અમદાવાદના બાપુનગર વિસ્તારમાં મંગળવારે એક ભયંકર માર્ગ અકસ્માત સર્જાતા સમગ્ર વિસ્તારમાં ચકચાર મચી ગઈ છે. H ટ્રાફિક પોલીસ સ્ટેશન હદમાં આવેલા ગરીબનગર ચાર રસ્તા નજીક એક લક્ઝુરિયસ હેરિયર કાર બેકાબૂ બની જતાં રસ્તા પરથી પસાર થઈ રહેલા લોકો અને વાહનોને અડફેટે લીધા હતા. અકસ્માત એટલો ગંભીર હતો કે એક મહિલાનું ઘટના સ્થળે જ મોત નીપજ્યું હતું, જ્યારે અનેક લોકો ઈજાગ્રસ્ત થયા હોવાનું સામે આવ્યું છે.
આ ઘટનાના કાળજું કંપાવી દેતા CCTV ફૂટેજ પણ સામે આવ્યા છે, જેમાં ઝડપી ગતિએ આવી રહેલી કાર અચાનક નિયંત્રણ ગુમાવી રસ્તા પરના વાહનો અને રાહદારીઓ તરફ ધસી જતી જોવા મળે છે. ઘટનાના દ્રશ્યો જોઈ સ્થાનિકોમાં ભય અને ચિંતા ફેલાઈ ગઈ છે.
ચાલકને અચાનક ખેંચ આવતાં સર્જાયો અકસ્માત
પ્રાથમિક તપાસ મુજબ અકસ્માતમાં સામેલ હેરિયર કાર અજિતમિલ તરફથી બાપુનગર તરફ આવી રહી હતી. કાર ચલાવી રહેલા 40 વર્ષીય મયંકકુમાર દીપકભાઈ પટેલને અચાનક ‘વાઈની ફીટ’ અથવા ખેંચ આવતાં તેમણે સ્ટેરિંગ પરથી નિયંત્રણ ગુમાવ્યું હોવાનું પોલીસ તપાસમાં પ્રાથમિક રીતે સામે આવ્યું છે. વાહન પરનો કાબુ ગુમાવતા કાર સીધી રસ્તા પરના વાહનો અને લોકો તરફ ઘસી ગઈ હતી. અકસ્માતની તીવ્રતા એટલી વધારે હતી કે થોડા જ સેકન્ડમાં સમગ્ર વિસ્તાર અફરાતફરીના માહોલમાં ફેરવાઈ ગયો હતો. ઘટનાની જાણ થતાં જ પોલીસ અને ઇમરજન્સી સેવાઓની ટીમો તાત્કાલિક સ્થળ પર પહોંચી ગઈ હતી.
એક મહિલાનું ઘટનાસ્થળે જ મોત
આ અકસ્માતમાં રહેનુમાખાન સુફિયાનખાન પઠાણ નામની મહિલાને ગંભીર ઈજાઓ પહોંચતા તેમનું ઘટના સ્થળે જ કરૂણ મોત નીપજ્યું હતું. અકસ્માતના કારણે પરિવારજનોમાં શોકની લાગણી વ્યાપી ગઈ છે. પોલીસ દ્વારા મૃતદેહને પોસ્ટમોર્ટમ માટે મોકલી આગળની કાયદેસરની કાર્યવાહી હાથ ધરવામાં આવી છે. અકસ્માતના ચોક્કસ કારણો અને અન્ય સંજોગોની પણ તપાસ કરવામાં આવી રહી છે.
6થી 7 લોકો ઈજાગ્રસ્ત, વાહનોનો કચ્ચરઘાણ
બેકાબૂ બનેલી કારની ટક્કરમાં રસ્તા પરથી પસાર થઈ રહેલા અંદાજે 6થી 7 લોકો ઈજાગ્રસ્ત થયા હોવાનું જાણવા મળ્યું છે. અકસ્માતમાં એક રિક્ષા અને ચાર દ્વિચક્રીય વાહનોને ભારે નુકસાન પહોંચ્યું હતું. અનેક વાહનોના ફુરચા ઉડી ગયા હતા અને રસ્તા પર નુકસાનગ્રસ્ત વાહનોનો ઢગલો જોવા મળ્યો હતો. સ્થાનિક લોકો અને રાહદારીઓએ તરત જ બચાવ કામગીરી શરૂ કરી હતી. ઈજાગ્રસ્તોને બહાર કાઢીને સારવાર માટે એમ્બ્યુલન્સ મારફતે નજીકની સિવિલ હોસ્પિટલ ખાતે ખસેડવામાં આવ્યા હતા. હોસ્પિટલ સૂત્રોના જણાવ્યા મુજબ કેટલાક ઈજાગ્રસ્તોને નાની-મોટી ઈજાઓ પહોંચી છે, જ્યારે કેટલાકની સ્થિતિ અંગે તબીબી દેખરેખ રાખવામાં આવી રહી છે.
આ પણ વાંચો: તલાક...તલાક...તલાક : વડોદરામાં નોકરીના સ્થળે પત્નીને જાહેરમાં ‘ત્રિપલ તલાક’ આપ્યાનો આક્ષેપ, પોલીસ ફરિયાદ નોંધાઈ
CCTV ફૂટેજ બન્યા તપાસનો મહત્વનો આધાર
ઘટનાના CCTV ફૂટેજ પોલીસ માટે મહત્વનો પુરાવો સાબિત થઈ શકે છે. ફૂટેજના આધારે અકસ્માતની સમગ્ર ઘટનાક્રમની તપાસ કરવામાં આવી રહી છે. પ્રાથમિક રીતે ચાલકને અચાનક તબીબી સમસ્યા સર્જાતા અકસ્માત થયો હોવાનું માનવામાં આવી રહ્યું છે, પરંતુ પોલીસ તમામ પાસાઓની તપાસ કરી રહી છે. આ અકસ્માતે ફરી એક વખત માર્ગ સુરક્ષા અને વાહન ચલાવતી વખતે તબીબી સ્થિતિ અંગે જાગૃતિની જરૂરિયાતને ઉજાગર કરી છે. જો કોઈ વ્યક્તિ ગંભીર તબીબી સમસ્યાથી પીડિત હોય તો વાહન ચલાવતી વખતે વિશેષ સાવચેતી રાખવી જરૂરી હોવાનું નિષ્ણાતો માને છે. શહેરના વ્યસ્ત વિસ્તારમાં બનેલી આ ઘટનાએ સ્થાનિકોમાં ભારે ચિંતા ઊભી કરી છે. પોલીસ દ્વારા અકસ્માત સંબંધિત વધુ વિગતો એકત્રિત કરવામાં આવી રહી છે અને તપાસ પૂર્ણ થયા બાદ વધુ માહિતી જાહેર કરવામાં આવશે.
