અમદાવાદ: ગુજરાતમાં ખરીફ સીઝનની શરૂઆત સાથે ખેડૂતોને વધુ સુવિધા અને સમયસર સિંચાઈ મળી રહે તે માટે મુખ્યમંત્રી ભુપેન્દ્ર પટેલે મહત્વપૂર્ણ ખેડૂતલક્ષી નિર્ણયો જાહેર કર્યા છે. રાજ્ય સરકારના આ નિર્ણયોથી ખાસ કરીને નાના અને મધ્યમ ખેડૂતોને ખેતી આયોજનમાં મોટી મદદ મળશે. કૃષિ ઉત્પાદન વધારવા, સિંચાઈની સુવિધા મજબૂત બનાવવા અને વીજ પુરવઠાને વધુ અસરકારક બનાવવા રાજ્ય સરકારે ત્રણ મહત્વપૂર્ણ પગલાં લીધા છે.
રાજ્ય સરકારના નિર્ણય મુજબ હવે કૃષિ વિષયક ફીડરો પર ખેડૂતોને અગાઉ મળતા 8 કલાકના વીજ પુરવઠાના બદલે સતત 10 કલાક વીજળી આપવામાં આવશે. ખરીફ સીઝન દરમિયાન વરસાદની અનિશ્ચિતતા અને પાક માટે જરૂરી સિંચાઈને ધ્યાનમાં રાખીને લેવામાં આવેલો આ નિર્ણય ખેડૂતો માટે અત્યંત મહત્વપૂર્ણ માનવામાં આવે છે. વીજળીના વધારાના બે કલાકના પુરવઠાથી ખેડૂતોને ખેતરોમાં વધુ અસરકારક રીતે પાણી આપી શકાશે તેમજ સિંચાઈનું આયોજન પણ સરળ બનશે.
ખેતી ખર્ચ અને ઉત્પાદન બંને પર પડશે સકારાત્મક અસર
ખેડૂતો માટે વીજ પુરવઠો ખેતીનો એક મહત્વપૂર્ણ આધારસ્તંભ છે. ખાસ કરીને બોરવેલ અને ટ્યુબવેલ આધારિત સિંચાઈ કરતા ખેડૂતો માટે વીજળીની ઉપલબ્ધતા સીધી રીતે ઉત્પાદન સાથે જોડાયેલી છે. રાજ્ય સરકારના આ નિર્ણયથી ખેડૂતોને સિંચાઈ માટે વધારાનો સમય મળશે, જેના કારણે પાકના વિકાસમાં સુધારો થવાની શક્યતા છે.
કૃષિ નિષ્ણાતોનું માનવું છે કે ખરીફ સીઝન દરમિયાન વાવણી બાદના પ્રારંભિક તબક્કામાં પાકને સમયસર પાણી મળવું અત્યંત જરૂરી હોય છે. વીજ પુરવઠામાં વધારો થવાથી ખેડૂતોને રાત્રિના અનુકૂળ સમયગાળામાં પણ સરળતાથી સિંચાઈ કરી શકાશે. પરિણામે ડીઝલ પંપ જેવા વૈકલ્પિક અને ખર્ચાળ સાધનો પરની નિર્ભરતા પણ ઘટી શકે છે.
આ પણ વાંચો: ‘પહેલાં જેવો ઉત્સાહ હવે નથી’ : અમદાવાદમાં Re-NEET પરીક્ષા માટે પરીક્ષાર્થીઓમાં આશા અને અસમંજસ
નર્મદા કમાન્ડ એરિયામાં નાના ખેડૂતોને મોટી રાહત
મુખ્યમંત્રી દ્વારા લેવામાં આવેલા બીજા મહત્વપૂર્ણ નિર્ણય હેઠળ નર્મદા કમાન્ડ એરિયાના તળાવો ભરવાની મર્યાદા 3 કિલોમીટરમાંથી વધારીને 7 કિલોમીટર કરવામાં આવી છે. આ નિર્ણયનો સીધો લાભ એવા વિસ્તારોને મળશે જ્યાં નાના ખેડૂતો ખેતી માટે સ્થાનિક જળાશયો અને તળાવો પર આધાર રાખે છે.
અગાઉ નર્મદા કેનાલમાંથી નિર્ધારિત અંતર સુધી જ તળાવો ભરવાની મંજૂરી હતી, જેના કારણે અનેક ગામોના ખેડૂતોને પૂરતું પાણી મળવામાં મુશ્કેલી પડતી હતી. હવે મર્યાદા વધારાતા વધુ સંખ્યામાં તળાવો પાણીથી ભરાઈ શકશે અને સિંચાઈ માટે પાણીની ઉપલબ્ધતા વધશે.
