ફ્રાન્સના નીસ શહેરમાં વડાપ્રધાન નરેન્દ્ર મોદી અને ફ્રાન્સના રાષ્ટ્રપતિ ઇમેન્યુઅલ મેક્રોનએ સંયુક્ત રીતે ‘ભારત ઇનોવેટ્સ’ કાર્યક્રમનું ઉદ્ઘાટન કર્યું. આ કાર્યક્રમ ભારત, ફ્રાન્સ અને અન્ય દેશોના અગ્રણી સ્ટાર્ટઅપ્સ, ટેક્નોલોજી ઉદ્યોગસાહસિકો અને વેન્ચર કેપિટલ ફંડ્સને એક જ મંચ પર લાવવાના હેતુથી આયોજિત કરવામાં આવ્યો હતો. આ પહેલને ભારત-ફ્રાન્સ વ્યૂહાત્મક ભાગીદારીના નવા અધ્યાય તરીકે જોવામાં આવી રહી છે.
કાર્યક્રમને સંબોધતા વડાપ્રધાન મોદીએ કહ્યું કે વિશ્વમાં દેશો વચ્ચે વેપારિક અને વ્યૂહાત્મક સંબંધો સામાન્ય બાબત છે, પરંતુ કેટલીક ભાગીદારીઓ એવી હોય છે જે માત્ર હિતોથી નહીં પરંતુ સંયુક્ત દ્રષ્ટિકોણ અને મૂલ્યોના આધારે આગળ વધે છે. તેમણે ભારપૂર્વક જણાવ્યું કે ભારત અને ફ્રાન્સ વચ્ચેનો સંબંધ પણ એવો જ છે, જે વિશ્વાસ, નવીનતા, પ્રેરણા અને વૈશ્વિક પડકારોના ઉકેલ માટેની સંયુક્ત પ્રતિબદ્ધતા પર આધારિત છે.
ભારત-ફ્રાન્સ સંબંધોમાં ઇનોવેશનનો નવો અધ્યાય
વડાપ્રધાન મોદીએ જણાવ્યું કે છેલ્લા કેટલાક વર્ષોમાં ભારત અને ફ્રાન્સે અનેક ક્ષેત્રોમાં મળીને નવી પહેલો શરૂ કરી છે અને વૈશ્વિક પડકારોના ઉકેલો શોધવાના પ્રયાસો કર્યા છે. તેમણે કહ્યું કે બંને દેશો સતત એકબીજાના વિશ્વસનીય ભાગીદાર રહ્યા છે અને હવે ‘ભારત ઇનોવેટ્સ’ જેવી પહેલ દ્વારા આ સહકારને વધુ મજબૂત બનાવવામાં આવી રહ્યી છે.
16 મહિના પછી ફરી સામસામે હશે PM મોદી અને ટ્રમ્પ: G-7 સમિટમાં થનારી મુલાકાત પર રહેશે દુનિયાની નજર
તેમણે ફ્રાન્સના રાષ્ટ્રપતિ મૈક્રોંનો ઉલ્લેખ કરતાં કહ્યું કે અગાઉ ભારતની મુલાકાત દરમિયાન તેમણે જણાવ્યું હતું કે 21મી સદીના પડકારોનો સામનો કરવા માટે ભારત અને ફ્રાન્સે સાથે મળીને કામ કરવું પડશે. મોદીના શબ્દોમાં, ‘ભારત ઇનોવેટ્સ’ એ જ દિશામાં એક મહત્વપૂર્ણ પગલું છે, જે ભારતીય પ્રતિભા અને યુરોપિયન મૂડી વચ્ચે મજબૂત સેતુનું કામ કરશે.
વડાપ્રધાનના જણાવ્યા અનુસાર આ પ્લેટફોર્મ ભારતીય યુવાનોને યુરોપિયન નિષ્ણાતો, રોકાણકારો અને ઉદ્યોગજગત સાથે સીધું જોડાવાની તક આપશે. તેનાથી સ્ટાર્ટઅપ્સને વૈશ્વિક બજારો સુધી પહોંચવામાં અને નવી ટેક્નોલોજી આધારિત ઉકેલો વિકસાવવામાં મદદ મળશે.
ભારતના સ્ટાર્ટઅપ ઇકોસિસ્ટમને વૈશ્વિક ઓળખ
મોદીએ પોતાના સંબોધનમાં ભારતના ઝડપથી વિકસતા સ્ટાર્ટઅપ ઇકોસિસ્ટમનો પણ ઉલ્લેખ કર્યો. તેમણે કહ્યું કે આજનું ભારત એક મોટા પરિવર્તનના સમયગાળામાંથી પસાર થઈ રહ્યું છે અને દેશમાં સ્ટાર્ટઅપ ક્રાંતિ સર્જાઈ રહી છે. ભારતીય યુવાનો નવી વિચારસરણી સાથે માનવજાતને અસર કરતી સમસ્યાઓના ઉકેલો શોધી રહ્યા છે.
