West Asia War: પશ્ચિમ એશિયામાં ચાલી રહેલા સંઘર્ષ વચ્ચે ઈઝરાયેલના વડાપ્રધાન બેન્જામિન નેતન્યાહુએ ગુશ એટઝિયનમાં રિઝર્વ કોમ્બેટ ઓફિસર્સના એક કોર્સના વિદ્યાર્થીઓ સાથે મુલાકાત કરી હતી. આ દરમિયાન વડાપ્રધાને પોતાનું સ્વતંત્ર હથિયાર નેટવર્ક (Independent Weapon Network) બનાવવા પર ભાર મૂક્યો હતો. પીએમ નેતન્યાહુએ કહ્યું, 'હું અમારા અમેરિકન મિત્રો તરફથી મળેલા સમર્થનની દિલથી પ્રશંસા કરું છું, પરંતુ આપણે નિર્ભરતામાંથી મુક્ત થવાની અને આપણું પોતાનું સ્વતંત્ર હથિયાર નેટવર્ક બનાવવાની જરૂર છે.'
અમેરિકાથી પીછો છોડાવી રહ્યું છે ઈઝરાયેલ?
પીએમ નેતન્યાહુની ઓફિસના જણાવ્યા અનુસાર, તેમણે ગુરુવારે (18 જૂન 2026) ગુશ એટઝિયનના કિબુત્ઝ મિગ્દલ ઓઝમાં રિઝર્વ કોમ્બેટના એક કોર્સના વિદ્યાર્થીઓ સાથે મુલાકાત કરી હતી અને તેમની સાથે અલગ-અલગ સેક્ટરમાં રહેલા પડકારો વિશે વાત કરી હતી. વડાપ્રધાને ઈરાન સાથેના સંઘર્ષ અંગે જણાવ્યું કે યુદ્ધ હજુ પૂરું નથી થયું. આ સાથે જ તેમણે પોતાની શક્તિને વધુ મજબૂત કરવા પર ભાર મૂક્યો હતો. તેમણે એમ પણ કહ્યું કે તેઓ અમેરિકા તરફથી વર્ષોથી મળી રહેલા સમર્થનની પ્રશંસા કરે છે, પરંતુ હવે ઈઝરાયેલને પોતાનું સ્વતંત્ર હથિયાર નેટવર્ક જોઈએ છે.
'આપણે આપણા હથિયારો જાતે જ બનાવવા પડશે...'
પીએમ નેતન્યાહુએ કહ્યું, 'અત્યારે આપણે ઈરાન અને તેના સમર્થકો સામે ઊભા છીએ. આપણે તેમને જડબાતોડ જવાબ આપ્યો છે. હજુ લડાઈ પૂરી થઈ નથી, પરંતુ આ આપણી શક્તિ પર નિર્ભર કરે છે. 30 વર્ષ પછી આપણે ક્યાં હોઈશું, તે પણ આપણી શક્તિ પર જ નિર્ભર કરે છે. તેથી, અત્યારે આપણે જે કરી રહ્યા છીએ, તેમાં આપણી શક્તિને વધુ મજબૂત બનાવવાની છે.'
વડાપ્રધાને કહ્યું કે તેઓ હથિયારોની બાબતમાં આત્મનિર્ભરતા ઈચ્છે છે. આ અંગે તેમણે કહ્યું, 'હું મારા અમેરિકન મિત્રો તરફથી વર્ષોથી મળી રહેલા સમર્થનની ઊંડી પ્રશંસા કરું છું, પરંતુ આજે હું કહું છું કે આપણને આપણું સ્વતંત્ર હથિયાર નેટવર્ક જોઈએ છે. આપણે આપણા હથિયારો જાતે જ બનાવવા પડશે.'
નેતન્યાહુ આવું કેમ કહી રહ્યા છે?
નેતન્યાહુએ વિદ્યાર્થીઓને કહ્યું કે, 'તેમણે પોતાની જાતને નિર્ભરતામાંથી મુક્ત કરવી પડશે, સતત પોતાની શક્તિ વધારવી પડશે, વધુને વધુ ટેકનોલોજી અપનાવવી પડશે અને તેમના જેવા કમાન્ડરોની વધુ પેઢીઓ તૈયાર કરવી પડશે, કારણ કે આખરે આ જ બાબત તેમની સ્થિતિ નક્કી કરશે.'
નેતન્યાહુનું આ નિવેદન ગયા અઠવાડિયે એક પ્રેસ કોન્ફરન્સ દરમિયાન અમેરિકાના ઉપરાષ્ટ્રપતિ જેડી વેન્સની ટિપ્પણીઓ બાદ આવ્યું છે, જેમાં વેન્સે જણાવ્યું હતું કે છેલ્લા કેટલાક મહિનામાં ઈઝરાયેલની રક્ષા કરનારા બે-તૃતીયાંશ ડિફેન્સિવ વેપન્સ (રક્ષણાત્મક હથિયારો) અમેરિકા દ્વારા સપ્લાય અને ફાઇનાન્સ કરવામાં આવ્યા હતા.
કતરના ગેસ પ્લાન્ટ દુર્ઘટનાએ ભારતમાં ફેલાવ્યો શોક : 12 ભારતીયો સહિત 13નાં મોત, દૂતાવાસ મદદમાં સક્રિય
