શેરબજારમાં સતત વધઘટ અને સોનાના ભાવમાં જોવા મળતી અસ્થિરતા વચ્ચે સુરક્ષિત અને નિશ્ચિત આવક ઇચ્છતા રોકાણકારો માટે ફિક્સ્ડ ડિપોઝિટ (FD) ફરીથી આકર્ષણનું કેન્દ્ર બની છે. જોકે હવે માત્ર બેંક FD જ નહીં, પરંતુ કંપની FD એટલે કે કોર્પોરેટ FD પણ રોકાણકારોનું ધ્યાન ખેંચી રહી છે. કારણ કે કેટલીક NBFC અને હાઉસિંગ ફાઇનાન્સ કંપનીઓ પોતાની FD યોજનાઓ પર 9.1 ટકા સુધીનું વ્યાજ ઓફર કરી રહી છે, જે ઘણી બેંકોના FD દર કરતાં નોંધપાત્ર રીતે વધુ છે.
ખાસ વાત એ છે કે કંપની FDમાં રોકાણ કરનારાઓને માસિક, ત્રિમાસિક, અર્ધવાર્ષિક અથવા વાર્ષિક ધોરણે વ્યાજ મેળવવાનો વિકલ્પ પણ મળે છે. એટલે નિયમિત આવક શોધી રહેલા સિનિયર સિટિઝન અને અન્ય રોકાણકારો માટે પણ આ વિકલ્પ આકર્ષક બની રહ્યો છે.
શું છે કંપની FD?
કંપની FD એ એવી ફિક્સ્ડ ડિપોઝિટ યોજના છે જેમાં રોકાણકારો બેંકને બદલે નોન-બેન્કિંગ ફાઇનાન્સ કંપની (NBFC) અથવા હાઉસિંગ ફાઇનાન્સ કંપની (HFC) પાસે નિશ્ચિત સમયગાળા માટે નાણાં જમા કરાવે છે. તેના બદલામાં કંપની પૂર્વનિર્ધારિત વ્યાજદર મુજબ રિટર્ન આપે છે.
સામાન્ય રીતે કંપની FD પર મળતું વ્યાજ બેંક FD કરતાં વધારે હોય છે. આ કારણસર છેલ્લા કેટલાક વર્ષોમાં કોર્પોરેટ FDમાં રોકાણ કરનારા લોકોની સંખ્યા વધી રહી છે.
આ પણ વાંચો: જાન્યુઆરીથી માર્ચ સુધી ભારતની GDPએ ભરી હરણફાળ : 7.8% વૃદ્ધિ સાથે નોંધાવી મજબૂત ગતિ
ક્યાં મળી રહ્યું છે સૌથી વધુ વ્યાજ?
હાલ બજારમાં કેટલીક કંપનીઓ પોતાની FD યોજનાઓ પર આકર્ષક વ્યાજદર ઓફર કરી રહી છે. સૌથી વધુ ચર્ચામાં રહેલી કંપનીઓમાં મુથૂટ કેપિટલ સામેલ છે, જે વિવિધ સમયગાળાની FD પર 7.9 ટકાથી લઈને 9.1 ટકા સુધીનું વ્યાજ આપી રહી છે.
તે ઉપરાંત શ્રીરામ ફાઇનાન્સ દ્વારા 7 ટકાથી 7.6 ટકા સુધી વ્યાજ ઓફર કરવામાં આવી રહ્યું છે. HUDCOની વિવિધ યોજનાઓ પર 7 ટકાથી 7.25 ટકા સુધીનું રિટર્ન ઉપલબ્ધ છે.
મહિન્દ્રા ફાઇનાન્સ અને સુંદરમ ફાઇનાન્સ પણ લગભગ 7 ટકા સુધીનું વ્યાજ આપી રહી છે. જ્યારે LIC હાઉસિંગ ફાઇનાન્સ અને PNB હાઉસિંગ ફાઇનાન્સની FD યોજનાઓ પર 6.9 ટકા સુધીનું રિટર્ન મળી રહ્યું છે. બજાજ ફાઇનાન્સ પણ લગભગ 6.95 ટકા સુધીનું વ્યાજ આપી રહી છે.
આ પણ વાંચો: 3 હજાર કરોડની કંપની અને 15 લાખ કરોડનો ખેલ! : Rajesh Exports કેસમાં શું છે આખું ગણિત? સ્ટેપ બાય સ્ટેપ સમજો
દર મહિને વ્યાજ મેળવવાનો વિકલ્પ
કંપની FDની સૌથી મોટી ખાસિયતોમાંની એક એ છે કે રોકાણકારો પોતાની જરૂરિયાત મુજબ વ્યાજ મેળવવાની પદ્ધતિ પસંદ કરી શકે છે. જો કોઈ વ્યક્તિને નિયમિત માસિક આવકની જરૂર હોય તો તે માસિક વ્યાજ ચૂકવણીનો વિકલ્પ પસંદ કરી શકે છે.
તે ઉપરાંત ત્રિમાસિક, અર્ધવાર્ષિક અને વાર્ષિક વ્યાજ મેળવવાની સુવિધા પણ ઉપલબ્ધ છે. કેટલાક રોકાણકારો વ્યાજને ફરીથી FDમાં જ રોકાણ કરવાનું પસંદ કરે છે, જેના કારણે ચક્રવૃદ્ધિ વ્યાજનો લાભ મળીને લાંબા ગાળે વધુ રિટર્ન મળી શકે છે.
આ પણ વાંચો: હોર્મુઝ સંકટ પણ ન રોકી શક્યું ભારતની ઇકોનોમીની રફતાર : રફતાર, GDPમાં બમ્પર ઉછાળો, ગ્રોથ વધીને 7.7% થયો...!!
બેંક FD કરતાં શું છે ફરક?
બેંક FD અને કંપની FD વચ્ચેનો સૌથી મોટો તફાવત સુરક્ષાનો છે. બેંક FDમાં જમા કરાયેલા નાણાંને DICGC દ્વારા ₹5 લાખ સુધીની સુરક્ષા મળે છે. જો કોઈ બેંક નાણાકીય મુશ્કેલીમાં ફસાય તો પણ જમાકર્તાઓને આ મર્યાદા સુધી સુરક્ષા ઉપલબ્ધ રહે છે.
પરંતુ કંપની FDમાં આવી કોઈ ડિપોઝિટ ગેરંટી ઉપલબ્ધ નથી. એટલે કે રોકાણકારોએ કંપનીની નાણાકીય સ્થિતિ અને વિશ્વસનીયતા અંગે પૂરતી તપાસ કર્યા બાદ જ રોકાણ કરવું જોઈએ.
Disclaimer ( અસ્વીકરણ ) : આ લેખ ફક્ત માહિતી અને શૈક્ષણિક હેતુઓ માટે છે અને તેમાં રોકાણ અથવા ટ્રેડિંગ સલાહનો સમાવેશ થતો નથી. રોકાણ કરતા પહેલા કૃપા કરીને તમારું પોતાનું સંશોધન કરો અથવા નિષ્ણાંત નાણાકીય સલાહકારની સલાહ લો. રોકાણો બજારના જોખમોને આધીન છે. અહીં આપેલી માહિતી અને તથ્યોની ચોકસાઈ અથવા સંપૂર્ણતા માટે Offbeat Stories જવાબદાર નથી.
