Air India crash report : DGCA દ્વારા એરલાઈન્સ કંપનીઓને શું નિર્દેશ આપવામાં આવ્યા ?

ભારતની ઉડ્ડયન દેખરેખ સંસ્થા ડિરેક્ટોરેટ જનરલ ઓફ સિવિલ એવિએશન (DGCA) એ દેશની તમામ એરલાઇન્સને બોઇંગ 787 અને 737 વિમાનોમાં ફ્યુઅલ સ્વિચ લોકીંગ સિસ્ટમની સંપૂર્ણ તપાસ કરવા સૂચના આપી છે. આ તપાસ 21 જુલાઈ સુધીમાં પૂર્ણ કરવાની રહેશે. DGCA એ કહ્યું છે કે મુસાફરોની સલામતી સુનિશ્ચિત કરવા માટે આ પગલું લેવામાં આવ્યું છે. કેટલાક આંતરરાષ્ટ્રીય અહેવાલો અનુસાર, આ વિમાનોની ફ્યુઅલ સ્વિચ લોકીંગ સિસ્ટમમાં ટેકનિકલ ખામી જોવા મળી છે, જે સલામતી માટે ખતરો ઉભો કરી શકે છે.

ફ્યુઅલ સ્વિચ લોકીંગ સિસ્ટમ શું છે?

આ સિસ્ટમ વિમાનના એન્જિનમાં ફ્યુઅલ સપ્લાયને નિયંત્રિત કરે છે. જો તેમાં કોઈ સમસ્યા હોય, તો એન્જિન બંધ થવાનું અથવા ફ્યુઅલ સપ્લાય બંધ થવાનું જોખમ હોઈ શકે છે. તેથી, DGCA એ તેને ગંભીરતાથી લીધું છે. DGCA એ બધી એરલાઇન્સને તેમના બોઇંગ 787 અને 737 ફ્લીટના તમામ વિમાનોની ટેકનિકલ તપાસ કરવા અને રિપોર્ટ સબમિટ કરવા જણાવ્યું છે. જો કોઈ વિમાનમાં ખામી જોવા મળે છે, તો તેને તાત્કાલિક રિપેર કરાવવી પડશે, ત્યાં સુધી તે વિમાન ઉડાન ભરી શકશે નહીં.

અમદાવાદ વિમાન દુર્ઘટના સાથે ફ્યુઅલ સ્વીચનું જોડાણ

12 જૂનના રોજ અમદાવાદમાં એર ઇન્ડિયાના વિમાન દુર્ઘટનાની તપાસ કરી રહેલા AAIB એ તેના પ્રારંભિક અહેવાલમાં જણાવ્યું હતું કે ક્રેશ થયેલા બોઇંગ ડ્રીમલાઇનર વિમાનના બંને એન્જિન ટેકઓફ ની થોડીક સેકન્ડો પછી બંધ થઈ ગયા હતા. કારણ કે ઇંધણ પુરવઠો બંધ થઈ ગયો હતો. એર ઇન્ડિયા વિમાનના બ્લેક બોક્સની તપાસમાં જાણવા મળ્યું છે કે ફ્લાઇટની છેલ્લી ક્ષણોમાં, કોકપીટ વોઇસ રેકોર્ડરમાં જાણવા મળ્યું છે કે એક પાયલોટે બીજાને પૂછ્યું હતું કે તેણે ફ્યુઅલ સ્વીચ કેમ બંધ કરી દીધી? આના પર બીજા પાયલોટે જવાબ આપ્યો કે તેણે આવું કર્યું નથી. તપાસમાં જાણવા મળ્યું છે કે ટેકઓફ પછી તરત જ ફ્યુઅલ સ્વીચો કટઓફ પર ફેરવાઈ ગઈ હતી, જેના કારણે વિમાનના એન્જિનને ઇંધણનો પુરવઠો બંધ થઈ ગયો હતો. રિપોર્ટ પછી, બોઇંગ વિમાનોના ફ્યુઅલ સ્વીચો વિશે પ્રશ્નો ઉભા થયા હતા અને એવી આશંકા વ્યક્ત કરવામાં આવી હતી કે તકનીકી ખામીને કારણે ફ્યુઅલ સ્વીચો બંધ થઈ ગઈ હતી.

AAIB એ 2018 માં FAA દ્વારા જારી કરાયેલ માર્ગદર્શિકાનો ઉલ્લેખ કર્યો હતો

ભારતના એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ અમદાવાદ વિમાન દુર્ઘટના પરના તેના પ્રારંભિક અહેવાલમાં 2018 માં યુએસ ફેડરલ એવિએશન એડમિનિસ્ટ્રેશન (FAA) દ્વારા જારી કરાયેલ માર્ગદર્શિકાનો ઉલ્લેખ કર્યો હતો, જેમાં બોઇંગ કંપનીના ઘણા મોડેલ વિમાનોમાં ફ્યુઅલ સ્વીચના લોકિંગની તપાસ કરવાની ભલામણ કરવામાં આવી હતી, જેમાં 787 નો સમાવેશ થાય છે. જોકે, આ ભલામણ ફરજિયાત નહોતી. તપાસમાં કહેવામાં આવ્યું હતું કે FAA માર્ગદર્શિકા ફરજિયાત ન હોવાથી અકસ્માતનો ભોગ બનેલા એર ઇન્ડિયાના વિમાનમાં ફ્યુઅલ સ્વીચ લોકિંગની તપાસ કરવામાં આવી ન હતી.