S. Sreesanth : ભારતીય ક્રિકેટ જગતમાં વિવાદો, આકરા નિવેદનો અને ખેલાડીઓ વચ્ચેની આંતરિક ખેંચતાણ હંમેશાં હેડલાઇન્સમાં રહે છે. તાજેતરમાં પૂર્વ ભારતીય ફાસ્ટ બોલર એસ શ્રીસંતે એક સનસનાટીભર્યા ઇન્ટરવ્યૂમાં ટીમ ઈન્ડિયાના વર્તમાન હેડ કોચ ગૌતમ ગંભીરની રણનીતિ અને કોચિંગ શૈલી પર ગંભીર સવાલો ઉઠાવ્યા છે. આ આક્ષેપોની સાથે જ તેણે પોતાના જૂના કટ્ટર પ્રતિસ્પર્ધી હરભજન સિંહને ક્રિકેટના મેદાનની બહાર બોક્સિંગ રિંગમાં આમને-સામને મુકાબલો કરવા માટે ખુલ્લો પડકાર ફેંકી દીધો છે, જેને કારણે ક્રિકેટપ્રેમીઓમાં ભારે ચર્ચા જાગી છે.
ભારતને કોચ નહીં પરંતુ મેન્ટરની જરૂર છે
43 વર્ષના પૂર્વ સ્પીડસ્ટર એસ શ્રીસંતે ટીમ ઈન્ડિયાના મુખ્ય કોચ ગૌતમ ગંભીરની કડક કાર્યશૈલી સામે પોતાનો આકરો વિરોધ નોંધાવ્યો છે. મીડિયાને આપેલા ઇન્ટરવ્યૂમાં તેણે સ્પષ્ટ શબ્દોમાં જણાવ્યું કે, ભારતને અત્યારે કોઈ રૂઢિચુસ્ત કે પરંપરાગત કોચની જરૂર નથી, પરંતુ ખેલાડીઓને માનસિક ટેકો આપી શકે તેવા એમએસ ધોની જેવા મેન્ટરની જરૂર છે. શ્રીસંતના મતે, આંતરરાષ્ટ્રીય સ્તરના ખેલાડીઓ ઓલરેડી ટેકનિકલી સક્ષમ હોય છે, તેથી તેમના પર વધારાનું માનસિક દબાણ લાવવાને બદલે તેમને મુક્તપણે રમવાનું માર્ગદર્શન અને અતૂટ વિશ્વાસ આપે તેવું શાંત નેતૃત્વ ટીમ માટે વધુ ફાયદાકારક સાબિત થઈ શકે છે.
ટેસ્ટ સિરીઝમાં પરાજય અને કોચિંગ પર સવાલો
શ્રીસંતે ભારતીય ટેસ્ટ ટીમના તાજેતરના નબળા પ્રદર્શનને રેખાંકિત કરીને ગૌતમ ગંભીરની રણનીતિઓ પર આકરા પ્રહારો કર્યા હતા. તેણે ન્યૂઝીલેન્ડ અને સાઉથ આફ્રિકા સામે મળેલી કારમી સિરીઝ હારનો ઉલ્લેખ કરીને ગંભીરની મેનેજમેન્ટ સ્ટાઇલ સામે સખત વાંધો ઉઠાવ્યો છે. ભારતીય ટીમ ગયા વર્ષે ઘરઆંગણે રમાયેલી ટેસ્ટ સિરીઝમાં સાઉથ આફ્રિકા સામે 2-0થી પ્રવાસી ટીમ સામે ઘૂંટણિયે પડી ગઈ હતી. પોતાના જ ઘરમાં મળેલી આ શરમજનક હારને કારણે તે સમયે પણ ગંભીરના પ્લાનિંગ અને ડિસિપ્લિનરી કોચિંગ મોડલ સામે ક્રિકેટ વિવેચકોએ આંગળીઓ ચીંધી હતી.
આ પણ ખાસ વાંચો : IPL 2027માં યુવરાજ સિંહની વાપસી લગભગ ફાઈનલ... : 'ફ્લોપ' ટીમે આપી મોટી ઓફર
સાઉથ આફ્રિકાનો ભારત પ્રવાસ (ટેસ્ટ સિરીઝ)
ટેસ્ટ મેચ | વેન્યુ (મેદાન) | પરિણામ |
|---|---|---|
પહેલી ટેસ્ટ | કોલકાતા | 30 રનથી સાઉથ આફ્રિકા વિજેતા |
બીજી ટેસ્ટ | ગુવાહાટી | 408 રનથી સાઉથ આફ્રિકા વિજેતા |
ટીમ મેનેજમેન્ટમાં મોટા ભાઈ જેવો આત્મીય સંબંધ જરૂરી
કોચ અને ખેલાડીઓ વચ્ચેના બોન્ડિંગ વિશે વાત કરતા શ્રીસંતે ભારપૂર્વક કહ્યું કે, ડ્રેસિંગ રૂમનું વાતાવરણ કડક ઓફિસ જેવું નહીં પણ એક પરિવાર જેવું હોવું જોઈએ, જ્યાં કોચનો સંબંધ મોટા ભાઈ જેવો આત્મીય હોય. માત્ર ટીમની જીત વખતે ઉત્સાહ બતાવવો અને હાર થાય ત્યારે ખેલાડીઓ સામે ગુસ્સો કે નારાજગી વ્યક્ત કરવી તે કોઈ આદર્શ નેતૃત્વના લક્ષણો નથી. ખેલાડીઓને મુશ્કેલ સમયમાં બોર્ડ અને કોચ તરફથી સહયોગ તથા ભરોસાની આશા હોય છે. તેણે પૂર્વ કેપ્ટન મહેન્દ્ર સિંહ ધોનીનું શ્રેષ્ઠ ઉદાહરણ આપતા ઉમેર્યું કે, ભારતીય ટીમે મેળવેલી અગણિત ઐતિહાસિક સફળતાઓ પાછળ ધોનીની આ જ કૂલ અને સપોર્ટિવ વિચારસરણી સૌથી મોટું હથિયાર રહી હતી.
