ગીર સોમનાથ: તાજેતરમાં ભારતીય જનતા પાર્ટી (ભાજપ) તરફથી રાજ્યસભા માટે બિનહરીફ ચૂંટાયેલા સાંસદ માનસિંહ પરમારનું એક નિવેદન રાજકીય વર્તુળોમાં ચર્ચાનો વિષય બન્યું છે. ગીર સોમનાથ જિલ્લાના પ્રાંચી ખાતે આયોજિત સત્કાર સમારોહમાં સંબોધન દરમિયાન તેમણે પોતાના રાજકીય જીવનના સંઘર્ષની વાત કરતાં કહ્યું કે તેઓ કોઈ "લોટરી" કે "મેળ"થી રાજ્યસભા સુધી પહોંચ્યા નથી, પરંતુ તેના પાછળ 25 વર્ષનું સતત પરિશ્રમ અને સંગઠન માટેનું સમર્પણ છે.
સત્કાર સમારોહમાં સંબોધન દરમિયાન માનસિંહ પરમારે જણાવ્યું કે રાજ્યસભામાં તેમની પસંદગી બાદ અનેક લોકો તેમને કહેતા હતા કે તેમને 'લોટરી લાગી ગઈ' અથવા 'મેળ પડી ગયો'. આ પ્રકારની ટિપ્પણીઓનો ઉલ્લેખ કરતાં તેમણે સ્પષ્ટ શબ્દોમાં કહ્યું કે તેમની સફળતા અચાનક મળેલી નથી. તેમણે ભારપૂર્વક જણાવ્યું કે વર્ષો સુધી સંગઠન માટે કામ કર્યા બાદ જ તેઓ આ સ્થાન સુધી પહોંચ્યા છે.
આ પણ વાંચો: ખરીફ સીઝન પહેલાં ખેડૂતોને ગુજરાત સરકારની મોટી ભેટ : હવે 10 કલાક મળશે વીજળી, તળાવો ભરવાની મર્યાદા પણ વધારાઈ
'મારો મેળ નથી પડ્યો, મેં સંઘર્ષ કર્યો છે'
માનસિંહ પરમારે પોતાના સંબોધનમાં કહ્યું કે કેટલાક લોકો તેમની રાજકીય સફળતાને નસીબ સાથે જોડે છે, પરંતુ તેઓ તેને સ્વીકારતા નથી. તેમણે કહ્યું, 'મને લોકો કહેતા કે લોટરી લાગી, મેળ પડી ગયો. પરંતુ મારો મેળ નથી પડ્યો. મેં સંઘર્ષ કર્યો છે, મહેનત કરી છે અને મારી જિંદગીના 25 વર્ષ પાર્ટી અને સંગઠનને આપ્યા છે. ત્યાર બાદ હું અહીં પહોંચ્યો છું.'
તેમણે વધુમાં કેટલાક રાષ્ટ્રીય રાજકીય નેતાઓનો ઉલ્લેખ કરતાં કહ્યું કે રાજકારણમાં દરેકની સફર અલગ હોય છે. પોતાના સંદર્ભમાં તેમણે સ્પષ્ટ કર્યું કે તેઓ કાર્યકર્તા તરીકે નીચલા સ્તરેથી આગળ વધીને આ સ્થાન સુધી પહોંચ્યા છે. આ નિવેદન દરમિયાન તેમના ભાષણમાં કાર્યકર્તા જીવનની ઝલક સ્પષ્ટ જોવા મળી હતી. તેમણે જણાવ્યું કે સંગઠનમાં વર્ષો સુધી સક્રિય રહીને વિવિધ જવાબદારીઓ નિભાવી છે અને દરેક તબક્કે સતત મહેનત કરી છે.
