ષ અને ‘આપ’ના સમીકરણો વચ્ચે ભાજપે અનેક તાલુકા પંચાયતોમાં સત્તા કબજે કરી; ધાનપુરમાં હુમલાથી રાજકીય તણાવ ચરમસીમાએ પહોંચ્યો છે. ગુજરાતમાં સ્થાનિક સ્વરાજ્યની ચૂંટણી બાદ તાલુકા પંચાયત પ્રમુખ અને ઉપપ્રમુખની વરણી પ્રક્રિયા હવે રાજકીય શક્તિપ્રદર્શનનું કેન્દ્ર બની ગઈ છે. રાજ્યની 133 તાલુકા પંચાયતોમાં પ્રથમ તબક્કાની વરણી પૂર્ણ થયા બાદ રવિવારે બાકી રહેલી 127 તાલુકા પંચાયતોમાં પ્રમુખ-ઉપપ્રમુખની ચૂંટણી યોજાઈ હતી. અનેક જિલ્લાઓમાં ભારે રાજકીય રસાકસી, હોબાળો, આક્ષેપ-પ્રતિઆક્ષેપ અને સુરક્ષા વચ્ચે સત્તા માટે જોરદાર રાજકીય ખેલ જોવા મળ્યો હતો.
વાયરલ ક્લિપ મુદ્દે મહેસાણાના રાજકારણમાં ગરમાવો: ભાજપ નેતા પિન્ટુ પટેલની અટકાયત
ખાસ કરીને બનાસકાંઠાના વડગામ અને દાંતા, અમરેલીના લાઠી, જૂનાગઢ તેમજ દાહોદના ધાનપુરમાં સર્જાયેલા બનાવોએ સમગ્ર રાજ્યની રાજકીય ગરમાવો વધારી દીધો છે. ભાજપે આ વખતે વિપક્ષી ગઢ ગણાતી બેઠકો પર વિશેષ વ્યુહરચના અપનાવી હોવાના આક્ષેપો વચ્ચે અનેક તાલુકા પંચાયતોમાં સત્તા પોતાના પક્ષે ખેંચી લીધી છે. કોંગ્રેસ અને આમ આદમી પાર્ટી તરફથી ‘ઓપરેશન લોટસ’ અને લોકશાહીની હત્યાના આક્ષેપો કરવામાં આવ્યા છે, જ્યારે ભાજપે આ જીતને વિકાસ અને સંગઠનશક્તિની જીત ગણાવી છે.
વડગામમાં બહુમતી હોવા છતાં કોંગ્રેસ સત્તાથી વંચિત
બનાસકાંઠાના વડગામ તાલુકા પંચાયતની ચૂંટણી સૌથી વધુ ચર્ચામાં રહી હતી. કુલ 28 બેઠકોમાંથી કોંગ્રેસ પાસે 14 સભ્યો સાથે બહુમતી જેવી સ્થિતિ હતી, જ્યારે ભાજપ પાસે 13 સભ્યો અને એક અપક્ષ સભ્ય હતો. રાજકીય ગણિત પ્રમાણે કોંગ્રેસ માટે સત્તા મેળવવાનો રસ્તો સરળ માનવામાં આવી રહ્યો હતો, પરંતુ આખરી ઘડીએ સમીકરણો સંપૂર્ણ બદલાઈ ગયા. ચૂંટણી પ્રક્રિયા દરમિયાન પંચાયત હોલમાં કોંગ્રેસ અને ભાજપના સભ્યો વચ્ચે ભારે હોબાળો, બોલાચાલી અને ધક્કામુક્કી સર્જાઈ હતી. પરિસ્થિતિ એટલી તંગ બની ગઈ કે પોલીસને હસ્તક્ષેપ કરવો પડ્યો હતો. આ દરમિયાન કોંગ્રેસનો એક સભ્ય ગેરહાજર રહ્યો અને અપક્ષ સભ્યે ભાજપને સમર્થન જાહેર કરતાં ભાજપનું પલ્લું ભારે બન્યું હતું. આ રાજકીય પલટામાં અનુબેન ઉપલાણા પ્રમુખ તરીકે ચૂંટાયા હતા. કોંગ્રેસે આ સમગ્ર ઘટનાક્રમને રાજકીય દબાણ અને પ્રલોભનની રાજનીતિ ગણાવી હતી, જ્યારે ભાજપે કોંગ્રેસની આંતરિક અસંતોષને જવાબદાર ગણાવ્યો હતો.
દાંતામાં કોંગ્રેસનો વર્ષો જૂનો ગઢ ધરાશાયી
દાંતા તાલુકા પંચાયતની ચૂંટણીમાં પણ ભારે સુરક્ષા વચ્ચે મતદાન યોજાયું હતું. ચૂંટણી અધિકારી, પ્રાંત અધિકારી, DYSP સહિત પોલીસનો મોટો કાફલો તહેનાત રાખવામાં આવ્યો હતો અને બોડી-વોર્ન કેમેરાની દેખરેખ હેઠળ સમગ્ર પ્રક્રિયા હાથ ધરાઈ હતી. અહીં કોંગ્રેસના એક મહિલા સભ્ય ગેરહાજર રહેતાં ભાજપને સીધો ફાયદો થયો હતો. પરિણામે ભાજપે વર્ષો જૂનું કોંગ્રેસનું ગઢ કબજે કર્યું હતું. સૌથી ચોંકાવનારી બાબત એ રહી કે વર્ષ 2018માં કોંગ્રેસમાંથી પ્રમુખ બનેલા પિન્કીબેન ચૌધરી આ વખતે ભાજપના ઉમેદવાર તરીકે પ્રમુખ પદે ચૂંટાયા હતા. કોંગ્રેસના આંતરિક ભંગાણ અને મતભેદોને કારણે ભાજપને કુલ 10 મત મળ્યા હોવાનું સામે આવ્યું છે. જીત બાદ ભાજપના કાર્યકરો દ્વારા ફટાકડા ફોડી વિજયોત્સવ મનાવવામાં આવ્યો હતો.
