કટારીયા ચોકડી આવાસ યોજનાને રાજકીય ગ્રહણ? : ટેન્ડર પ્રક્રિયા પૂર્ણ થાય તે પહેલાં જ હેતુફેરની માંગથી ચર્ચા તેજ

રાજકોટ મહાનગરપાલિકાની કટારીયા ચોકડી વિસ્તારની આવાસ યોજના રાજકીય અને વહીવટી વર્તુળોમાં ચર્ચાનો વિષય બની છે. 576 આવાસોના નિર્માણ માટેની પ્રક્રિયા આગળ વધી રહી છે અને ટેન્ડર પ્રક્રિયા પૂર્ણ થાય તે પહેલાં જ યોજનાના પ્લોટના હેતુફેર અંગે રજૂઆત થતાં સમગ્ર મામલે નવા સવાલો ઊભા થયા છે. ખાસ કરીને સત્તાધારી પક્ષના જ કેટલાક આગેવાનો દ્વારા આવાસ માટે નિર્ધારિત જમીનના ઉપયોગમાં ફેરફાર કરવાની માંગ ઉઠાવવામાં આવતા આ મુદ્દો વધુ ચર્ચાસ્પદ બન્યો છે.

મળતી માહિતી અનુસાર કટારીયા ચોકડી નજીક રોડ-ટચ વિસ્તારમાં આવાસ યોજના માટે પ્લોટ નિર્ધારિત કરવામાં આવ્યો છે. આ યોજના અંતર્ગત 576 આવાસોના નિર્માણનો માર્ગ મોકળો કરવા માટેની કાર્યવાહી ચાલી રહી છે. જોકે ટેન્ડર પ્રક્રિયા પૂર્ણ થાય તે પહેલાં જ પ્લોટના હેતુફેર અને યોજનાને અન્ય સ્થળે ખસેડવાની રજૂઆત કરવામાં આવી હોવાનું સામે આવ્યું છે.

આ પણ વાંચો: એક લગ્ન અને અનેક ચર્ચાઓ : રિદ્ધિ રાજપરાના નિર્ણયથી પાટીદાર સમાજમાં ઉઠ્યા અનેક સવાલો

મહામંત્રી અને કોર્પોરેટરની રજૂઆતથી મામલો ચર્ચામાં

મળતી વિગતો મુજબ ભાજપના મહામંત્રી વલ્લભ દૂધત્રા અને કોર્પોરેટર દિલીપ લુણાગરીયાએ સ્ટેન્ડિંગ કમિટીના ચેરમેન પરેશ પીપળીયાને રજૂઆત કરી છે. રજૂઆતમાં કટારીયા ચોકડી નજીકના રોડ-ટચ પ્લોટ પરની આવાસ યોજનાને 60 ફૂટના રોડ પર આવેલા અન્ય સ્થળે ખસેડવાની માંગ કરવામાં આવી હોવાનું જાણવા મળે છે. સાથે સાથે હાલ આવાસ માટે નિર્ધારિત પ્લોટનો હેતુફેર કરીને તેને અન્ય ઉપયોગ માટે રાખવાની પણ રજૂઆત કરવામાં આવી હોવાનું જણાવવામાં આવે છે. રજૂઆતમાં એવો મુદ્દો પણ ઉઠાવવામાં આવ્યો હોવાનું કહેવાય છે કે રોડ-ટચ અને વ્યાપારી દ્રષ્ટિએ મહત્વના પ્લોટનો અન્ય ઉપયોગ કરવામાં આવે તો કોર્પોરેશનને વધુ આવક મળી શકે. આ રજૂઆત બાદ શહેરના રાજકીય વર્તુળોમાં ચર્ચા શરૂ થઈ છે કે એક તરફ શહેરમાં આવાસની જરૂરિયાત ધરાવતા લાભાર્થીઓ માટે યોજનાઓ ઘડાઈ રહી છે, જ્યારે બીજી તરફ આવાસ માટે નક્કી કરાયેલી જમીનના ઉપયોગમાં ફેરફારની માંગ ઉઠી રહી છે. પરિણામે આવાસ યોજનાના ભવિષ્ય અંગે પણ પ્રશ્નો ઊભા થયા છે.

