બોટાદ જિલ્લામાં બરવાળા-નાવડા રોડ પર મંગળવારે ગમખ્વાર માર્ગ અકસ્માત સર્જાયો હતો. ખમીદાણા ગામ નજીક આવેલા નેસડીયા હનુમાનજી મંદિર પાસે સિમેન્ટની થેલીઓ ભરેલો ટ્રક પલટી ખાઈ જતાં ટ્રકમાં સવાર બે મજૂરોના ઘટનાસ્થળે જ કરુણ મોત નીપજ્યા હતા, જ્યારે અન્ય ત્રણ મજૂરો ગંભીર રીતે ઈજાગ્રસ્ત થયા હતા. અકસ્માત બાદ ટ્રક ચાલક સ્થળ પરથી ફરાર થઈ ગયો હોવાનું સામે આવ્યું છે. ઘટનાને પગલે સમગ્ર વિસ્તારમાં અરેરાટી વ્યાપી ગઈ હતી.
પ્રાથમિક માહિતી મુજબ, સિમેન્ટની થેલીઓ ભરેલો ટ્રક બરવાળાથી નાવડા તરફ જઈ રહ્યો હતો. ટ્રકમાં સિમેન્ટ ઉતારવાના કામ માટે કેટલાક મજૂરો ટ્રકની ઉપર બેઠા હતા. ખમીદાણા ગામ પાસે પહોંચતા ટ્રક ચાલકે સ્ટિયરિંગ પરથી કાબૂ ગુમાવ્યો હતો. જેના કારણે ટ્રક રોડ પરથી નીચે ઉતરી ખાળિયામાં જઈ પલટી ખાઈ ગયો.
આ પણ વાંચો: રાજકોટ જન્માષ્ટમી લોકમેળાની તૈયારીઓ તેજ : સ્ટોલ માટે પ્રથમ જ દિવસે 86 ફોર્મ ઉપડ્યા
સિમેન્ટની થેલીઓ નીચે દબાતા બે મજૂરોના મોત
ટ્રક પલટી જતાં તેમાં ભરેલી સિમેન્ટની ભારે થેલીઓ મજૂરો પર પડતાં તેઓ ટ્રક અને માલસામાન નીચે દબાઈ ગયા હતા. સ્થાનિક લોકો અને પોલીસ ઘટનાસ્થળે પહોંચે તે પહેલાં જ બે મજૂરોના મોત નીપજ્યા હતા.
મૃતકોની ઓળખ બાબુભાઈ હરજીભાઈ સારોલા (ઉંમર આશરે 40 વર્ષ) અને રમેશભાઈ હરજીભાઈ સારોલા (ઉંમર આશરે 50 વર્ષ) તરીકે થઈ છે. બંનેના મૃતદેહોને પોસ્ટમોર્ટમ માટે ખસેડવાની કાર્યવાહી હાથ ધરવામાં આવી હતી.
આ પણ વાંચો: જન્મ-મરણના દાખલા માટે લોકો પરેશાન : 5 દિવસથી CRS પોર્ટલ ખોરવાયું, હજારો અરજીઓ અટવાઈ
ત્રણ મજૂરોને સારવાર માટે હોસ્પિટલ ખસેડાયા
અકસ્માતમાં અન્ય ત્રણ મજૂરોને પણ ગંભીર ઈજાઓ પહોંચી હતી. ઈજાગ્રસ્ત સંજયભાઈ ગીધાભાઈ અને વિજયભાઈ ગીધાભાઈને વધુ સારવાર માટે બોટાદની હોસ્પિટલમાં ખસેડવામાં આવ્યા હતા. જ્યારે મફાભાઈ ગોવિંદભાઈ મકવાણાને સારવાર માટે બરવાળાની હોસ્પિટલમાં દાખલ કરવામાં આવ્યા હોવાનું જાણવા મળ્યું છે.
ડોક્ટરો દ્વારા ઈજાગ્રસ્તોની સારવાર શરૂ કરવામાં આવી છે. તેમની હાલત અંગે વધુ માહિતીની રાહ જોવામાં આવી રહી છે.
આ પણ વાંચો: ભાવનગરમાં ચાંદીપુરાની દહેશત : સર ટી. હોસ્પિટલમાં સારવાર લઈ રહેલા બાળ દર્દીનું મોત
અકસ્માત બાદ ટ્રક ચાલક ફરાર, પોલીસે તપાસ શરૂ કરી
અકસ્માત સર્જાયા બાદ ટ્રક ચાલક સ્થળ પરથી ફરાર થઈ ગયો હતો. ઘટનાની જાણ થતાં બરવાળા પોલીસ તાત્કાલિક ઘટનાસ્થળે પહોંચી હતી અને રાહત તથા બચાવ કામગીરી હાથ ધરી હતી. પોલીસે અકસ્માતગ્રસ્ત ટ્રકને હટાવવાની કામગીરી શરૂ કરી હતી જેથી માર્ગ પરનો વાહનવ્યવહાર ફરી શરૂ કરી શકાય.
પ્રાથમિક તપાસમાં ટ્રક ચાલકે કાબૂ ગુમાવવાના કારણે અકસ્માત સર્જાયો હોવાનું માનવામાં આવી રહ્યું છે. જોકે અકસ્માતનું ચોક્કસ કારણ જાણવા પોલીસે વધુ તપાસ હાથ ધરી છે. ફરાર ટ્રક ચાલકને શોધવા માટે પણ કાર્યવાહી શરૂ કરવામાં આવી હોવાનું પોલીસ સૂત્રોએ જણાવ્યું છે.
આ અકસ્માતે ફરી એક વખત માલવાહક વાહનોમાં સુરક્ષા નિયમોના પાલન અંગે પ્રશ્નો ઊભા કર્યા છે. ખાસ કરીને માલવાહક ટ્રકોની ઉપર મજૂરોને બેસાડીને મુસાફરી કરાવવી અત્યંત જોખમી હોવાનું નિષ્ણાતો સતત જણાવતા આવ્યા છે. આવા અકસ્માતોમાં ભારે માલસામાન નીચે દબાઈ જવાના કારણે જાનહાનિનું જોખમ અનેકગણું વધી જાય છે.
