Apple's new store will open in Noida: ટેક જાયન્ટ નોઈડામાં એક નવો સ્ટોર ખોલીને ભારતમાં તેની હાજરી વધારી રહી છે. એપલે જાહેરાત કરી છે કે, તેનો આગામી સ્ટોર નોઈડાના DLF મોલ ઓફ ઈન્ડિયામાં સ્થિત હશે. કંપનીએ હાલમાં બેંગલુરુ અને પુણેમાં સ્ટોર ખોલ્યા છે, અને આ ભારતમાં તેનો પાંચમો સ્ટોર હશે. નવા સ્ટોરનો દેખાવ બેંગલુરુના સ્ટોર જેવો જ મોરના પીંછાની ડિઝાઇનથી પ્રેરિત હશે. એપલ છેલ્લા કેટલાક સમયથી ભારતમાં તેની પકડને સતત મજબૂત બનાવી રહી છે.
નોઈડા સ્ટોર ક્યારે ખુલશે?
એપલે જાહેરાત કરી કે, તેનો નોઈડા રિટેલ સ્ટોર ગ્રાહકો માટે 11 ડિસેમ્બરે બપોરે 1 વાગ્યે ખુલશે. ગ્રાહકો કંપનીના નવા પ્રોડક્ટસ જોઈ શકશે અને ક્રિએટિવ સેશનમાં ભાગ લઈ શકશે. ગ્રાહકો iPhone 17 સીરિઝ, M5-પાવર્ડ iPad Pro અને 14 ઇંચ MacBook Pro સહિત અન્ય પ્રોડક્ટસ જોઈ શકશે. ગ્રાહકોને ફોટોગ્રાફીથી લઈને કોડિંગ સુધીના વિષયો પર ટુડે એટ એપલ સેશન અને ફ્રી વર્કશોપમાં ભાગ લેવાની તક પણ મળશે. અન્ય સ્ટોર્સની જેમ, નોઈડા સ્ટોરના ગ્રાહકો કંપનીના સ્પેશિયાલિસ્ટ, ક્રિએટિવ, જીનિયસ અને બિઝનેસ એક્સપર્ટ પાસેથી પ્રોડક્ટ અને રીપેરની સલાહ મેળવી શકશે.
આવતા વર્ષે મુંબઈમાં બીજો સ્ટોર ખુલશે
એપલ હાલમાં મુંબઈ, દિલ્હી, બેંગલુરુ અને પુણેમાં ચાર સ્ટોર ચલાવે છે. આ નોઈડામાં તેનો પાંચમો સ્ટોર હશે, અને કંપની આવતા વર્ષે મુંબઈમાં બીજો સ્ટોર ખોલશે. સ્ટોર્સ ઉપરાંત, કંપની ભારતમાં તેના ઓનલાઈન રિટેલ ઇકોસિસ્ટમનો પણ વિસ્તાર કરી રહી છે. ગ્રાહકો એપલ સ્ટોર એપ અને એપલ સ્ટોર ઓનલાઈન દ્વારા પ્રોડક્ટસનો ઓર્ડર આપી શકે છે અને તેમના ઘરના આરામથી સપોર્ટ મેળવી શકે છે. આ ઉપરાંત, એપલ ભારતમાં તેના આઇફોનનું પ્રોડક્શન પણ વધારી રહ્યું છે. આ પહેલી વાર છે, જ્યારે iPhone 17 સીરિઝના બધા મોડલ ભારતમાં બનાવવામાં આવી રહ્યા છે. થોડા દિવસો પહેલાના રિપોર્ટ્સમાં સૂચવવામાં આવ્યું હતું કે, આવતા વર્ષે લોન્ચ થનારા ફોલ્ડેબલ આઇફોનનું ઉત્પાદન ભારતમાં પણ થઈ શકે છે.
