અમદાવાદમાં રહેતા એક ભારતીય હિન્દુ યુવકે પોતાની પત્ની અને 7 મહિનાના બાળકને કોર્ટ સમક્ષ રજૂ કરવા માટે ગુજરાત હાઈકોર્ટમાં હેબિયસ કોર્પસ અરજી દાખલ કરી છે. આ કેસની સુનાવણી દરમિયાન રાજ્ય સરકારે કોર્ટમાં રજૂઆત કરીને જણાવ્યું હતું કે અરજદારની પત્ની મૂળ બાંગ્લાદેશની નાગરિક છે અને તપાસમાં સામે આવ્યું છે કે તેને અન્ય કેટલીક મહિલાઓ સાથે ગેરકાયદેસર રીતે ભારતમાં લાવવામાં આવી હતી.
રાજ્ય સરકાર તરફથી વરિષ્ઠ પોલીસ અધિકારી મારફતે દાખલ કરાયેલા જવાબમાં જણાવાયું હતું કે ભરુચમાં નોંધાયેલા FIRના આધારે તપાસ દરમિયાન આ સમગ્ર મામલો સામે આવ્યો હતો. સરકારી પક્ષનું કહેવું હતું કે મહિલાની હિલચાલ પર ફોરેનર્સ અને ઇમિગ્રન્ટ્સ સંબંધિત કાયદા હેઠળ કાયદેસર પ્રતિબંધ મૂકવામાં આવ્યો છે, તેથી બંધારણના આર્ટિકલ 21ના ભંગનો પ્રશ્ન ઊભો થતો નથી.
બાળકના હિત અને માનવતાવાદી મુદ્દા પર ભાર
અરજદાર પક્ષે હાજર રહેલા એડવોકેટે રાજ્ય સરકારના જવાબ સામે રિજોઇન્ડર દાખલ કરવા માટે સમય માગ્યો હતો. સાથે જ કોર્ટનું ધ્યાન ખાસ કરીને 7 મહિનાના બાળકના માનવતાવાદી પાસા તરફ દોરવામાં આવ્યું હતું. વકીલે દલીલ કરી હતી કે કેસમાં માત્ર કાયદાકીય મુદ્દો જ નહીં પરંતુ એક નવજાત બાળકના ભવિષ્ય અને પરિવારના હકોનો મુદ્દો પણ જોડાયેલો છે.
હાઈકોર્ટે કેસની વધુ સુનાવણી વેકેશન બાદ રાખી છે. ત્યાં સુધી પત્ની અને બાળકની હિલચાલ પરનો પ્રતિબંધ યથાવત્ રહેશે. જોકે, પરિવારજનોને અગાઉની જેમ મળવાની મંજૂરી ચાલુ રાખવામાં આવશે તેવી પણ કોર્ટ સમક્ષ માહિતી આપવામાં આવી હતી.
વડોદરામાં 'રક્ષક જ ભક્ષક' બન્યા: પોલીસકર્મીઓ પર યુવકને માર મારવાનો આક્ષેપ
પ્રેમ સંબંધથી લગ્ન સુધીની કહાની
કેસ સાથે જોડાયેલી વિગતો અનુસાર, બાંગ્લાદેશમાંથી ગેરકાયદેસર રીતે ભારતમાં લાવવામાં આવેલી યુવતી આરોપીના ચુંગલમાંથી ભાગી નીકળવામાં સફળ રહી હતી. ત્યારબાદ તેનો સંપર્ક અમદાવાદમાં રહેતા અરજદાર યુવક સાથે થયો હતો અને બંને વચ્ચે પ્રેમ સંબંધ બંધાયો હતો. બાદમાં બંનેએ લગ્ન કર્યા અને તેમને સંતાન તરીકે 7 મહિનાનું બાળક પણ છે.
હાલમાં યુવતી અને બાળક બંને સરકારના સંરક્ષણ ગૃહમાં રાખવામાં આવ્યા છે. આ સમગ્ર મામલાએ હવે કાયદાકીય અને માનવતાવાદી બંને સ્તરે ચર્ચા જગાવી છે. એક તરફ ગેરકાયદેસર ઇમિગ્રેશન અને વિદેશી નાગરિકોના કાયદાકીય હકોનો મુદ્દો છે, જ્યારે બીજી તરફ પરિવાર અને બાળકના હિતનો પ્રશ્ન પણ મહત્વનો બની ગયો છે.
હેબિયસ કોર્પસ અરજીનું મહત્વ
હેબિયસ કોર્પસ અરજી એ કાયદાકીય પ્રક્રિયા છે જેમાં કોઈ વ્યક્તિને ગેરકાયદેસર રીતે અટકાવવામાં આવી હોય તો તેને કોર્ટ સમક્ષ રજૂ કરવાની માંગ કરવામાં આવે છે. ભારતીય ન્યાયવ્યવસ્થામાં આ એક મહત્વપૂર્ણ બંધારણીય ઉપાય માનવામાં આવે છે, જે વ્યક્તિગત સ્વતંત્રતાના રક્ષણ માટે ઉપયોગમાં લેવાય છે.
અમદાવાદમાં પાણીનું સંકટ: 4 ઝોનમાં 10 દિવસ રહેશે પાણી કાપ, જાણો કયાં વિસ્તારમાં રહેશે પાણીની સમસ્યા
અરજદાર પક્ષનો દાવો છે કે પત્ની અને બાળકને સંરક્ષણ ગૃહમાં રાખવાની પ્રક્રિયા અને તેમની હિલચાલ પરનો પ્રતિબંધ ગેરવ્યાજબી છે. જોકે રાજ્ય સરકારનું કહેવું છે કે મહિલાની નાગરિકતા અને ભારતમાં પ્રવેશ સંબંધિત તપાસને ધ્યાનમાં રાખીને કાયદેસર રીતે કાર્યવાહી કરવામાં આવી રહી છે.
આગામી સુનાવણી પર સૌની નજર
હવે આ મામલે હાઈકોર્ટમાં આગામી સુનાવણી વેકેશન બાદ થશે. કોર્ટ આગામી તબક્કે મહિલાની કાયદાકીય સ્થિતિ, બાળકના હિત અને પરિવારના અધિકારો વચ્ચે સંતુલન કેવી રીતે જાળવવું તે મુદ્દે મહત્વપૂર્ણ નિર્ણય લઈ શકે છે.
આ કેસ હવે માત્ર ઇમિગ્રેશન મુદ્દો નહીં પરંતુ માનવ અધિકાર, પરિવાર અને બાળ હિત સાથે જોડાયેલ સંવેદનશીલ કેસ તરીકે પણ જોવામાં આવી રહ્યો છે.
