ઘણીવાર મહિલાઓને જાહેર સ્થળોએ પોતાનો મોબાઈલ નંબર આપવો પડતો હોય છે જેના કારણે તેમની પ્રાઈવસીને લઈને અનેક પ્રશ્નો ઉભા થાય છે. ખાસ કરીને રિટેલ સ્ટોર્સ કે નાની દુકાનો પર મોબાઈલ રિચાર્જ કરાવતી વખતે પોતાનો અંગત નંબર આપવો અસુરક્ષિત લાગી શકે છે. મહિલાઓની આ જ સમસ્યાના ઉકેલ માટે સરકારી ટેલિકોમ કંપની BSNL દ્વારા એક ખાસ ફીચર લોન્ચ કરવામાં આવ્યું છે જેને 'કવચ નંબર' નામ આપવામાં આવ્યું છે.
આ સુવિધાની જાહેરાત International Women’s Day ના અવસરે કરવામાં આવી હતી. કંપનીના જણાવ્યા અનુસાર આ ટેક્નોલોજી મહિલાઓના મોબાઈલ નંબરને સુરક્ષિત રાખશે અને તેમની અંગત વિગતો અજાણ્યા લોકો સુધી પહોંચતી અટકાવશે.
કેવી રીતે કામ કરશે કવચ નંબર?
કવચ નંબર ફીચર ખાસ કરીને મહિલાઓની સુરક્ષા અને ગુપ્તતા જાળવવા માટે તૈયાર કરાયું છે. આ સુવિધા અંતર્ગત BSNL યુઝરને SMS દ્વારા 10 આંકડાનો એક કામચલાઉ (ટેમ્પરરી) નંબર પૂરો પાડવામાં આવે છે. આ નંબર યુઝરના અસલી મોબાઈલ નંબર સાથે જોડાયેલો હોય છે પરંતુ બહારની વ્યક્તિને માત્ર તે કામચલાઉ નંબર જ દેખાય છે. આ રીતે અસલી નંબર સુરક્ષિત રહે છે.
નંબર આપ્યા વગર પણ રિચાર્જ થશે
આ સુવિધાનો સૌથી મોટો ફાયદો એ છે કે મહિલાઓ રિચાર્જ કરાવતી વખતે અસલી નંબરના બદલે આ કવચ નંબરનો ઉપયોગ કરી શકે છે. જ્યારે રિચાર્જ કરવામાં આવે ત્યારે આ કામચલાઉ નંબર સિસ્ટમ દ્વારા આપમેળે મુખ્ય નંબર સાથે કનેક્ટ થઈ જાય છે અને રિચાર્જની પ્રક્રિયા સામાન્ય રીતે પૂર્ણ થાય છે. આ સમગ્ર પ્રક્રિયામાં વ્યક્તિગત નંબર કોઈ ત્રાહિત વ્યક્તિ પાસે જતો નથી.
રિટેલ દુકાનો પર મહિલાઓને મળશે સુરક્ષા
આ ફીચર ખાસ કરીને એવી મહિલાઓ માટે વરદાનરૂપ સાબિત થશે જેઓ મોબાઈલ રિચાર્જ માટે રિટેલ આઉટલેટ્સ પર જાય છે. હવે તેમને દુકાનદારને પોતાનો પર્સનલ નંબર આપવાની જરૂર પડશે નહીં. તેઓ સીધો કવચ નંબર આપીને રિચાર્જ કરાવી શકશે જેનાથી ડેટા લીક થવાનો કે હેરાનગતિનો ભય રહેશે નહીં.
કવચ નંબર મેળવવાની રીત
BSNL ગ્રાહકો આ સુવિધાનો લાભ BSNL Self Care એપ દ્વારા લઈ શકે છે. આ એપમાં જઈને યુઝર પોતાનો અસ્થાયી કવચ નંબર જનરેટ કરી શકે છે. આ ઉપરાંત વધુ વિગતો BSNL ની ઓફિશિયલ વેબસાઈટ પર પણ ઉપલબ્ધ છે. ડિજિટલ સુરક્ષાની દિશામાં આ એક મોટું પગલું માનવામાં આવે છે.
Jio નો એન્યુઅલ રિચાર્જ પ્લાન
બીજી તરફ Reliance Jioનો એક લાંબી મુદતનો પ્લાન પણ ચર્ચામાં છે. 1748 રૂપિયાની કિંમત ધરાવતો આ પ્લાન એવા યુઝર્સ માટે શ્રેષ્ઠ છે જેઓ દર મહિને રિચાર્જની ઝંઝટમાંથી મુક્તિ ઈચ્છે છે. આ પ્લાનમાં 336 દિવસની એટલે કે લગભગ 11 મહિનાની વેલિડિટી મળે છે. એકવાર રિચાર્જ કર્યા બાદ લાંબા સમય સુધી સિમ એક્ટિવ રહે છે અને વારંવાર નવો પ્લાન શોધવાની જરૂર રહેતી નથી.
