'રશિયા અને ઈરાન સસ્તું તેલ આપવા તૈયાર, ભારત કેમ નથી ખરીદતું' : પેટ્રોલ-ડીઝલના ભાવ વધારા પર અરવિંદ કેજરીવાલનો કેન્દ્રને સવાલ

દેશભરમાં પેટ્રોલ અને ડીઝલના વધતા ભાવોને લઈને રાજકારણ ગરમાયું છે. આમ આદમી પાર્ટીના રાષ્ટ્રીય સંયોજક અરવિંદ કેજરીવાલએ ઈંધણના ભાવ વધારા મુદ્દે કેન્દ્ર સરકાર પર સવાલો ઉઠાવ્યા છે. કેજરીવાલે જણાવ્યું હતું કે સમગ્ર દેશમાં પેટ્રોલ અને ડીઝલના ભાવમાં ફરી એકવાર આશરે 2.5 રૂપિયાનો વધારો કરવામાં આવ્યો છે જ્યારે છેલ્લા કેટલાક દિવસોમાં કુલ મળીને અંદાજે 7.5 રૂપિયાનો વધારો નોંધાયો છે. સતત વધી રહેલા ઈંધણના ભાવોનાં કારણે સામાન્ય લોકો, મધ્યમવર્ગ અને નાના વેપારીઓ પર ભારે આર્થિક બોજ વધી રહ્યો છે.

અરવિંદ કેજરીવાલે સવાલ ઉઠાવતા કહ્યું હતું કે રશિયા અને ઈરાન જેવા દેશો ભારતને સસ્તા દરે તેલ અને ગેસ આપવા તૈયાર હોવાનું કહેવાઈ રહ્યું છે તો પછી ભારત સરકાર તે ખરીદી કેમ નથી રહી? તેમણે પૂછ્યું હતું કે એવી કઈ મજબૂરી છે જેના કારણે દેશની 140 કરોડ જનતાને મોંઘવારીનો બોજ સહન કરવો પડી રહ્યો છે.

આ પણ વાંચો: ગુજરાતના આ જિલ્લામાં પેટ્રોલની 'સદી'! : ડીઝલ પર એકદમ નજીક, 11 દિવસમાં ₹8નો વધારો

ઈંધણના ભાવ વધારાથી મોંઘવારી વધવાની ચિંતા

કેજરીવાલે આરોપ લગાવ્યો હતો કે પેટ્રોલ અને ડીઝલના વધતા ભાવોનો સીધો પ્રભાવ સામાન્ય લોકોના જીવન પર પડી રહ્યો છે. ટ્રાન્સપોર્ટેશન ખર્ચ વધતા શાકભાજી, દૂધ, અનાજ અને અન્ય જીવનજરૂરી ચીજવસ્તુઓ પણ મોંઘી બનવાની શક્યતા વધી રહી છે.

તેમણે જણાવ્યું હતું કે દેશમાં પહેલેથી જ મોંઘવારીનો માહોલ છે અને લોકો ઘરખર્ચ ચલાવવામાં મુશ્કેલી અનુભવી રહ્યા છે. આવી સ્થિતિમાં વારંવારના ઈંધણ ભાવ વધારા સામાન્ય જનતા માટે વધુ મુશ્કેલી ઊભી કરી રહ્યા છે. રાજકીય વિશ્લેષકોના મતે, પેટ્રોલ-ડીઝલના ભાવનો મુદ્દો હંમેશા રાજકીય રીતે સંવેદનશીલ રહ્યો છે. ઈંધણના ભાવ વધે ત્યારે તેનો પ્રભાવ સીધો મતદારોના દૈનિક જીવન પર પડે છે, જેના કારણે વિરોધ પક્ષો સરકારને ઘેરવાનો પ્રયાસ કરતા હોય છે.

આ પણ વાંચો: 'આ તો પબ્લિકને મારી નાંખવાની વાત' : પેટ્રોલ-ડીઝલમાં ભાવ વધારાથી કંટાળેલા લોકોએ ઠાલવ્યો રોષ

રશિયા-ઈરાનથી તેલ ખરીદી મુદ્દે ચર્ચા તેજ

રશિયા અને ઈરાન પાસેથી સસ્તું ક્રૂડ ઓઈલ ખરીદવાના મુદ્દે છેલ્લા કેટલાક વર્ષોમાં આંતરરાષ્ટ્રીય સ્તરે પણ ચર્ચાઓ ચાલી રહી છે. ભારત સહિત અનેક દેશો વૈશ્વિક બજારની સ્થિતિ, પ્રતિબંધો અને આંતરરાષ્ટ્રીય રાજદ્વારી પરિસ્થિતિને ધ્યાનમાં રાખીને ઊર્જા ખરીદી સંબંધિત નિર્ણયો લેતા હોય છે.

આંતરરાષ્ટ્રીય ક્રૂડ ઓઈલના ભાવ, ચલણ વિનિમય દર, ટેક્સ માળખું અને આયાત ખર્ચ જેવા અનેક પરિબળો ભારતમાં પેટ્રોલ અને ડીઝલના અંતિમ ભાવને અસર કરે છે. તેથી માત્ર ક્રૂડ ઓઈલ ખરીદી પૂરતી બાબત નહીં પરંતુ સમગ્ર વૈશ્વિક ઊર્જા બજારનો પ્રભાવ પણ મહત્વપૂર્ણ રહે છે.

આ દરમિયાન સામાન્ય લોકોમાં પણ ઈંધણના સતત વધતા ભાવોને લઈને ચિંતા વધી રહી છે. ખાસ કરીને રોજિંદા વાહન ઉપયોગ કરતા લોકો, ટ્રાન્સપોર્ટ વ્યવસાય અને મધ્યમવર્ગીય પરિવારો માટે વધતો ઈંધણ ખર્ચ મોટો આર્થિક પડકાર બની રહ્યો છે.