સરકારના આ પગલાથી ભૂગર્ભ જળસ્તરમાં સુધારો થવાની પણ સંભાવના છે. તળાવો ભરાવાથી આસપાસના વિસ્તારોમાં પાણીનો સંગ્રહ વધશે, જે લાંબા ગાળે કૃષિ અને પીવાના પાણી બંને માટે લાભદાયક બની શકે છે. ખાસ કરીને વરસાદ પર નિર્ભર વિસ્તારોમાં આ નિર્ણય ખેડૂતો માટે આશીર્વાદરૂપ સાબિત થઈ શકે છે.
આ પણ વાંચો: મુંડન કરાવ્યું... બેસણું રાખ્યું... : મોરબીમાં વીજપોલ વળતર મુદ્દે ખેડૂતોનો અનોખો વિરોધ
ઊર્જા કંપનીઓને ખાસ સૂચના
ખેડૂતોને જરૂરી સમયે અને માંગ મુજબ વીજળી મળી રહે તે માટે રાજ્ય સરકારે તમામ ઊર્જા કંપનીઓને આગામી એક મહિના સુધી સંપૂર્ણ સજ્જ અને સક્રિય રહેવા સૂચના આપી છે. મુખ્યમંત્રીના નિર્દેશ અનુસાર ખેડૂતોને ઓન-ડીમાન્ડ વીજ પુરવઠો પૂરો પાડવામાં કોઈ પ્રકારની વિલંબ કે મુશ્કેલી ન સર્જાય તે માટે વિશેષ વ્યવસ્થા કરવામાં આવશે.
વીજ વિતરણ નેટવર્કમાં કોઈ ખામી સર્જાય તો તેનું ઝડપી નિરાકરણ લાવવા, ટ્રાન્સફોર્મર અને લાઈન સંબંધિત સમસ્યાઓનો તાત્કાલિક ઉકેલ લાવવા તેમજ ગ્રામ્ય વિસ્તારોમાં સતત મોનીટરીંગ રાખવા માટે પણ સૂચનાઓ આપવામાં આવી હોવાનું જાણવા મળે છે.
રાજ્ય સરકારનું માનવું છે કે ખરીફ સીઝન દરમિયાન વીજળી અને પાણીની ઉપલબ્ધતા સુનિશ્ચિત કરવાથી ખેડૂતોને પાક ઉત્પાદન વધારવામાં મદદ મળશે અને કૃષિ અર્થતંત્રને પણ મજબૂતી મળશે. છેલ્લા કેટલાક વર્ષોમાં ગુજરાત સરકારે કૃષિ ક્ષેત્રમાં ટેકનોલોજી, સિંચાઈ અને ઊર્જા સંબંધિત વિવિધ સુધારાત્મક પગલાં લીધા છે, જેના પરિણામે કૃષિ વિકાસદર જાળવી રાખવામાં સફળતા મળી છે.
આ પણ વાંચો: રાજકોટમાં યોગ દિવસની અનોખી ઉજવણી : સ્વિમિંગ પૂલમાં યોજાયો મ્યુઝિકલ ‘એક્વા યોગા’, 157 લોકોએ લીધો ભા
ખેડૂતોમાં ખુશીની લાગણી
રાજ્ય સરકારના આ નિર્ણયો સામે ખેડૂતોમાં સકારાત્મક પ્રતિસાદ જોવા મળી રહ્યો છે. ખરીફ પાક માટે વાવણીની પ્રક્રિયા ચાલી રહી છે ત્યારે વધારાનો વીજ પુરવઠો અને પાણીની ઉપલબ્ધતા ખેડૂતો માટે મહત્વપૂર્ણ સહારો સાબિત થશે. નાના ખેડૂતોને ખાસ લાભ પહોંચાડવાના ઉદ્દેશ સાથે લેવામાં આવેલા પગલાં ગ્રામ્ય અર્થતંત્રને પણ મજબૂત બનાવશે એવી અપેક્ષા વ્યક્ત કરવામાં આવી રહી છે. ખરીફ સીઝન દરમિયાન ખેતી માટે જરૂરી મૂળભૂત સુવિધાઓ સુનિશ્ચિત કરવાની દિશામાં રાજ્ય સરકારના આ નિર્ણયો ખેડૂતોને વધુ સક્ષમ બનાવશે અને પાક ઉત્પાદન વધારવા માટે અનુકૂળ વાતાવરણ ઊભું કરશે.
