આધુનિક યુદ્ધની રણનીતિ અત્યારે ઝડપથી બદલાઈ રહી છે. પહેલાના સમયમાં લડાઈ મિસાઈલ, ટેન્ક અને ડ્રોન દ્વારા લડાતી હતી, પરંતુ હવે એક એવી નવી રીત સામે આવી રહી છે જેમાં કોઈપણ ધડાકા વગર દુશ્મનની તાકાતને નેસ્તનાબૂદ કરી શકાય છે. Electromagnetic Pulse (EMP) અને High-Power Microwave (HPM) જેવી ટેકનોલોજી હવે યુદ્ધના મેદાનમાં ગેમ ચેન્જર સાબિત થઈ રહી છે.
શું છે આ નવી ટેકનોલોજી?
આ આધુનિક હથિયારો દુશ્મનના ઈલેક્ટ્રોનિક સિસ્ટમને સંપૂર્ણપણે ઠપ કરવાની ક્ષમતા ધરાવે છે. આ સિવાય Cognitive Electronic Warfare (CEW) જેવી એડવાન્સ સિસ્ટમ્સ Artificial Intelligenceની મદદથી દુશ્મનના રડાર, સિગ્નલ અને ડ્રોનને ઓળખીને તેને તરત જ નિષ્ક્રિય કરી શકે છે.
ચીન અને અમેરિકા વચ્ચેની સ્પર્ધા
રિપોર્ટ મુજબ ચીન આ ક્ષેત્રમાં ખૂબ ઝડપથી આગળ વધી રહ્યું છે. ચીની સેનાએ એવી ઈલેક્ટ્રોનિક ક્ષમતાઓ વિકસાવી છે જે દુશ્મનની સિસ્ટમમાં દખલ કરીને તેને બાધિત કરી શકે છે. નિષ્ણાતોના મતે અમેરિકા અત્યારે આ રેસમાં પાછળ દેખાઈ રહ્યું છે અને ચીનની બરાબરી કરવામાં તેને હજુ ઘણા વર્ષો લાગી શકે છે.
AI થી સજ્જ હથિયારો બનશે તાકાત
આ નવી પ્રકારની જંગમાં Artificial Intelligence સૌથી મોટું હથિયાર બનીને ઉભરી રહ્યું છે. AI આધારિત સિસ્ટમ ડેટાનું ઝડપથી વિશ્લેષણ કરીને સેકન્ડોમાં પ્રતિક્રિયા આપી શકે છે. તેનાથી દુશ્મનના હુમલાને ઓળખવો અને તેનો જવાબ આપવો અત્યંત સરળ બની જાય છે. અમેરિકા પણ હવે Leonidas જેવી સિસ્ટમ પર કામ કરી રહ્યું છે, જે માઈક્રોવેવ દ્વારા ડ્રોનના ઝૂંડને એકસાથે તોડી પાડવા સક્ષમ છે.
ગોળીબાર વગર થશે હુમલો
આ હથિયારોની સૌથી ખતરનાક બાબત એ છે કે તેનો ઉપયોગ કરવા માટે કોઈ ગોળા-બારૂદની જરૂર પડતી નથી. તેને ટ્રક, કન્ટેનર કે સામાન્ય વાહનમાં છુપાવીને પણ ચલાવી શકાય છે. આવા હુમલામાં કોઈ ધડાકો થતો નથી અને પુરાવા મળવા પણ મુશ્કેલ હોય છે, જેથી હુમલાખોરની ઓળખ કરવી અઘરી બને છે.
ભવિષ્યનું 'શાંત યુદ્ધ'
આવનારા સમયમાં યુદ્ધનું સ્વરૂપ સંપૂર્ણપણે બદલાઈ જશે. બોમ્બ કે ગોળી વગર જ આખા શહેરની વીજળી, સંચાર વ્યવસ્થા અને સૈન્ય સિસ્ટમને ઠપ કરી શકાશે. જોકે, આ ખતરા સામે લડવા માટે વિશ્વના દેશો હવે મજબૂત ઈલેક્ટ્રોનિક સુરક્ષા અને સુરક્ષિત કોમ્યુનિકેશન નેટવર્ક પર કામ કરી રહ્યા છે.
