મિડલ ઈસ્ટમાં ચાલી રહેલા યુદ્ધને એક મહિનાથી વધુ સમય વીતી ચૂક્યો છે. આ દરમિયાન ટ્રમ્પના હુમલા અને સીઝફાયર અંગેના વારંવાર બદલાતા નિવેદનોને કારણે વિશ્વભરમાં તેમની મજાક ઉડી રહી છે. આની નકારાત્મક અસર અમેરિકાની છબી પર પણ પડી રહી છે. હવે લોકોએ ટ્રમ્પની વાતો અને દાવાઓને ગંભીરતાથી લેવાનું બંધ કરી દીધું છે. ઈરાન સાથેના તણાવ વચ્ચે ટ્રમ્પ ઘણી વખત પોતાની વાતથી ફરી ગયા છે, જેના કારણે હવે તેમને વિદેશોની સાથે સાથે પોતાના જ દેશના નેતાઓ અને જનતાના રોષનો ભોગ બનવું પડી રહ્યું છે. અમેરિકી નેતાઓએ તો ત્યાં સુધી કહી દીધું છે કે ટ્રમ્પ એક 'પાગલ અને ખતરનાક' માણસ છે.
અમેરિકી નેતાઓના આકરા પ્રહારો
ટ્રમ્પના વલણ સામે અમેરિકાના રાજકીય ગલિયારાઓમાં ભારે વિરોધ જોવા મળી રહ્યો છે. તેમણે જણાવ્યું કે રાષ્ટ્રપતિ ટ્રમ્પ ઈરાન પર સ્ટ્રાઈકનો આદેશ આપીને સંપૂર્ણપણે નિષ્ફળ રહ્યા છે. તેમણે ટ્રમ્પને ઈતિહાસના એકમાત્ર એવા રાષ્ટ્રપતિ ગણાવ્યા જેમણે એકલા હાથે યુદ્ધ શરૂ કર્યું અને હારી ગયા. સેન્ડર્સે ટ્રમ્પની સોશિયલ મીડિયા પોસ્ટ્સ પર આકરી પ્રતિક્રિયા આપતા તેને 'માનસિક રીતે અસંતુલિત વ્યક્તિની બકવાસ' ગણાવી છે.
તેમણે કહ્યું કે ઈરાન યુદ્ધના એક મહિના બાદ ઈસ્ટર સન્ડે પર રાષ્ટ્રપતિનું આવું નિવેદન આઘાતજનક છે. હવે કોંગ્રેસે એક્શન લેવું પડશે અને આ યુદ્ધનો અંત લાવવો પડશે. ટ્રમ્પના પૂર્વ સહયોગી રહી ચૂકેલા ગ્રીને ટ્રમ્પ વહીવટીતંત્રના સભ્યોને ચેતવણી આપી છે કે તેઓ ભગવાન પાસે માફી માંગે અને ટ્રમ્પની પૂજા કરવાનું બંધ કરે. તેમણે સ્પષ્ટ શબ્દોમાં કહ્યું કે ટ્રમ્પ પાગલ થઈ ગયા છે.
'યુદ્ધ ગુનાની ધમકી અને ઘટતી શાખ'
ડેમોક્રેટિક લીડર અને સીનેટર ચક શૂમરે પણ ટ્રમ્પની ટીકા કરતા કહ્યું કે, તેઓ સોશિયલ મીડિયા પર એક પાગલ માણસની જેમ બકવાસ કરી રહ્યા છે, યુદ્ધ ગુનાઓની ધમકી આપી રહ્યા છે અને અમેરિકાના મિત્ર દેશોને પોતાનાથી દૂર કરી રહ્યા છે. તેવી જ રીતે, હાઉસ ફોરેન અફેર્સ કમિટીના ચેરમેન ગ્રેગરી મીક્સે જણાવ્યું હતું કે ટ્રમ્પની ભાષા અત્યંત ગંદી અને અતાર્કિક હતી. આ કોઈ તાકાતનું પ્રદર્શન નથી, પરંતુ તેનાથી ખોટી ગેરસમજ ઉભી થવાનું જોખમ વધે છે અને આંતરરાષ્ટ્રીય સ્તરે અમેરિકાની વિશ્વસનીયતા ઘટે છે.
આ પણ વાંચો: ચીનમાં કંઈક મોટું થવાનું છે! : 40 દિવસ માટે કેમ બંધ કરવામાં આવ્યું તાઈવાનનું એરસ્પેસ?
