ગુજરાતની મહાનગરપાલિકાઓમાં નવા પદાધિકારીઓની પસંદગી અંગે ચાલી રહેલી અટકળો અને ઉત્સુકતાનો આખરે અંત આવ્યો છે. ભાજપ હાઈકમાન્ડ દ્વારા મોકલાયેલા મેન્ડેટના આધારે રાજ્યની વિવિધ મહાનગરપાલિકાઓમાં મેયર, ડેપ્યુટી મેયર, સ્ટેન્ડિંગ કમિટીના ચેરમેન તેમજ અન્ય મહત્વપૂર્ણ હોદ્દાઓ માટે નામોની સત્તાવાર જાહેરાત કરવામાં આવી છે.
અમદાવાદથી લઈને જામનગર, મોરબી, નવસારી અને ગાંધીધામ સુધી નવા રાજકીય ચહેરાઓને જવાબદારી સોંપવામાં આવી છે. શહેરોના વિકાસ, નગર વ્યવસ્થા અને આગામી શહેરી યોજનાઓ માટે હવે આ નવી ટીમો મહત્વપૂર્ણ ભૂમિકા ભજવશે.
અમદાવાદ મહાનગરપાલિકા: હિતેશ બારોટ બન્યા નવા મેયર
ગુજરાતના સૌથી મોટા મહાનગર અમદાવાદમાં થલતેજ વોર્ડના કોર્પોરેટર હિતેશ બારોટને શહેરના પ્રથમ નાગરિક તરીકે પસંદ કરવામાં આવ્યા છે. અમદાવાદ મહાનગરપાલિકા (AMC)માં નવી ટીમની રચના સાથે હવે શહેરના વિકાસકાર્યોને નવી દિશા મળવાની આશા વ્યક્ત થઈ રહી છે.
ડેપ્યુટી મેયર તરીકે સાબરમતી વોર્ડના અંજુબેન શાહની પસંદગી કરવામાં આવી છે, જ્યારે ખોખરા વોર્ડના કમલેશ પટેલને સ્ટેન્ડિંગ કમિટીના ચેરમેન તરીકે મહત્વપૂર્ણ જવાબદારી સોંપવામાં આવી છે.
તે ઉપરાંત શાહીબાગ વોર્ડના જશુભાઈ ઠાકોરને શાસક પક્ષના નેતા અને ચાંદખેડા વોર્ડના અતુલ મિશ્રાને દંડક બનાવવામાં આવ્યા છે.
હિતેશ બારોટ બન્યા અમદાવાદના નવા મેયર: અંજુ શાહ ડેપ્યુટી મેયર, કમલેશ પટેલ બન્યા સ્ટેન્ડિંગ કમિટિના ચેરમેન
જામનગરમાં મોનિકા વ્યાસને મેયર પદ
જામનગર મહાનગરપાલિકામાં મોનિકા વ્યાસને નવા મેયર તરીકે પસંદ કરવામાં આવ્યા છે. શહેરના નગર વિકાસ અને વહીવટી કામગીરી માટે હવે તેઓ સુકાની તરીકે કામગીરી સંભાળશે.
રાકેશ ડેરને ડેપ્યુટી મેયર બનાવવામાં આવ્યા છે, જ્યારે કિરણ મોનાણીને સ્ટેન્ડિંગ કમિટીના ચેરમેન તરીકે નિયુક્ત કરવામાં આવ્યા છે. અમર મોદીને શાસક પક્ષના નેતા અને પ્રવિણાબેન રૂપડિયાને દંડક તરીકે જવાબદારી સોંપવામાં આવી છે.
મોરબીમાં ઉત્તમ સુરાણીને મેયર પદ
મોરબી મહાનગરપાલિકામાં વોર્ડ નંબર 8ના કોર્પોરેટર ઉત્તમ સુરાણીને મેયર બનાવવામાં આવ્યા છે. ઔદ્યોગિક શહેર તરીકે ઓળખાતા મોરબીમાં શહેરી વિકાસ અને ઈન્ફ્રાસ્ટ્રક્ચર માટે નવી ટીમ પાસેથી મોટી અપેક્ષાઓ રાખવામાં આવી રહી છે.
ચિરાગ રાણપરાને ડેપ્યુટી મેયર અને જયંતીભાઈ પડસુંભિયાને સ્ટેન્ડિંગ કમિટીના ચેરમેન તરીકે પસંદ કરવામાં આવ્યા છે. જ્યારે અર્પિતાબા જાડેજાને શાસક પક્ષના નેતા અને જયેશભાઈ દેસાઈને દંડક તરીકે જવાબદારી આપવામાં આવી છે.
આ પણ વાંચો: વડોદરામાં પાર્કિંગ મુદ્દે બે જૂથોમાં હિંસક અથડામણ! : લાકડા-પાઈપોથી હુમલા, વિસ્તારમાં તંગદિલી
નવસારીને મળ્યા પ્રથમ મેયર
નવસારી મહાનગરપાલિકામાં અશોક ધોરાજીયાને પ્રથમ મેયર તરીકે પસંદ કરવામાં આવ્યા છે. નવસારી શહેર માટે આ ઐતિહાસિક ક્ષણ માનવામાં આવી રહી છે કારણ કે મહાનગરપાલિકા રચાયા બાદ હવે પ્રથમ વખત શહેરને મેયર મળ્યો છે.
કેયુરી દેસાઈને ડેપ્યુટી મેયર, મુકેશ અગ્રવાલને સ્ટેન્ડિંગ કમિટી ચેરમેન, નરેશ પુરોહિતને શાસક પક્ષના નેતા અને રાકેશ પટેલને દંડક તરીકે નિયુક્ત કરવામાં આવ્યા છે.
ગાંધીધામમાં નવી ટીમ તૈયાર
કચ્છના ઔદ્યોગિક નગર ગાંધીધામમાં પણ નવા પદાધિકારીઓના નામ જાહેર થયા છે. દિવ્યા નાથાણીને મેયર પદની જવાબદારી સોંપવામાં આવી છે. નવીન જરૂંને ડેપ્યુટી મેયર અને તેજસ શેઠને સ્ટેન્ડિંગ કમિટીના ચેરમેન તરીકે પસંદ કરવામાં આવ્યા છે.
ગાંધીધામમાં વેપાર, ઔદ્યોગિક વિકાસ અને શહેરી સુવિધાઓ જેવા મુદ્દાઓ આગામી સમયમાં નવી ટીમ માટે પ્રાથમિકતા બનશે.
