ટેક જાયન્ટ એલોન મસ્ક હવે પૃથ્વી પછી અંતરિક્ષ પર પોતાનું વર્ચસ્વ જમાવવાની તૈયારી કરી રહ્યા છે. સેટેલાઇટ ઇન્ટરનેટ (Starlink) દ્વારા વિશ્વને જોડ્યા બાદ, હવે SpaceX અંતરિક્ષમાં વિશાળ ડેટા સેન્ટર્સનું નેટવર્ક સ્થાપવા માંગે છે. આ મહત્વકાંક્ષી પ્રોજેક્ટ માટે SpaceX એ અમેરિકન રેગ્યુલેટર FCC (Federal Communications Commission) સમક્ષ 10 લાખ સેટેલાઇટ લોન્ચ કરવાની પરવાનગી માંગી છે. જો આ મિશન સફળ રહેશે તો ડેટા સ્ટોરેજ અને આર્ટિફિશિયલ ઇન્ટેલિજન્સ (AI) ની દુનિયામાં ક્રાંતિ આવી જશે.
વીજળી અને પાણીની સમસ્યાનો અંત
પૃથ્વી પર મોટા ડેટા સેન્ટર્સ ચલાવવા માટે અબજો લિટર પાણી અને અવિરત વીજળીની જરૂર પડે છે, જે પર્યાવરણ માટે મોટો પડકાર છે. મસ્કનો પ્લાન આ સમસ્યાનો કાયમી ઉકેલ આપે છે. અંતરિક્ષમાં સ્થાપિત થનારા આ ડેટા સેન્ટર્સ સીધા સૂર્યપ્રકાશમાંથી અખૂટ સૌર ઉર્જા મેળવશે. ત્યાં ઠંડક માટે પાણીની જરૂર નહીં પડે કારણ કે અંતરિક્ષનું તાપમાન કુદરતી રીતે જ સર્વર્સને ઠંડુ રાખવામાં મદદરૂપ થશે. આનાથી ડેટા પ્રોસેસિંગનો ખર્ચ અત્યંત ઓછો થઈ જશે.
10 લાખ સેટેલાઇટ અને Starshipનો સાથ
હાલમાં અવકાશમાં અંદાજે 15,000 સક્રિય સેટેલાઇટ છે, તેની સામે મસ્કની 10 લાખ સેટેલાઇટની માંગણીએ સમગ્ર વિશ્વને ચોંકાવી દીધું છે. આ વિશાળ નેટવર્કને અંતરિક્ષમાં પહોંચાડવા માટે મસ્ક SpaceX ના સૌથી શક્તિશાળી રોકેટ Starship નો ઉપયોગ કરશે. Starship ની ક્ષમતા લાખો ટન વજન વહન કરવાની છે, જે આ 'ઓર્બિટલ સુપર કોમ્પ્યુટર' ના સપનાને સાકાર કરવામાં પાયાની ભૂમિકા ભજવશે.
xAI અને SpaceX ના જોડાણના સંકેત
રિપોર્ટ્સ અનુસાર, એલોન મસ્ક પોતાની AI કંપની xAI અને SpaceX ના વિલીનીકરણ (Merger) પર પણ વિચાર કરી રહ્યા છે. આ વર્ષના અંત સુધીમાં SpaceX નો IPO આવવાની પણ શક્યતા છે. મસ્કનો ઉદ્દેશ્ય એક એવું સંકલિત નેટવર્ક બનાવવાનો છે જ્યાં તેમનું પોતાનું સેટેલાઇટ નેટવર્ક હોય અને પોતાનું AI (Grok) પ્રોસેસિંગ યુનિટ હોય. આ પગલાથી તેઓ Google, Meta અને OpenAI જેવી દિગ્ગજ કંપનીઓને સીધી ટક્કર આપશે. અંતરિક્ષમાં ડેટા પ્રોસેસિંગ થવાથી ડેટા ટ્રાન્સફરની સ્પીડ પણ અનેકગણી વધી જશે.
