ગુજરાતના વિવિધ વિસ્તારોમાં મેઘરાજાએ જોરદાર એન્ટ્રી કરતાં ચોમાસાની સીઝનનો માહોલ જામ્યો છે. ગીર સોમનાથ, અમરેલી, ડાંગ અને વલસાડ સહિતના જિલ્લાઓમાં સારો વરસાદ નોંધાતા વાતાવરણમાં ઠંડક પ્રસરી ગઈ છે અને ખેડૂતોમાં ખુશીની લાગણી જોવા મળી રહી છે. રાજ્યના અનેક વિસ્તારોમાં વરસાદી ઝાપટાં અને ધોધમાર વરસાદના કારણે ચોમાસાની અસર સ્પષ્ટપણે જોવા મળી રહી છે.
હવામાન વિભાગના અનુમાન મુજબ આગામી દિવસોમાં પણ રાજ્યના વિવિધ વિસ્તારોમાં વરસાદી ગતિવિધિઓ યથાવત રહેવાની શક્યતા છે. સાથે જ 26 જૂન આસપાસ ગુજરાતમાં સત્તાવાર રીતે ચોમાસું બેસી શકે તેવી સંભાવના વ્યક્ત કરવામાં આવી છે.
ગીર સોમનાથમાં ધોધમાર વરસાદ
ગીર સોમનાથ જિલ્લાના ગીર ગઢડા તાલુકામાં મેઘરાજાએ જોરદાર બેટિંગ કરી હતી. ધોકડવા ગામ સહિત આસપાસના વિસ્તારોમાં સાંબેલાધાર વરસાદ વરસતાં લોકોમાં રાહતનો અનુભવ થયો હતો. ધોકડવા, સામેતર, બેડીયા, મોતીસર, સોનારિયા, આંબાડા, ઉગલા અને જશાધાર સહિતના ગામોમાં સારો વરસાદ નોંધાયો હતો. વરસાદના કારણે અનેક રસ્તાઓ પર પાણી વહેતા જોવા મળ્યા હતા. લાંબા સમયથી ગરમી અને ઉકળાટનો સામનો કરી રહેલા લોકોને વરસાદથી રાહત મળી છે. સાથે જ ખેતીલાયક વરસાદ થતાં ખેડૂતોમાં પણ ઉત્સાહનો માહોલ જોવા મળ્યો હતો.
અમરેલી જિલ્લામાં પણ મેઘમહેર
અમરેલી જિલ્લામાં પણ ફરી એકવાર વરસાદી માહોલ જામ્યો છે. જાફરાબાદ તાલુકાના ટીંબી, હેમાળ, માણસા, દુધાળા અને નાગેશ્રી સહિતના વિસ્તારોમાં ધોધમાર વરસાદ નોંધાયો હતો. ઉપરાંત ખાંભા તાલુકાના ડેડાણ, ખડાધાર, શ્યામગઢ અને આસપાસના વિસ્તારોમાં પણ સારો વરસાદ વરસ્યો હતો. ખેતી માટે અનુકૂળ વરસાદ પડતા ખેડૂતોમાં ખુશી વ્યાપી છે. વરસાદના કારણે જમીનમાં ભેજનું પ્રમાણ વધ્યું છે, જેના કારણે વાવણીની કામગીરીને વેગ મળવાની આશા વ્યક્ત કરવામાં આવી રહી છે. ગ્રામ્ય વિસ્તારોમાં વરસાદી માહોલ વચ્ચે લોકોમાં ચોમાસાને લઈને આશાવાદ જોવા મળી રહ્યો છે.
આ પણ વાંચો: ખેડૂતો માટે મોટી ખુશખબર! : હવે કૃષિ હરાજી થશે સંપૂર્ણ ડિજિટલ, અમિત શાહ લોન્ચ કરશે NAFEX.in પોર્ટલ; જાણો ખેડૂતોને શું મળશે લાભ
સાપુતારામાં કુદરતનું મનમોહક રૂપ
દક્ષિણ ગુજરાતના ડાંગ જિલ્લામાં સતત બીજા દિવસે પણ મેઘરાજાની મહેર યથાવત રહી છે. રાજ્યના એકમાત્ર હિલ સ્ટેશન સાપુતારામાં આજે પણ વરસાદ વરસતા સમગ્ર વિસ્તાર હરિયાળીથી છવાઈ ગયો છે. સર્પગંગા તળાવ આસપાસ ધુમ્મસ અને વરસાદી માહોલ વચ્ચે કુદરતી સૌંદર્ય ખીલી ઊઠ્યું છે. વરસાદના કારણે પહાડી વિસ્તારોમાં ઠંડક વધી ગઈ છે અને પ્રવાસીઓને મનમોહક દ્રશ્યો જોવા મળી રહ્યા છે. સાપુતારાની મુલાકાતે આવેલા પ્રવાસીઓ માટે વરસાદી વાતાવરણ આકર્ષણનું કેન્દ્ર બન્યું છે. સ્થાનિક લોકોમાં પણ સારા વરસાદને લઈને આનંદની લાગણી જોવા મળી રહી છે. ડાંગના જંગલ વિસ્તારોમાં વરસાદના કારણે નદીઓ અને ઝરણાઓમાં પાણીની આવક વધવાની શક્યતા છે.
