મણિપુરમાં આસામ રાઇફલ્સના કાફલા પર હુમલો થયો છે. એવું કહેવામાં આવી રહ્યું છે કે, કાફલા પર ભારે ગોળીબાર કરવામાં આવ્યો હતો. આ હુમલામાં અનેક સૈનિકો ઘાયલ થયા છે. અહેવાલો મુજબ એક સૈનિક પણ શહીદ થયો છે. અહેવાલો અનુસાર આ હુમલો નંબોલ સબલ લીકાઈ વિસ્તારમાં થયો હતો. આ હુમલામાં 33 મી આસામ રાઇફલ્સના સૈનિકોને નિશાન બનાવવામાં આવ્યા હતા.
પૂર્વ મુખ્યમંત્રીએ કર્યુ ટ્વીટ
મણિપુરના પૂર્વ મુખ્યમંત્રી એન. બિરેન સિંહે સોશિયલ મીડિયા પર લખ્યું કે, "નંબોલ સબલ લીકાઈમાં આપણા બહાદુર 33મી આસામ રાઇફલ્સના સૈનિકો પર થયેલા હુમલાના સમાચાર સાંભળીને મને ખૂબ જ આઘાત લાગ્યો છે. બે સૈનિકોની શહાદત અને અન્ય ઘણા લોકોને ઇજા થવાથી આપણે બધાને ખૂબ જ આઘાત લાગ્યો છે. હું શહીદોના પરિવારો પ્રત્યે મારી ઊંડી સંવેદના વ્યક્ત કરું છું અને ઘાયલોને ઝડપથી સ્વસ્થ થવા માટે પ્રાર્થના કરું છું. તેમની હિંમત અને બલિદાન હંમેશા આપણા હૃદયમાં રહેશે. આ ઘૃણાસ્પદ કૃત્યના ગુનેગારોને કડક સજા મળવી જોઈએ."
બે સૈનિકો શહીદ થયા હોવાના અહેવાલ
પ્રાપ્ત માહિતી અનુસાર, હુમલો અચાનક હતો અને પૂર્વયોજિત હોવાનું જણાય છે. આ ઘટનામાં ઓછામાં ઓછા બે સૈનિકો શહીદ થયા હોવાના અહેવાલ છે. ઘાયલ સૈનિકોને તાત્કાલિક હોસ્પિટલમાં લઈ જવામાં આવ્યા હતા, જ્યાં તેમની સારવાર ચાલી રહી છે. ઘટના બાદ વિસ્તારમાં પેટ્રોલિંગ વધારી દેવામાં આવ્યું છે. પોલીસના જણાવ્યા અનુસાર, આ ઘટના સાંજે 5:40 વાગ્યે બની હતી જ્યારે નામ્બોલ સબલ લેઇકાઈમાં સૈનિકોને લઈ જતી ટ્રક પર હુમલો કરવામાં આવ્યો હતો. આ હુમલો ઇમ્ફાલ એરપોર્ટથી આશરે 8 કિલોમીટર દૂર એક ઓચિંતો હુમલો હતો. જોકે, હુમલાખોરોની હજુ સુધી ઓળખ થઈ નથી અને કોઈએ જવાબદારી સ્વીકારી નથી. ગયા વર્ષે 3 મે, 2023 ના રોજ મણિપુરમાં હિંસા ફાટી નીકળ્યા પછી કેન્દ્રીય સુરક્ષા દળો પર આ સૌથી મોટો અને ઘાતક હુમલો છે.
