ભાવનગર શહેરના એરપોર્ટ પરિસરમાં વન્યજીવ સંરક્ષણ સંબંધિત ગંભીર ઘટના સામે આવી છે. એરપોર્ટ વિસ્તારમાં કાચબાનું માંસ રાંધી તેનું સેવન કરતા ચાર પરપ્રાંતીય શ્રમિકોને વન વિભાગે ઝડપી પાડ્યા છે. ઘટનાની જાણ થતાં વન વિભાગની ટીમે તાત્કાલિક કાર્યવાહી હાથ ધરી હતી અને સ્થળ પરથી ચારેય આરોપીઓને કસ્ટડીમાં લઈ કાયદેસરની કાર્યવાહી શરૂ કરી છે. પકડાયેલા આરોપીઓની ઓળખ બિહારના રહેવાસી વિજયકુમાર મહંતો, આનંદકુમાર મહંતો, રામપુકાર પાસવાન અને રવિન પાસવાન તરીકે થઈ છે. ચારેય ભાવનગર વિસ્તારમાં શ્રમિક તરીકે કામ કરતા હોવાનું જાણવા મળ્યું છે. વન વિભાગે તેમની સામે વન્ય પ્રાણી સંરક્ષણ અધિનિયમ હેઠળ ગુનો નોંધી વધુ તપાસ હાથ ધરી છે.
આ પણ વાંચોઃ ગિરનાર જંગલમાં સિંહબાળના રહસ્યમય મોતનો કેસ : ગુનો નોંધી વન વિભાગે એક વ્યક્તિને શંકાના દાયરામાં લીધો
કાચબો કાયદાકીય રીતે સંરક્ષિત વન્યજીવ
વન વિભાગના અધિકારીઓના જણાવ્યા મુજબ કાચબો ભારતના વન્યજીવ સંરક્ષણ કાયદા હેઠળ સંરક્ષિત પ્રાણી છે. તેની શિકાર કરવો, પકડવો, મારવો, રાખવો અથવા તેનું માંસ ખાવું – તમામ કૃત્યો કાયદેસર ગુનો ગણાય છે. પ્રાથમિક તપાસ દરમિયાન કાચબો કેવી રીતે મેળવવામાં આવ્યો હતો, તેનો શિકાર ક્યાં કરવામાં આવ્યો હતો અને તેમાં અન્ય કોઈ વ્યક્તિ સંડોવાયેલી છે કે નહીં તે સહિતના મુદ્દાઓની તપાસ ચાલી રહી છે. ઘટના અંગે કાર્યવાહી કર્યા બાદ ચારેય આરોપીઓને ભાવનગર કોર્ટમાં રજૂ કરવામાં આવ્યા હતા. વન વિભાગ હવે કેસની વધુ તપાસ કરીને સમગ્ર ઘટનાક્રમની વિગતો એકત્ર કરી રહ્યું છે.
અંધશ્રદ્ધાને કારણે કૃત્ય કર્યાની શક્યતા
રેન્જ ફોરેસ્ટ ઓફિસર (RFO)એ જણાવ્યું હતું કે પ્રાથમિક તપાસમાં એવી માહિતી સામે આવી છે કે કોઈ ચોક્કસ વનસ્પતિ અથવા વન્યપ્રાણીનું સેવન કરવાથી શરીરને વિશેષ લાભ થાય છે તેવી અંધશ્રદ્ધાના આધારે આ કૃત્ય કરવામાં આવ્યું હોઈ શકે છે. જોકે આ અંગે હજુ તપાસ ચાલી રહી છે અને તમામ પાસાઓની ચકાસણી બાદ જ અંતિમ નિષ્કર્ષ સામે આવશે. ભારતના વિવિધ વિસ્તારોમાં આજે પણ કેટલીક પરંપરાગત માન્યતાઓ અથવા અંધશ્રદ્ધાઓના કારણે સંરક્ષિત પ્રાણીઓનો શિકાર થતો હોવાના કિસ્સાઓ સામે આવતા રહે છે. વન વિભાગ આવા કિસ્સાઓ સામે સતત જાગૃતિ અભિયાન તેમજ કાયદાકીય કાર્યવાહી બંને ચલાવી રહ્યું છે.
આ પણ વાંચોઃ Lion Attack 'માનવભક્ષી' સિંહને શું સજા થાય છે? : શું ખરેખર આદમખોર સિંહને થાય છે આજીવન કેદ? જાણો નિયમો અને વન વિભાગની સમગ્ર પ્રક્રિયા
વન્યજીવ સંરક્ષણનું મહત્વ
વન્યજીવો પર્યાવરણનું સંતુલન જાળવવામાં મહત્વપૂર્ણ ભૂમિકા ભજવે છે. ખાસ કરીને કાચબા જળાશયોના પર્યાવરણને સ્વચ્છ અને સંતુલિત રાખવામાં ઉપયોગી માનવામાં આવે છે. તેમના ગેરકાયદેસર શિકાર અને વેપારને કારણે અનેક પ્રજાતિઓ પર અસ્તિત્વનું સંકટ ઊભું થયું છે.
વન્યજીવ સંરક્ષણ અધિનિયમ, 1972 હેઠળ સંરક્ષિત પ્રાણીઓના શિકાર અથવા ગેરકાયદેસર ઉપયોગ બદલ કડક સજાની જોગવાઈ કરવામાં આવી છે. વન વિભાગ સમયાંતરે લોકોમાં જાગૃતિ લાવવા અપીલ પણ કરે છે કે કોઈપણ પ્રકારની અંધશ્રદ્ધા અથવા ભ્રમમાં આવીને વન્યજીવોને નુકસાન ન પહોંચાડવું જોઈએ અને આવા બનાવોની જાણ તાત્કાલિક સંબંધિત અધિકારીઓને કરવી જોઈએ. આ ઘટનાએ ફરી એકવાર વન્યજીવ સંરક્ષણ પ્રત્યે જાગૃતિ અને કાયદાના કડક અમલની જરૂરિયાત પર ભાર મૂક્યો છે. તપાસ પૂર્ણ થયા બાદ સમગ્ર ઘટનાની વધુ વિગતો સામે આવવાની શક્યતા છે.
