Laptop Price Rise : જો તમે નવું લેપટોપ ખરીદવાનું વિચારી રહ્યા છો, તો તમારે હવે ઉતાવળ કરવી પડશે. ટેકનોલોજીની દુનિયામાંથી એક એવા સમાચાર આવ્યા છે જે તમારા ખિસ્સા પર સીધી અસર કરી શકે છે. લેપટોપ બનાવવા માટે વપરાતા મહત્વના સ્પેરપાર્ટ્સ જેવા કે પ્રોસેસર, GPU અને મેમરી ચિપ્સની કિંમતોમાં સતત વધારો થઈ રહ્યો છે. આ કારણે આ વર્ષે લેપટોપના ભાવમાં 35% સુધીનો મોટો ઉછાળો જોવા મળી શકે છે.
કેમ વધી રહ્યા છે લેપટોપના ભાવ?
નિષ્ણાતોના જણાવ્યા અનુસાર, લેપટોપ મોંઘા થવા પાછળ મુખ્ય બે કારણો જવાબદાર છે. પહેલું કારણ એ છે કે, બજારમાં રેમ (RAM) ની કિંમતોમાં અચાનક મોટો વધારો થયો છે. બીજું કારણ એ છે કે ઇન્ટેલ (Intel) ના એન્ટ્રી-લેવલ પ્રોસેસર્સની માર્કેટમાં ભારે અછત સર્જાઈ છે. જ્યારે માલ ઓછો હોય અને માંગ વધુ હોય, ત્યારે સ્વાભાવિક રીતે કિંમતો વધવા લાગે છે.
વેચાણમાં ઘટાડો થવાની ભીતિ
વર્ષ 2025 માં ભારતમાં પીસી (PC) અને લેપટોપનું રેકોર્ડ બ્રેક શિપમેન્ટ થયું હતું. ગયા વર્ષે લગભગ 1.6 કરોડ યુનિટ્સ વેચાયા હતા, જે અત્યાર સુધીનો સૌથી મોટો આંકડો છે. જોકે, આ વર્ષે ભાવ વધારાને કારણે પીસી માર્કેટમાં 8% જેટલો ઘટાડો થવાનો અંદાજ છે. મોંઘવારીના કારણે લોકો હવે નવું લેપટોપ ખરીદતા પહેલા બે વાર વિચાર કરી રહ્યા છે.
સામાન્ય માણસના ખિસ્સા પર અસર
કિંમતો પર અસર અત્યારથી જ દેખાવા લાગી છે. મેમરી ચિપ્સના ભાવમાં 2.5 થી 3 ગણો વધારો થવાને કારણે લેપટોપ અને ડેસ્કટોપ પહેલેથી જ 10-12% મોંઘા થઈ ચૂક્યા છે. જે લેપટોપ પહેલા ₹30,000 થી ₹35,000 માં સરળતાથી મળી રહેતા હતા, તેની કિંમત હવે ₹45,000 ની આસપાસ પહોંચી ગઈ છે. હજુ પણ આગામી મહિનાઓમાં ભાવમાં વધુ 10% નો વધારો થવાની શક્યતા છે.
ક્યારે મળશે રાહત?
જો તમે એવું વિચારતા હોવ કે થોડા દિવસોમાં ભાવ ઘટી જશે, તો તે અસંભવિત છે. નિષ્ણાતોનું કહેવું છે કે, આગામી 6 થી 7 ક્વાર્ટર એટલે કે લગભગ દોઢ વર્ષ સુધી પરિસ્થિતિ સુધરવાની કોઈ શક્યતા નથી. એવી ધારણા છે કે, આવતા વર્ષના બીજા ભાગમાં એટલે કે, 2027 ની શરૂઆતમાં જ કદાચ સ્પેરપાર્ટ્સની અછત ઓછી થશે અને ભાવમાં થોડી રાહત મળી શકશે.