વલસાડમાં સતત બીજા દિવસે વરસાદ
વલસાડ જિલ્લામાં પણ સતત બીજા દિવસે વરસાદી માહોલ યથાવત રહ્યો છે. શહેર તેમજ આસપાસના વિસ્તારોમાં સવારથી ઝરમર વરસાદ વરસતા વાતાવરણમાં ઠંડક પ્રસરી ગઈ હતી. તિથલ રોડ, હાલર રોડ અને રામવાડી સહિતના વિસ્તારોમાં વરસાદ નોંધાયો હતો. ઉપરાંત તિથલ, સેગવી, કોસંબા અને આસપાસના ગામોમાં પણ હળવાથી મધ્યમ વરસાદ વરસ્યો હતો. છેલ્લા બે દિવસથી વાદળછાયું વાતાવરણ અને વરસાદી ગતિવિધિઓના કારણે તાપમાનમાં ઘટાડો નોંધાયો છે. ખેતી માટે અનુકૂળ વરસાદ થતાં ખેડૂતોમાં ખુશીનો માહોલ છે અને વાવણી માટેની તૈયારીઓ તેજ બની રહી છે.
મધ્ય અને ઉત્તર ગુજરાત માટે આગાહી
હવામાન વિભાગે મધ્ય ગુજરાત અને ઉત્તર ગુજરાતના કેટલાક વિસ્તારોમાં છૂટાછવાયા વરસાદી ઝાપટાં પડવાની સંભાવના વ્યક્ત કરી છે. કેટલીક જગ્યાએ ભારે વરસાદ અને તેજ પવનના કારણે નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે. તંત્ર દ્વારા સ્થાનિક સ્તરે જરૂરી તકેદારી રાખવા સૂચનાઓ આપવામાં આવી છે. ખાસ કરીને શહેરી વિસ્તારોમાં ડ્રેનેજ વ્યવસ્થાની દેખરેખ અને વરસાદી પરિસ્થિતિઓ પર સતત નજર રાખવામાં આવી રહી છે.
આ પણ વાંચો : 'રથયાત્રા દરમિયાન વીજળીના કડાકા સાથે વરસાદ' : હવામાન નિષ્ણાત અંબાલાલ પટેલની આગાહી
માછીમારો માટે વિશેષ સૂચના
દરિયાકાંઠાના વિસ્તારોમાં વરસાદી સિસ્ટમો સક્રિય બનતાં હવામાન વિભાગે માછીમારોને વિશેષ સાવચેતી રાખવા અપીલ કરી છે. સમુદ્રમાં જવા ઇચ્છતા માછીમારોને દરિયાની સ્થિતિ અને હવામાન સંબંધિત તાજી માહિતી મેળવ્યા બાદ જ દરિયો ખેડવાની સલાહ આપવામાં આવી છે. દરિયાકાંઠાના વિસ્તારોમાં પવનની ગતિ વધવાની તેમજ સમુદ્રમાં મોજાં ઉછળવાની શક્યતાને ધ્યાનમાં રાખીને માછીમારોને જરૂરી સુરક્ષા પગલાં લેવા સૂચના આપવામાં આવી છે.
ચોમાસાની ગતિ તેજ, આગામી દિવસોમાં વધુ વરસાદની શક્યતા
રાજ્યમાં ચોમાસાની ગતિ ધીમે ધીમે તેજ બની રહી છે. હવામાન વિભાગના અનુમાન પ્રમાણે આગામી દિવસોમાં વરસાદી સિસ્ટમો વધુ મજબૂત બનતાં ગુજરાતના વિવિધ વિસ્તારોમાં સારો વરસાદ નોંધાઈ શકે છે. ખેતી, જળસંગ્રહ અને પર્યાવરણના દૃષ્ટિકોણથી આ વરસાદ મહત્વપૂર્ણ માનવામાં આવી રહ્યો છે. જો આગાહી મુજબ વરસાદ ચાલુ રહેશે તો રાજ્યના જળાશયો, ડેમો અને કૃષિ ક્ષેત્રને તેનો સીધો લાભ મળી શકે છે.