આ પણ ખાસ વાંચો : રોહિત-કોહલીના ભવિષ્ય પર આખરે BCCIએ તોડ્યું મૌન : ‘રોહિતની છેલ્લી મેચ’ના વાયરલ દાવા વચ્ચે 2027 વર્લ્ડ કપ અંગે આપી મોટી સ્પષ્ટતા
વર્લ્ડ કપની જીતમાં સામૂહિક યોગદાનની ઉપેક્ષા કેમ?
શ્રીસંતે 2026 T20 વર્લ્ડ કપની ભવ્ય જીતનો તમામ શ્રેય એકમાત્ર હેડ કોચ ગૌતમ ગંભીરને આપવાના ટ્રેન્ડ સામે પણ આકરા સવાલો ઉભા કર્યા છે. તેનું માનવું છે કે મેદાન પર પરસેવો પાડનારા ખેલાડીઓ અને દબાણની સ્થિતિમાં નિર્ણયો લેનારા કેપ્ટનના યોગદાનને ક્યારેય નજરઅંદાજ ન કરી શકાય. શ્રીસંતે સવાલ પૂછતાં કહ્યું કે, “જ્યારે ટીમે વર્લ્ડ કપ જીત્યો ત્યારે આખી મીડિયાએ બધો જ ક્રેડિટ ગંભીરના ખાતામાં નાખી દીધો. પરંતુ જો સંજુ સેમસનની મહત્વની ઇનિંગ્સ ન હોત, સૂર્યકુમાર યાદવે શાનદાર કેપ્ટનશીપ ન કરી હોત અને યોગ્ય સમયે બોલિંગમાં સ્માર્ટ ફેરફારો ન થયા હોત, તો શું ભારત ચેમ્પિયન બની શક્યું હોત?”
હરભજન સિંહને બોક્સિંગ રિંગમાં ઉતરવાનો ઓપન ચેલેન્જ
મીડિયા ચેનલ સાથેના આ લાઇવ ઇન્ટરવ્યૂ દરમિયાન જ્યારે એન્કરે શ્રીસંતને હરભજન સિંહ સાથે બોક્સિંગ ગ્લવ્ઝ પહેરેલી તેની એક જૂની પ્રમોશનલ તસવીર સ્ક્રીન પર બતાવી, ત્યારે શ્રીસંતનો પારો સાતમા આસમાને પહોંચી ગયો હતો. તેણે કોઈપણ ખચકાટ વિના કેમેરા સામે જ હરભજન સિંહને લલકારતા કહ્યું, "શું તમારામાં સાચે જ હિંમત છે? શું તમે મારી સાથે પ્રોફેશનલ રિંગમાં ઉતરી શકો છો? શું તમે ઓફિશિયલ કોન્ટ્રાક્ટ સાઇન કરીને આવી શકો છો? હું તમને ખુલ્લો પડકાર આપું છું, આ જ ગ્લવ્ઝ પહેરીને મારી સામે મુકાબલો કરવા આવી જાવ." શ્રીસંતે એ પણ સ્પષ્ટ કર્યું કે તે હાલમાં વૈશ્વિક સ્તરની 'બેયર નકલ ફાઇટ લીગ' (Bare Knuckle Fight League) સાથે ઓફિશિયલી જોડાયેલો છે અને કોમ્બેટ સ્પોર્ટ્સની દુનિયામાં સતત ટ્રેનિંગ લઈ રહ્યો છે.
