બિહાર વિધાનસભા ચૂંટણીને લઈને કોંગ્રેસ સેન્ટ્રલ ઇલેક્શન કમિટી (CEC) ની બેઠક બાદ પાર્ટી હેડક્વાર્ટર ખાતે ભારે હોબાળો અને વિરોધ જોવા મળ્યો. બેઠક પૂર્ણ થતાં જ મહિલા કાર્યકરોએ કોંગ્રેસ પ્રમુખ મલ્લિકાર્જુન ખડગે સામે સૂત્રોચ્ચાર કરીને ટિકિટ વિતરણમાં મહિલાઓની અવગણના પર આક્રોશ વ્યક્ત કર્યો.
મહિલા કાર્યકરોએ મીડિયા સાથે વાતચીતમાં કહ્યું કે રાહુલ ગાંધીએ મહિલાઓને 33 ટકા ટિકિટ આપવાનો વચન આપ્યું હતુ, પરંતુ તેનો અમલ થતો નથી. તેમણે આરોપ મૂક્યો કે વર્ષોથી મહેનત કરનારી કાર્યકર્તાઓને અવગણીને “ડમી ઉમેદવારોને ટિકિટ” આપવામાં આવી રહી છે.
કાર્યકરોમાં અસંતોષ: “અમારી સાથે દગો થઈ રહ્યો છે”
મીડિયા સાથે વાત કરતા એક મહિલા કોંગ્રેસ કાર્યકર્તાએ કહ્યું,
“એવું કહેવામાં આવ્યું હતું કે ફક્ત તેઓ જ ઉમેદવાર બનશે જેઓ સ્ક્રીનીંગ કમિટીમાં હતા અને ઓનલાઈન અરજી કરી હતી. પરંતુ કૃષ્ણા અલ્લાવરુ અને રાજેશ રામ જેવા નેતાઓ મહિલાઓને કામ કરાવે છે, પછી તેમને અવગણે છે. આ ‘દગો’ છે. રાહુલ ગાંધીના યુવાનો અને મહિલાઓને સમ્માન આપવાના વચનનો ભંગ થઈ રહ્યો છે.”
તેમણે વધુમાં ઉમેર્યું,
“બિહાર આ સ્વીકારશે નહીં. પરિણામો બધા જોશે. અમે ચૂપ નહીં બેસીએ.”
રાહુલ ગાંધી બેઠકમાં હાજર નહોતા
ત્રણ કલાક ચાલેલી કોંગ્રેસ CEC બેઠકમાં ઉમેદવારોની પસંદગી અંગે વિગતવાર ચર્ચા થઈ. સૂત્રોના જણાવ્યા અનુસાર, પાર્ટીએ ઉમેદવારોની અંતિમ પસંદગી માટે એક પેટા-સમિતિની રચના કરી છે, જે આવતીકાલે સવારે 9 વાગ્યે મળશે.
આ બેઠકમાં 15 થી 18 બેઠકો પર ચર્ચા કરવામાં આવી હતી. અગાઉની બેઠકમાં 25 બેઠકોને અંતિમ સ્વરૂપ આપવામાં આવ્યું હતું, જ્યારે 22 બેઠકો પર ચર્ચા બાકી છે.
કોંગ્રેસ પ્રમુખ મલ્લિકાર્જુન ખડગે બેઠકમાં હાજર હતા, જ્યારે રાહુલ ગાંધી અને સોનિયા ગાંધી દિલ્હી બહાર હોવાથી વિડિયો કોન્ફરન્સિંગ દ્વારા જોડાયા હતા. બેઠક દરમિયાન ઉમેદવારોના નામો અને વિસ્તારના રાજકીય ગણિત પર ચર્ચા કરવામાં આવી હતી.
બિહાર કોંગ્રેસ પ્રમુખ રાજેશ રામનું નિવેદન
બિહાર કોંગ્રેસ પ્રમુખ રાજેશ રામે બેઠક બાદ જણાવ્યું,
“આજે અમે બીજી CEC બેઠકમાં હાજરી આપી હતી. બધા સભ્યોને પોતાના વિચારો વ્યક્ત કરવાની તક આપવામાં આવી. 2-3 કલાકની ચર્ચા દરમિયાન પાર્ટી નિયંત્રણ હેઠળ આવતી બેઠકો પર ઉમેદવારોની પસંદગી અંગે ચર્ચા થઈ.”