તેમણે ઉમેર્યું કે ભારતના યુવાનો દ્વારા વિકસાવવામાં આવતા વિશ્વસ્તરીય ઉકેલોને વૈશ્વિક મંચ પર પહોંચાડવાનું કાર્ય ‘ભારત ઇનોવેટ્સ’ કરશે. આ પહેલ માત્ર રોકાણ આકર્ષવા પૂરતી સીમિત નહીં રહે, પરંતુ જ્ઞાન, સંશોધન, ટેક્નોલોજી ટ્રાન્સફર અને આંતરરાષ્ટ્રીય સહકારને પણ પ્રોત્સાહન આપશે.
ભારત હાલમાં વિશ્વના સૌથી મોટા સ્ટાર્ટઅપ ઇકોસિસ્ટમ્સમાંનું એક છે. ફિનટેક, આર્ટિફિશિયલ ઇન્ટેલિજન્સ, ગ્રીન ટેક્નોલોજી, હેલ્થટેક અને ડીપ-ટેક જેવા ક્ષેત્રોમાં ભારતીય સ્ટાર્ટઅપ્સ વૈશ્વિક સ્તરે પોતાની ઓળખ બનાવી રહ્યા છે. આવી સ્થિતિમાં યુરોપિયન રોકાણકારો અને સંસ્થાઓ સાથે સીધો સંપર્ક ભારતીય ઉદ્યોગસાહસિકો માટે મહત્વપૂર્ણ સાબિત થઈ શકે છે.
‘ભારત-ફ્રાન્સ ઇનોવેશન વર્ષ 2026’ને મળ્યો વધુ વેગ
કાર્યક્રમ દરમિયાન કેન્દ્રીય વાણિજ્ય અને ઉદ્યોગ મંત્રી Piyush Goyalએ જણાવ્યું કે ભારત અને ફ્રાન્સના સંબંધો હવે વિશેષ વૈશ્વિક વ્યૂહાત્મક ભાગીદારીના સ્તરે પહોંચી ગયા છે. તેમણે યાદ અપાવ્યું કે ફેબ્રુઆરી 2025માં વડાપ્રધાન મોદીએ પેરિસમાં યોજાયેલી AI એક્શન સમિટની સહ-અધ્યક્ષતા કરી હતી, જ્યારે ફેબ્રુઆરી 2026માં ભારત દ્વારા આયોજિત AI ઇમ્પેક્ટ સમિટ દરમિયાન રાષ્ટ્રપતિ મૈક્રોં ભારત સાથે ઊભા રહ્યા હતા.
ગોયલે જણાવ્યું કે વર્ષ 2026ને ‘ભારત-ફ્રાન્સ ઇનોવેશન વર્ષ’ તરીકે ઉજવવામાં આવી રહ્યું છે અને ‘ભારત ઇનોવેટ્સ’ જેવી પહેલ આ ઉજવણીને વધુ અર્થપૂર્ણ બનાવે છે. તેમના અનુસાર બંને દેશો ટેક્નોલોજી, આર્ટિફિશિયલ ઇન્ટેલિજન્સ, ક્લીન એનર્જી, ડિજિટલ ઇકોનોમી અને સ્ટાર્ટઅપ્સ જેવા ક્ષેત્રોમાં સહકારને નવી ઊંચાઈએ લઈ જવા માટે પ્રતિબદ્ધ છે.
ભારત-ફ્રાન્સની ઐતિહાસિક દોસ્તી: 114 રાફેલ જેટ સાથે AI અને 12 નવી ડીલ
વૈશ્વિક ઇનોવેશન હબ બનવાની દિશામાં ભારત
નીસમાં યોજાયેલ આ કાર્યક્રમ માત્ર એક ઔપચારિક ઉદ્ઘાટન નહીં પરંતુ ભારતને વૈશ્વિક ઇનોવેશન હબ તરીકે સ્થાપિત કરવાની વ્યૂહરચનાનો ભાગ માનવામાં આવે છે. ભારત અને ફ્રાન્સ વચ્ચે વધતી ભાગીદારી એ દર્શાવે છે કે બંને દેશો ટેક્નોલોજી આધારિત ભવિષ્ય, ટકાઉ વિકાસ અને વૈશ્વિક પડકારોના સંયુક્ત ઉકેલો માટે લાંબા ગાળાના સહકાર તરફ આગળ વધી રહ્યા છે.
‘ભારત ઇનોવેટ્સ’ દ્વારા ભારતીય સ્ટાર્ટઅપ્સને યુરોપિયન બજારોમાં પ્રવેશ, રોકાણની નવી તકો અને આંતરરાષ્ટ્રીય નેટવર્કિંગનો લાભ મળશે. સાથે જ ફ્રાન્સ અને યુરોપના રોકાણકારોને ભારતની ઝડપથી વિકસતી નવીનતા અર્થવ્યવસ્થામાં ભાગીદાર બનવાની તક મળશે.
