IPL 2026 Bangladesh Broadcast : IPL 2026 ની શરૂઆત 28 માર્ચના રોજ થઈ હતી, અને તે જ દિવસે સમાચાર આવ્યા હતા કે, બાંગ્લાદેશની નવી સરકારે IPL ના ટેલિકાસ્ટ પરથી પ્રતિબંધ હટાવી લીધો હતો. પ્રસારણ મંત્રીએ રમત અને રાજકારણને અલગ રાખવાની વાત કહી હતી. પરંતુ માત્ર 48 કલાક એટલે કે બે દિવસ પછી, સોમવાર, 30 માર્ચના રોજ, રિપોર્ટ્સ આવ્યા કે બાંગ્લાદેશમાં IPL ના ટેલિકાસ્ટના બેન હટાવવાના નિર્ણય પર મોટો યુ-ટર્ન લેવામાં આવ્યો છે. જાણો બે દિવસમાં નિર્ણય કેમ પાછો ખેંચી લેવામાં આવ્યો.
JioStar એ બાંગ્લાદેશ સાથેનો કરાર રદ કર્યો
રિપોર્ટ્સ સૂચવે છે કે, ભારતના JioStar એ બાંગ્લાદેશમાં IPL ટેલિકાસ્ટ કરવાનો પોતાનો કરાર રદ કર્યો છે. જેના કારણે ભારતના પડોશી દેશમાં ટુર્નામેન્ટનું ટેલિકાસ્ટ લગભગ અશક્ય બની ગયું છે. રિપોર્ટ્સ અનુસાર, JioStar એ બાંગ્લાદેશના બ્રોડકાસ્ટર ટીસ્પોર્ટ્સને એક પત્ર મોકલીને જણાવ્યું હતું કે, "કરાર તાત્કાલિક અસરથી સમાપ્ત થાય છે. આ નિર્ણયનું કારણ કરારમાં નિર્ધારિત ચુકવણીની સમયમર્યાદાનું પાલન ન કરવું અને ચુકવણીમાં ડિફોલ્ટ હતું." આ સાથે, એવું કહેવામાં આવ્યું હતું કે, આ નિયમ મહિલા IPL એટલે કે મહિલા પ્રીમિયર લીગ પર પણ લાગુ પડે છે.
આ પણ ખાસ વાંચો : ભારત સામે બાંગ્લાદેશના તેવર નરમ! : ખેલ અને રાજકારણને અલગ રાખવા સરકારનો મહત્વનો નિર્ણય
બાંગ્લાદેશમાં IPL ટેલિકાસ્ટ પર બેન કેમ મૂકવામાં આવ્યો?
IPL 2026 ના ઓક્શનમાં, કોલકાતા નાઈટ રાઈડર્સે બાંગ્લાદેશી ખેલાડી મુસ્તફિઝુર રહેમાનને ₹9.20 કરોડમાં ખરીદ્યો હતો. આ સમયે, બાંગ્લાદેશમાં હિંસક વિરોધ પ્રદર્શનો થઈ રહ્યા હતા, જેમાં લઘુમતી હિન્દુ વસ્તી પર અત્યાચારના રિપોર્ટ્સ હતા. આ જોઈને, ભારતમાં વિરોધ તેજ થયો કે બાંગ્લાદેશી ખેલાડીઓ IPL માં નહીં રમે, અને આ બન્યું પણ એવું જ. BCCI ના આદેશ પર, KKR એ મુસ્તફિઝુરને રિલીઝ કર્યો, ત્યારબાદ બાંગ્લાદેશ સરકારે તેના દેશમાં IPL ના ટેલિકાસ્ટ પર પ્રતિબંધ મૂકવાનો નિર્ણય લીધો હતો.
