વડોદરા શહેરના સોમા તળાવ વિસ્તારમાં આવેલી વુડા આવાસ યોજનામાં માનવતાને શરમાવે તેવી ઘટના સામે આવતા વિસ્તારમાં ભારે ચકચાર મચી ગઈ છે. પરિવારના જ સભ્ય દ્વારા સાત વર્ષની નિર્દોષ બાળકી સાથે અયોગ્ય વર્તન કરવામાં આવ્યું હોવાનો આક્ષેપ સામે આવ્યો છે. બાળકીની માતાએ પોતાના સસરા સામે પોલીસમાં ફરિયાદ નોંધાવતા પોલીસે આરોપી વિરુદ્ધ પોક્સો એક્ટ હેઠળ ગુનો નોંધી તપાસ શરૂ કરી છે.
મળતી માહિતી મુજબ, સોમા તળાવ વિસ્તારમાં આવેલા વુડા આવાસ યોજનામાં રહેતા એક પરિવારમાં ગઈકાલે રાત્રિના સમયે આ ઘટના બની હતી. આરોપી દાદા પોતાની સાત વર્ષની પૌત્રીને પોતાના રૂમમાં લઈ ગયા હતા. ત્યાં જઈ બાળકી સાથે અયોગ્ય રીતે સ્પર્શ કરી શારીરિક અડપલા કર્યા હોવાનો ગંભીર આક્ષેપ સામે આવ્યો છે. બાળકીને આ ઘટના સમજાતાં તેણે પરિવારના અન્ય સભ્યોને જાણ કરી હતી.
બાળકી દ્વારા માતાને સમગ્ર ઘટના જણાવતા પરિવારજનો પણ સ્તબ્ધ થઈ ગયા હતા. મામલો ગંભીર બનતા બાળકીની માતાએ તાત્કાલિક પોલીસનો સંપર્ક કર્યો હતો અને પોતાના સસરા સામે સત્તાવાર ફરિયાદ નોંધાવી હતી. ફરિયાદના આધારે કપૂરાઈ પોલીસ સ્ટેશનમાં આરોપી દાદા સામે છેડતી તેમજ પોક્સો એક્ટ હેઠળ ગુનો નોંધવામાં આવ્યો છે.
ઘટનાની જાણ થતાં જ પોલીસ હરકતમાં આવી હતી અને આરોપી સામે કાયદેસરની કાર્યવાહી હાથ ધરી છે. સાથે જ બાળકીના નિવેદન સહિત અન્ય જરૂરી પ્રક્રિયા હાથ ધરવામાં આવી રહી છે. આ બનાવ સામે આવતા સમગ્ર વિસ્તારમાં ભારે આક્રોશ જોવા મળી રહ્યો છે.
સમાજમાં પરિવાર જ બાળક માટે સૌથી સુરક્ષિત જગ્યા માનવામાં આવે છે, ત્યારે આવા બનાવો સમાજ માટે ચિંતાજનક માનવામાં આવી રહ્યા છે. હાલ કપૂરાઈ પોલીસ દ્વારા સમગ્ર મામલે વધુ તપાસ હાથ ધરવામાં આવી રહી છે અને આરોપી સામે કડક કાર્યવાહી કરવામાં આવશે તેવું પોલીસ સૂત્રોએ જણાવ્યું છે.