સ્ટેન્ડિંગ ચેરમેન પરેશ પીપળીયાનું નિવેદન

મામલે સ્ટેન્ડિંગ કમિટીના ચેરમેન પરેશ પીપળીયાએ જણાવ્યું હતું કે તેમને આ અંગે રજૂઆત મળી છે. તેમના જણાવ્યા મુજબ ગઈકાલે કેટલાક આગેવાનો દ્વારા આવાસ યોજનાને લઈને લેખિત અને મૌખિક રજૂઆત કરવામાં આવી હતી. પરેશ પીપળીયાના જણાવ્યા અનુસાર કટારીયા ચોકડી નજીકનો રોડ-ટચ પ્લોટ આવાસ યોજના માટે ફાળવવામાં આવ્યો છે, પરંતુ રજૂઆતમાં આ યોજનાને 60 ફૂટના રોડ પર આવેલા અન્ય સ્થળે ખસેડવાની માંગ કરવામાં આવી છે. સાથે સાથે હાલના પ્લોટનો હેતુફેર કરીને તેને અન્ય ઉપયોગ માટે ઉપલબ્ધ કરાવવાની દરખાસ્ત પણ કરવામાં આવી છે. તેમણે વધુમાં જણાવ્યું હતું કે રજૂઆતમાં એવો મત વ્યક્ત કરવામાં આવ્યો છે કે જો આ પ્લોટનો અન્ય ઉપયોગ કરવામાં આવે અથવા તેને વેચાણ માટે ઉપલબ્ધ કરવામાં આવે તો મહાનગરપાલિકાને સારી આવક પ્રાપ્ત થઈ શકે. જોકે આ મુદ્દે અંતિમ નિર્ણય સ્થાનિક સ્તરે થઈ શકે તેવી સ્થિતિ નથી.

આ પણ વાંચો : રાજકોટમાં 'ઘર બચાવો'ની પોકાર : વીજ અને નળ કનેક્શન કાપવા મુદ્દે ખોદેલા ખાડામાં જ સૂઈ ગયા વૃદ્ધ

હેતુફેરની સત્તા રાજ્ય સરકાર પાસે

સ્ટેન્ડિંગ ચેરમેનના જણાવ્યા મુજબ જમીનના હેતુફેરનો નિર્ણય લેવાની સત્તા ગુજરાત સરકાર પાસે છે. તેથી માત્ર રજૂઆતના આધારે તાત્કાલિક કોઈ નિર્ણય શક્ય નથી. જો હેતુફેરનો પ્રસ્તાવ આગળ વધારવો હોય તો રાજ્ય સરકાર સમક્ષ સત્તાવાર રીતે દરખાસ્ત મોકલવી પડશે અને ત્યારબાદ નિયમો અનુસાર નિર્ણય લેવામાં આવશે. આ નિવેદનથી સ્પષ્ટ થાય છે કે હાલ તબક્કે માત્ર રજૂઆત કરવામાં આવી છે અને કોઈ અંતિમ નિર્ણય લેવાયો નથી. તેમ છતાં આવાસ યોજના માટે નિર્ધારિત પ્લોટ અંગે રાજકીય સ્તરે મતભેદો સામે આવતા આગામી દિવસોમાં આ મુદ્દો વધુ ચર્ચાનો વિષય બની શકે છે. શહેરમાં આવાસ યોજનાઓ સામાન્ય રીતે આર્થિક રીતે નબળા અને મધ્યમવર્ગીય પરિવારો માટે મહત્વપૂર્ણ માનવામાં આવે છે. આવી સ્થિતિમાં યોજનાનું સ્થાન બદલવા અથવા પ્લોટનો હેતુફેર કરવા અંગેની ચર્ચા લાભાર્થીઓ અને શહેરી વિકાસ સાથે સંકળાયેલા વર્ગોમાં પણ રસનું કેન્દ્ર બની છે. હવે રાજ્ય સરકાર સમક્ષ કોઈ સત્તાવાર પ્રસ્તાવ મોકલાય છે કે નહીં અને જો મોકલાય તો તેના પર શું નિર્ણય આવે છે, તેના પર સૌની નજર રહેશે.