ભારતીય ટેલિકોમ માર્કેટમાં Reliance Jio, Airtel અને Vodafone Idea (Vi) વચ્ચે ચાલી રહેલી 5G પ્રતિસ્પર્ધામાં કોણ શ્રેષ્ઠ છે તેની વિગતો એક તાજા રિપોર્ટમાં સામે આવી છે. Opensignal દ્વારા જાહેર કરવામાં આવેલા નવા આંકડાઓ મુજબ 5G સર્વિસ પૂરી પાડવામાં અને ડાઉનલોડ સ્પીડના મામલે Jio એ તમામ હરીફ કંપનીઓને પાછળ છોડી દીધી છે. 1 September થી 30 November દરમિયાન એકત્રિત કરવામાં આવેલા ડેટા દર્શાવે છે કે 5G ટેકનોલોજીના આગમનથી ભારતમાં ઇન્ટરનેટ ડાઉનલોડ સ્પીડમાં અનેકગણો વધારો થયો છે.
સ્પીડના મામલે Jio નું વર્ચસ્વ
રિપોર્ટ અનુસાર સપ્ટેમ્બરથી નવેમ્બરના ગાળામાં Jio ની સરેરાશ 5G ડાઉનલોડ સ્પીડ 199.7 Mbps નોંધાઈ હતી જે તેના 4G નેટવર્ક કરતા 11 ગણી વધારે છે. બીજી તરફ Airtel ની 5G ડાઉનલોડ સ્પીડ 187.2 Mbps રહી હતી જે તેના 4G નેટવર્કની સરખામણીએ 7 ગણી વધુ છે. જ્યારે Vi ની સ્પીડ 138.1 Mbps સુધી પહોંચી હતી જે તેના 4G નેટવર્ક કરતા 6 ગણી વધારે છે. આ રિપોર્ટમાં એ પણ સ્પષ્ટ કરવામાં આવ્યું છે કે 5G નેટવર્કના કારણે યુઝર્સને ઇન્ટરનેટ વપરાશમાં ઓછા અવરોધોનો સામનો કરવો પડ્યો છે.
નેટવર્ક એફિશિયન્સી અને પ્રાપ્યતા
Opensignal એ આ વખતે 'Time on 5G' નામના નવા મેટ્રિક્સના આધારે પણ કંપનીઓની ક્ષમતા ચકાસી હતી. આ મેટ્રિક્સ એ દર્શાવે છે કે 5G યુઝર્સ કેટલો સમય 5G નેટવર્ક સાથે જોડાયેલા રહે છે. આમાં પણ Jio ની 5G Availability 68.1 ટકા રહી હતી અને ગ્રાહકોએ કુલ સમયના 67.3 ટકા સમય 5G નેટવર્ક પર વિતાવ્યો હતો. તેની સામે Airtel ની પ્રાપ્યતા 66.6 ટકા રહી હતી પરંતુ તેના યુઝર્સ માત્ર 28 ટકા સમય જ 5G પર રહી શક્યા હતા. Vi અત્યારે પોતાની સર્વિસ રોલઆઉટ કરી રહ્યું હોવાથી તેની પ્રાપ્યતા 32.5 ટકા નોંધાઈ હતી.
BSNLની 5G સર્વિસ અંગેની સ્થિતિ
સરકારી ટેલિકોમ કંપની BSNL ના ગ્રાહકો હજુ પણ 5G ની રાહ જોઈ રહ્યા છે. કંપની હાલમાં પોતાના 4G નેટવર્કને મજબૂત કરી રહી છે. અત્યાર સુધીમાં BSNL દ્વારા 97,000 જેટલી 4G સાઇટ્સ તૈયાર કરવામાં આવી છે અને આગામી સમયમાં વધુ 23,000 સાઇટ્સ સક્રિય કરવામાં આવશે. એકવાર 4G કવરેજનું લક્ષ્યાંક પૂર્ણ થયા બાદ કંપની સત્તાવાર રીતે 5G સર્વિસ લોન્ચ કરવાની દિશામાં આગળ વધશે. આમ ખાનગી કંપનીઓની સરખામણીએ BSNL અત્યારે ઈન્ફ્રાસ્ટ્રક્ચર મજબૂત કરવા પર ધ્યાન આપી રહ્યું છે.