લાઠીમાં ‘આપ’ના સભ્યના સમર્થનથી ભાજપનો દાવ સફળ
અમરેલી જિલ્લાના લાઠી તાલુકા પંચાયતમાં પણ રાજકીય સમીકરણોએ અંતિમ ક્ષણે નવો વળાંક લીધો હતો. કોંગ્રેસને સત્તાથી દૂર રાખવા માટે ભાજપે આમ આદમી પાર્ટીના સભ્યના સમર્થન સાથે સત્તા કબજે કરી હોવાનું રાજકીય વર્તુળોમાં ચર્ચાઈ રહ્યું છે. સમગ્ર રાજકીય ગોઠવણી પાછળ લાઠીના પ્રભાવશાળી રાજકીય નેતા અને ધારાસભ્ય હીરા સોલંકીના જમાઈ ચેતન શિયાળની ભૂમિકા ચર્ચામાં આવી છે. સ્થાનિક સ્તરે તેને ભાજપના ‘ઓપરેશન પ્રમુખ’ તરીકે જોવામાં આવી રહ્યું છે. કોંગ્રેસે આ પરિસ્થિતિને મતદારોના જનાદેશ સાથે દગો ગણાવ્યો હતો.
જૂનાગઢમાં ધરપકડથી રાજકીય ગરમાવો
જૂનાગઢ જિલ્લામાં ટાઈ જેવી પરિસ્થિતિ વચ્ચે રાજકીય તણાવ વધુ ઉગ્ર બન્યો હતો. આમ આદમી પાર્ટીના એક ટેકેદાર સભ્યની છેતરપિંડીના કેસમાં ધરપકડ થતાં વિપક્ષે તેને રાજકીય દબાણની કાર્યવાહી ગણાવી હતી. વિપક્ષી પક્ષોએ આરોપ લગાવ્યો કે ચૂંટણી પૂર્વે રાજકીય સમીકરણોને પ્રભાવિત કરવા માટે કાર્યવાહી કરવામાં આવી છે. બીજી તરફ, પોલીસે કેસ કાયદેસરની પ્રક્રિયા મુજબ નોંધાયો હોવાનું જણાવ્યું હતું. આ ઘટનાને લઈને જિલ્લા રાજકારણમાં ભારે ચર્ચા શરૂ થઈ ગઈ છે.
ધાનપુરમાં ઉમેદવારોની ગાડીઓ પર હુમલો
દાહોદ જિલ્લાના ધાનપુર તાલુકા પંચાયતમાં ચૂંટણી પૂર્વે હિંસક ઘટનાએ ચકચાર મચાવી દીધી હતી. આમ આદમી પાર્ટીના ઉમેદવારો તાલુકા પંચાયત કચેરી તરફ જઈ રહ્યા હતા ત્યારે વાસિયા ડુંગરી નજીક અજાણ્યા શખ્સોએ તેમની ગાડીઓ પર હુમલો કર્યો હતો. હુમલાખોરોએ રસ્તામાં ગાડીઓ અટકાવી તોડફોડ કરી હતી અને ઉમેદવારોને મતદાન સ્થળે પહોંચતા રોકવાનો પ્રયાસ કર્યો હતો. ઘટનાને પગલે વિસ્તારમાં તણાવ ફેલાયો હતો. ઘટનાની જાણ થતાં જ પોલીસનો મોટો કાફલો સ્થળ પર દોડી ગયો હતો અને પરિસ્થિતિ કાબૂમાં લીધી હતી. પોલીસે હુમલાખોરોની ઓળખ અને હુમલા પાછળના રાજકીય કનેક્શન અંગે તપાસ શરૂ કરી છે. આમ આદમી પાર્ટીએ આ હુમલાને લોકશાહી પર હુમલો ગણાવ્યો હતો.
તાલુકા પંચાયતની ચૂંટણી હવે સ્થાનિક નહીં, રાજકીય શક્તિની લડાઈ
આ સમગ્ર ચૂંટણી પ્રક્રિયાએ સ્પષ્ટ કર્યું છે કે તાલુકા પંચાયતની સત્તા હવે માત્ર સ્થાનિક શાસનનો મુદ્દો રહી નથી. 2027ની વિધાનસભા ચૂંટણી પૂર્વે ગ્રામ્ય રાજકારણમાં પ્રભાવ જમાવવાનો પ્રયાસ તમામ પક્ષો કરી રહ્યા છે. ભાજપે સંગઠનશક્તિ અને વ્યૂહરચના દ્વારા વિપક્ષી ગઢમાં ઘૂસણખોરી શરૂ કરી હોવાનું રાજકીય વિશ્લેષકો માને છે, જ્યારે કોંગ્રેસ અને ‘આપ’ માટે આંતરિક એકતા જાળવવી હવે સૌથી મોટો પડકાર બની રહ્યો છે. રાજ્યના અનેક જિલ્લાઓમાં સર્જાયેલા રાજકીય નાટક, ગેરહાજર સભ્યો, અપક્ષના ટેકા, ધરપકડ અને હિંસક હુમલાઓએ તાલુકા પંચાયતની આ ચૂંટણીને રાજ્યસ્તરની રાજકીય જંગમાં ફેરવી દીધી છે.