IPL ઇતિહાસનો સૌથી મોટો 'સ્લેપગેટ' વિવાદ
શ્રીસંત દ્વારા આપવામાં આવેલો આ નવો પડકાર ક્રિકેટ ઇતિહાસના સૌથી ચર્ચિત અને કાળા પ્રકરણ ગણાતા IPL-2008 ના 'સ્લેપગેટ' મામલાને ફરી એકવાર જીવંત કરે છે. આ વિવાદ વર્ષ 2008માં પ્રથમ IPL સીઝન દરમિયાન શરૂ થયો હતો, જ્યારે મુંબઈ ઈન્ડિયન્સ અને કિંગ્સ ઈલેવન પંજાબ વચ્ચેની હાઈ-વોલ્ટેજ મેચ પૂરી થયા બાદ હરભજન સિંહે ગ્રાઉન્ડ પર જ સરેઆમ શ્રીસંતને જોરદાર થપ્પડ મારી દીધી હતી. તે સમયે રડતા શ્રીસંતની તસવીરોએ સમગ્ર ખેલ જગતને હચમચાવી દીધું હતું અને તે IPLના ઇતિહાસની સૌથી વિવાદાસ્પદ ક્ષણ બની ગઈ હતી, જેનો બદલો લેવા શ્રીસંત આજે પણ આતુર દેખાઈ રહ્યો છે.
આ પણ ખાસ વાંચો : "Somebody" એ કરવું પડશે અસાધારણ પ્રદર્શન! : કિશનના ધમાકેદાર ફોર્મથી રોહિત, યશસ્વી, રાહુલ કે શ્રેયસ કોનું સ્થાન સૌથી વધુ જોખમમાં?
શ્રીસંતની આંતરરાષ્ટ્રીય ક્રિકેટ કરિયર અને રેકોર્ડ્સ
વિવાદોની વચ્ચે એ વાત નકારી શકાય તેમ નથી કે જમણા હાથના આ આક્રમક ફાસ્ટ બોલરે ભારતને બે વખત વિશ્વ વિજેતા બનાવવામાં અતિ મહત્વની ભૂમિકા ભજવી છે. તે 2007માં રમાયેલા સૌપ્રથમ T20 વર્લ્ડ કપ અને 2011ના વનડે વર્લ્ડ કપની ફાઇનલ વિજેતા ટીમ ઈન્ડિયાનો સક્રિય ભાગ રહ્યો છે.
ટેસ્ટ ફોર્મેટ : તેણે ભારત માટે 27 ટેસ્ટ મેચ રમીને કુલ 87 વિકેટ ઝડપી છે, જેમાં 5/40 તેનું સર્વશ્રેષ્ઠ પ્રદર્શન રહ્યું છે અને તેનો ઇકોનોમી રેટ 3.87 નો છે.
વનડે ફોર્મેટ : 53 વનડે આંતરરાષ્ટ્રીય મેચોમાં તેણે 75 શિકાર કર્યા છે, જેમાં 6/55 તેનું બેસ્ટ બોલિંગ ફિગર છે અને ઇકોનોમી રેટ 6.07 છે.
T20 આંતરરાષ્ટ્રીય અને IPL : ભારત માટે 10 આંતરરાષ્ટ્રીય T20 માં 7 વિકેટ (8.47 ઇકોનોમી) અને પોતાની કરિયરમાં રમેલી 44 IPL મેચોમાં શ્રીસંતે 40 વિકેટ પોતાના નામે કરી છે.
સ્પોટ ફિક્સિંગનો કલંક, લાંબી કાનૂની લડાઈ અને પ્રતિબંધ
મે 2013માં રમાયેલી IPL ટૂર્નામેન્ટ દરમિયાન શ્રીસંતની લાઈફમાં મોટો ટર્નિંગ પોઈન્ટ આવ્યો જ્યારે તેના પર સ્પોટ ફિક્સિંગના ગંભીર આરોપો લાગ્યા. દિલ્હી પોલીસે હોટેલમાંથી તેની ધરપકડ કરી હતી અને ત્યારબાદ કડક વલણ અપનાવીને BCCIએ તેના પર ક્રિકેટ રમવા માટે લાઇફ ટાઇમ (આજીવન) પ્રતિબંધ લાદી દીધો હતો. જોકે, શ્રીસંતે હાર ન માની અને પોતાના સન્માન માટે કોર્ટમાં લાંબી કાનૂની લડાઈ લડી, જેના પરિણામે વર્ષ 2015 માંસ્પેશિયલ કોર્ટે તેને તમામ ગુનાહિત આરોપોમાંથી પુરાવાના અભાવે મુક્ત કર્યો હતો. ત્યારબાદ, વર્ષ 2018માં કેરળ હાઈકોર્ટે તેના પર લાગેલા આજીવન પ્રતિબંધને સત્તાવાર રીતે હટાવી લીધો હતો. વર્ષ 2019માં સુપ્રીમ કોર્ટે પણ હસ્તક્ષેપ કરીને ક્રિકેટ બોર્ડને તેની સજાની અવધિ ઓછી કરવા નિર્દેશ આપ્યો હતો. સુપ્રીમ કોર્ટના દબાણ બાદ બોર્ડે આજીવન પ્રતિબંધ ઘટાડીને માત્ર 7 વર્ષનો કર્યો, જે સપ્ટેમ્બર 2020માં સત્તાવાર રીતે સમાપ્ત થઈ ગયો હતો. જોકે વિવાદોએ તેનો પીછો ન છોડ્યો અને આશરે 3 વર્ષ પહેલાં કેરળ પોલીસ મથકે તેના વિરુદ્ધ છેતરપિંડી અને ઠગાઈનો એક નવો ગુનો પણ નોંધાયો હતો.
