DRAM: જો તમે નવા વર્ષમાં નવો સ્માર્ટફોન કે લેપટોપ વગેરે ખરીદવાનું વિચારી રહ્યા છો, તો તમારે વધુ કિંમત ચૂકવવા માટે તૈયાર રહેવું પડશે. મેમરી ચિપ્સના ભાવ છેલ્લા કેટલાક સમયથી વધી રહ્યા છે અને તેની અસર ડાયનેમિક રેન્ડમ એક્સેસ મેમરી (DRAM) નો ઉપયોગ કરતા પ્રોડક્ટસ પર થવા લાગી છે. ડેલ, આસુસ, લેનોવો અને એચપી જેવી કંપનીઓએ તૈયારીઓ શરૂ કરી દીધી છે. જાણો સંપૂર્ણ માહિતી.
મેમરી ચિપની અછત થઈ શકે છે
રિપોર્ટ્સ અનુસાર, ડેલ, એચપી અને કમ્પ્યુટિંગ ક્ષેત્રમાં કામ કરતી અન્ય કંપનીઓનું કહેવું છે કે, 2026 માં મેમરી ચિપ્સની અછત સર્જાઈ શકે છે. આના કારણે, ડેસ્કટોપ, લેપટોપ અને સ્માર્ટફોન વગેરે જેવી મેમરી ચિપ્સનો ઉપયોગ કરતી પ્રોડક્ટ્સના ભાવમાં વધારો થવાની શક્યતા છે. ખરેખર, કેટલીક કંપનીઓ મેમરી પ્રોડક્ટ કેટેગરીમાંથી બહાર નીકળી રહી છે, જેના કારણે તેમાં ઘટાડો થવાની ધારણા છે. માઈક્રોન એક એવી જ કંપની છે જેને કહ્યું છે કે, તે ગ્રાહક મેમરી પ્રોડક્ટસ બનાવવાનું બંધ કરશે અને ફક્ત હાઇ-પાવર્ડ AI ચિપ્સ બનાવશે.
AI ની વધતી માંગ પણ એક મુખ્ય પરિબળ છે
ગ્રાહક મેમરી ચિપ્સની અછત પાછળનું એક મુખ્ય કારણ AI ની વધતી માંગ છે. હવે કંપનીઓ AI એન્ટરપ્રાઇઝ કંપનીઓની માંગને પહોંચી વળવા પર વધુ ધ્યાન કેન્દ્રિત કરી રહી છે, જેના કારણે સ્માર્ટફોન અને અન્ય ડિવાઇસેસ માટે ચિપ્સની અછત છે.
આનાથી ગ્રાહકો પર અસર પડશે
મેમરી ચિપ્સની અછત ગ્રાહકો પર અસર કરશે અને તેમને પ્રોડક્ટસ માટે વધુ ચૂકવણી કરવી પડશે. ખરેખર, હવે કંપનીઓએ ચિપ્સ ખરીદવા માટે વધુ ખર્ચ કરવો પડશે અને તેઓ તેનો બોજ ગ્રાહકો પર નાખશે. ડેલના ચીફ ઓપરેટિંગ ઓફિસર જેફ ક્લાર્ક કહે છે કે, તેમણે ક્યારેય ચિપના ભાવ આટલી ઝડપથી વધતા જોયા નથી. આના કારણે, બધા પ્રોડક્ટસ વધુ મોંઘા થશે. ડેલનું કહેવું છે કે, તેના પ્રોડક્ટસના ભાવ 15-20 ટકા વધી શકે છે.