આ પણ વાંચો: ‘પહેલાં જેવો ઉત્સાહ હવે નથી’ : અમદાવાદમાં Re-NEET પરીક્ષા માટે પરીક્ષાર્થીઓમાં આશા અને અસમંજસ
'બળદની જેમ કામ કર્યું છે અને કરતો રહીશ'
ભાષણ દરમિયાન માનસિંહ પરમારે પોતાના કાર્યશૈલીનું વર્ણન અનોખી રીતે કર્યું. તેમણે કહ્યું કે એક કાર્યકર્તા તરીકે તેમણે "બળદની જેમ" કામ કર્યું છે અને ભવિષ્યમાં પણ પાર્ટી માટે એ જ સમર્પણ સાથે કાર્ય કરતા રહેશે. તેમણે જણાવ્યું કે ભાજપમાં જવાબદારીઓ અને પદો લાંબા સમયના કાર્ય, સમર્પણ અને સંગઠન પ્રત્યેની નિષ્ઠાના આધારે મળે છે. વર્ષો સુધી મેદાનમાં રહીને કાર્ય કરનારાઓને જ સંગઠનમાં આગળ વધવાની તક મળે છે, એવો સંદેશ પણ તેમણે પોતાના સંબોધન દ્વારા આપવાનો પ્રયાસ કર્યો હતો. માનસિંહ પરમારના આ નિવેદનને હાજર કાર્યકર્તાઓએ તાળીઓના ગડગડાટ સાથે વધાવ્યું હતું. રાજકીય વિશ્લેષકોનું માનવું છે કે તેમના આ નિવેદન દ્વારા તેમણે સંગઠનમાં લાંબા ગાળાના કાર્ય અને સમર્પણના મહત્વ પર ભાર મૂક્યો છે.
કેમિકલ એન્જિનિયરથી રાજ્યસભા સુધીની સફર
માનસિંહ પરમારે પોતાના ભાષણમાં વ્યક્તિગત જીવન અને રાજકીય કારકિર્દીની શરૂઆત વિશે પણ વાત કરી હતી. વ્યવસાયે કેમિકલ એન્જિનિયર રહેલા માનસિંહે જણાવ્યું કે વિદ્યાર્થી જીવન દરમિયાન તેઓ અખિલ ભારતીય વિદ્યાર્થી પરિષદ (ABVP)ના સંપર્કમાં આવ્યા હતા. નિરમા યુનિવર્સિટીમાં અભ્યાસ દરમિયાન એક મિત્ર મારફતે તેઓ વિદ્યાર્થી સંગઠન સાથે જોડાયા અને ત્યાંથી તેમની જાહેર જીવનની સફર શરૂ થઈ. પછી તેઓ ભાજપ યુવા મોરચા સાથે જોડાયા અને સંગઠનમાં વિવિધ જવાબદારીઓ નિભાવતા આગળ વધ્યા. સમય જતાં તેમણે પક્ષના વિવિધ સ્તરે કામ કરીને પોતાની આગવી ઓળખ ઉભી કરી હતી.
રસપ્રદ વાત એ છે કે રાજકારણમાં પ્રવેશ કરતા પહેલાં તેમનું સપનું ક્રિકેટર બનવાનું હતું. તેમણે જણાવ્યું કે ક્રિકેટ પ્રત્યે તેમને વિશેષ લગાવ હતો અને કારકિર્દી બનાવવા માટે વડોદરાની કિરણ મોરે ક્રિકેટ એકેડમીમાં તાલીમ પણ લીધી હતી. જોકે સમય જતાં તેમની રસ જાહેર જીવન અને સંગઠનાત્મક કાર્ય તરફ વધ્યો અને તેમણે રાજકારણને પોતાની કારકિર્દી તરીકે પસંદ કર્યું.
આ પણ વાંચો: મુંડન કરાવ્યું... બેસણું રાખ્યું... : મોરબીમાં વીજપોલ વળતર મુદ્દે ખેડૂતોનો અનોખો વિરોધ
રાજ્યસભાની પસંદગી બાદ વધ્યું રાજકીય મહત્વ
તાજેતરમાં ભાજપના ચાર ઉમેદવારો રાજ્યસભા માટે બિનહરીફ ચૂંટાઈ આવ્યા હતા, જેમાં માનસિંહ પરમારનો પણ સમાવેશ થાય છે. તેમની પસંદગી બાદ સૌરાષ્ટ્ર અને ઉત્તર ગુજરાતના રાજકીય વર્તુળોમાં તેમની ભૂમિકાને લઈને વિશેષ ચર્ચા ચાલી રહી છે.
પ્રાંચી ખાતેના કાર્યક્રમમાં આપેલા તેમના નિવેદનથી સ્પષ્ટ થાય છે કે તેઓ પોતાની રાજકીય સફરને સંઘર્ષ, સંગઠન અને સતત મહેનત સાથે જોડીને જુએ છે. "લોટરી" અથવા "મેળ" જેવા શબ્દો સામે તેમની પ્રતિક્રિયા પણ એ જ સંદેશ આપે છે કે તેઓ પોતાની સફળતાને વર્ષોની મહેનતનું પરિણામ માને છે.
