Social Media Ban: મલેશિયાએ તેના ડિજિટલ નિયમોમાં મોટો ફેરફાર કર્યો છે, જેમાં જાહેરાત કરવામાં આવી છે કે 2026 થી 16 વર્ષથી ઓછી ઉંમરના બાળકોને સોશિયલ મીડિયાનો ઉપયોગ કરવાની મંજૂરી આપવામાં આવશે નહીં. વિશ્વના ઘણા દેશોની જેમ, મલેશિયા પણ હવે બાળકોની ઓનલાઈન સલામતી અંગે કડક પગલાં લઈ રહ્યું છે.
બાળકોની સુરક્ષા માટે કડક પગલાં
કોમ્યુનિકેશન મંત્રી ફહમી ફાઝિલે આ યોજનાની પુષ્ટિ કરી. સરકાર હાલમાં ઓસ્ટ્રેલિયા અને અન્ય દેશોમાં બાળકોને સાયબર ધમકીઓ, ઓનલાઈન છેતરપિંડી અને જાતીય શોષણ જેવા જોખમોથી બચાવવા માટે અપનાવવામાં આવેલા એજ-રિસ્ટ્રિક્શન મોડલની રિવ્યૂ કરી રહી છે. મંત્રીએ ટેક કંપનીઓને સ્પષ્ટ સંદેશ આપ્યો: "અમે અપેક્ષા રાખીએ છીએ કે, બધા સોશિયલ મીડિયા પ્લેટફોર્મ આગામી વર્ષ સુધીમાં 16 વર્ષથી ઓછી ઉંમરના યુઝર્સને એકાઉન્ટ ખોલવાથી રોકવાના નિર્ણયનું પાલન કરશે."
વૈશ્વિક ચિંતા અને વધતું દબાણ
બાળકોના માનસિક સ્વાસ્થ્ય પર સોશિયલ મીડિયાની અસર એક વૈશ્વિક મુદ્દો બની ગયો છે. TikTok, Snapchat, Google અને Meta (Facebook, Instagram, WhatsApp) યુવાનોમાં માનસિક સમસ્યાઓ વધારવાના આરોપસર આવી કંપનીઓ અમેરિકામાં પણ મુકદ્દમાનો સામનો કરી રહી છે. મલેશિયાનું આ પગલું ઘણા દેશોની નીતિઓનું પાલન કરે છે. ઓસ્ટ્રેલિયા આવતા મહિને 16 વર્ષથી ઓછી ઉંમરના લોકો માટે એકાઉન્ટ બંધ કરવાની તૈયારીમાં છે. ફ્રાન્સ, સ્પેન, ઇટાલી, ડેનમાર્ક અને ગ્રીસ એજ-વેરિફિકેશન (age verification) મોડલનું પરીક્ષણ કરી રહ્યા છે.
અન્ય એશિયન દેશો શું કરી રહ્યા છે?
મલેશિયાના પાડોશી દેશ ઇન્ડોનેશિયા પણ એજ-રિસ્ટ્રિક્શન લગાવવા ઇચ્છતો હતો પરંતુ પછીમાં તેને ઓછા કડક નિયમો અપનાવ્યા, જેમ કે હાનિકારક કન્ટેન્ટ પર ફિલ્ટર અને મજબૂત એજ-વેરિફિકેશન પ્રક્રિયાઓ.
સોશિયલ મીડિયા કંપનીઓની ચકાસણીમાં વધારો
હાલના મહિનાઓમાં મલેશિયાની સરકાર સોશિયલ મીડિયા પ્લેટફોર્મ પર પોતાની પકડ મજબૂત કરી રહી હોય તેવું લાગે છે. સરકારનો દાવો છે કે, ઓનલાઈન જુગાર, જાતિ, ધર્મ અને રાજાશાહી સંબંધિત સંવેદનશીલ કન્ટેન્ટમાં ચિંતાજનક વધારો થયો છે. જાન્યુઆરીમાં અમલમાં આવેલા નવા નિયમો હેઠળ, આઠ મિલિયનથી વધુ મલેશિયન યુઝર્સ ધરાવતા પ્લેટફોર્મ્સે સરકાર પાસેથી લાઇસન્સ મેળવવું આવશ્યક છે.
