ગુરુવારે રાત્રે જેસલમેરના નાચનાથી અમદાવાદ આવી રહેલી ખાનગી લક્ઝરી સ્લીપર બસમાં શુક્રવારે વહેલી સવારે બનાસકાંઠા જિલ્લાના ધાનેરા નજીક નેનાવા ગામ નજીક રાષ્ટ્રીય ધોરીમાર્ગ પર બસમાં આગ લાગી હતી. આ આગ એટલી ભયાનક હતી કે ઘટનામાં 1 મુસાફરનું ઘટનાસ્થળે જ મોત નીપજ્યું ત્યારે અંદાજિત 6 જેટલા અન્ય મુસાફરો ગંભીર રીતે દાઝી ગયા હતા.
આ અકસ્માત શુકરવાર વહેલી સવારે 3:30 વાગ્યાની આસપાસ થયો હતો, જ્યારે બસમાં સવાર 16 મુસાફરો ભરપૂર ઊંઘમાં હતા. પ્રાથમિક માહિતી મુજબ બસના એર કન્ડીશનર (AC)માં શોર્ટ સર્કિટને કારણે આગ લાગી હોવાનું જાણવા મળ્યું છે.
આ અકસ્માત એટલો અચાનક થયો કે મુસાફરોને વિચારવાની તક પણ ન મળી. થોડી જ વારમાં આખી બસ આગની લપેટમાં આવી ગઈ. બસમાં 16 મુસાફરો સવાર હતા. આગ લાગતાની સાથે જ ઘટનાસ્થળે નાસભાગ અને ચીસાચીસ મચી ગઈ હતી.
બારીમાંથી કૂદીને પોતાનો જીવ બચાવ્યો
બસમાં આગ લાગ્યા પછી, મોટાભાગના મુસાફરોએ પોતાનો જીવ બચાવવા માટે બારીઓમાંથી કૂદી પડ્યા. આ અફરાતફરીમાં એક મુસાફર આગની લપેટમાં આવી જતાં તેનું બસની અંદર જ મૃત્યુ થયું હતું.
