કેનેડામાં 2018માં થયેલા ભયાનક રોડ અકસ્માત કેસમાં એક મહત્વપૂર્ણ કાનૂની વળાંક આવ્યો છે. કેનેડિયન કોર્ટે ભારતીય મૂળના ટ્રક ડ્રાઈવર જસ્કીરત સિંહ સિદ્ધુની ડિપોર્ટેશન પ્રક્રિયા તાત્કાલિક સ્થગિત કરી છે. આ નિર્ણયથી આ કેસ ફરીથી ચર્ચાના કેન્દ્રમાં આવ્યો છે અને ઈમિગ્રેશન તથા માનવતાવાદી મુદ્દાઓ પર નવી ચર્ચા શરૂ થઈ છે. જસ્કીરત સિદ્ધુ 2018માં કેનેડાના સાસ્કેચેવન પ્રાંતમાં થયેલા ભયાનક અકસ્માત માટે જવાબદાર ઠેરવાયા હતા, જેમાં 16 લોકોના મોત થયા હતા. આ દુર્ઘટના કેનેડાના ઇતિહાસમાં સૌથી દુઃખદ ટ્રાન્સપોર્ટ અકસ્માતોમાંથી એક ગણાય છે.
2018નો ભયાનક અકસ્માત
એપ્રિલ 2018માં એક ટ્રક અને હમ્બોલ્ટ બ્રોન્કોસ જુનિયર હોકી ટીમની બસ વચ્ચે ટક્કર થઈ હતી. આ અકસ્માતમાં 16 લોકોના મોત થયા અને અનેક લોકો ગંભીર રીતે ઘાયલ થયા હતા. તપાસમાં જાણવા મળ્યું કે ટ્રક ડ્રાઈવર જસ્કીરત સિદ્ધુએ સ્ટોપ સાઇન અવગણ્યું હતું, જેના કારણે આ વિનાશકારી અકસ્માત સર્જાયો હતો. આ ઘટના પછી કેનેડામાં રોડ સલામતી અને ટ્રકિંગ નિયમોને લઈને વ્યાપક ચર્ચા થઈ હતી. જસ્કીરત સિદ્ધુએ પોતાની ભૂલ સ્વીકારી હતી અને તેમને જેલ સજા ફટકારવામાં આવી હતી.
કાનૂની પ્રક્રિયા અને સજા
કોર્ટમાં દોષી ઠેરવાયા બાદ જસ્કીરત સિદ્ધુને 8 વર્ષની સજા આપવામાં આવી હતી. તેમણે 2022માં પેરોલ મેળવી હતી અને ત્યારબાદ તેઓ કેનેડામાં જ રહેતા હતા. પરંતુ પછી કેનેડિયન ઈમિગ્રેશન સત્તાઓએ તેમની સામે ડિપોર્ટેશન કાર્યવાહી શરૂ કરી હતી. કારણ કે તેઓ કાનૂની રીતે ગંભીર ગુનામાં દોષી ઠેરવાયા હતા જેના આધારે તેમને દેશ બહાર મોકલવાની પ્રક્રિયા હાથ ધરાઈ હતી.
હવે કોર્ટે શું કહ્યું?
તાજેતરમાં, કેનેડિયન ફેડરલ કોર્ટે તેમની ડિપોર્ટેશન પર અસ્થાયી રોક લગાવી છે. કોર્ટે આ મામલાને ફરીથી સમીક્ષા માટે મોકલ્યો છે, ખાસ કરીને માનવતાવાદી અને વ્યક્તિગત પરિસ્થિતિઓના આધાર પર. કોર્ટના આ નિર્ણયનો અર્થ એ છે કે હાલ માટે જસ્કીરત સિદ્ધુને કેનેડામાં રહેવાની મંજૂરી મળશે અને તેમની કેસની ફરીથી સમીક્ષા થશે.
આ પણ વાંચો: "અમેરિકા પોતાના સ્વાર્થ માટે કોઈની પણ હત્યા કરાવી શકે છે" : રશિયાના વિદેશ મંત્રી લાવરોવનો સનસનીખેજ આક્ષેપ
માનવતાવાદી મુદ્દા અને પરિવાર પર અસર
જસ્કીરત સિદ્ધુએ દલીલ કરી હતી કે તેઓ ભારતમાં પરત જાય તો તેમના માટે જીવન ફરી શરૂ કરવું મુશ્કેલ બનશે. ઉપરાંત, તેમના પરિવાર અને સામાજિક પરિસ્થિતિઓને ધ્યાનમાં લેતા તેમને કેનેડામાં રહેવાની તક આપવી જોઈએ. કેટલાક માનવ અધિકાર સમૂહોએ પણ આ કેસમાં સહાનુભૂતિ દર્શાવી છે, જ્યારે અકસ્માતમાં જીવ ગુમાવનારાઓના પરિવારજનોએ કડક વલણ દાખવ્યું છે. આ કારણે આ કેસ કાનૂની સાથે સાથે ભાવનાત્મક રીતે પણ અત્યંત સંવેદનશીલ બની ગયો છે.
આ નિર્ણયને લઈને કેનેડામાં મિશ્ર પ્રતિસાદ જોવા મળી રહ્યો છે. એક તરફ કેટલાક લોકો માને છે કે સિદ્ધુએ પોતાની ભૂલ સ્વીકારી છે અને સજા ભોગવી છે, તેથી તેમને બીજી તક મળવી જોઈએ. બીજી તરફ, મૃતકોના પરિવારજનો અને કેટલાક નાગરિકો માને છે કે આ પ્રકારના ગંભીર ગુનામાં દોષી વ્યક્તિને દેશમાં રહેવાની મંજૂરી આપવી યોગ્ય નથી.
