તમારા હાથમાં રહેલા iPhoneના અનુભવને વધુ આધુનિક બનાવવા માટે Apple હવે ડિવાઇસની એક નવી શ્રેણી તૈયાર કરી રહ્યું છે. કંપનીનું લક્ષ્ય છે કે યુઝર્સ માત્ર સ્માર્ટફોન પર નિર્ભર ન રહેતા તેની સાથે કનેક્ટ થઈ શકે તેવા અન્ય પહેરી શકાય તેવા પ્રોડક્ટ્સનો પણ ઉપયોગ કરે. આ રણનીતિના ભાગરૂપે Apple હાલમાં ત્રણ મહત્વકાંક્ષી પ્રોડક્ટ્સ પર કામ કરી રહ્યું છે. આ યાદીમાં એક જૂના પ્રોડક્ટનું અપગ્રેડેડ વર્ઝન હશે જ્યારે બે સાવ નવા ગેજેટ્સ માર્કેટમાં ડેબ્યુ કરશે. આ તમામ પ્રોડક્ટ્સની ખાસિયત એ હશે કે તે અત્યાધુનિક Siri ડિજિટલ આસિસ્ટન્ટથી સજ્જ હશે.
વિઝ્યુઅલ ઇન્ટેલિજન્સ ધરાવતા AirPods
Apple દ્વારા AirPodsમાં ક્રાંતિકારી ફેરફાર કરવાની તૈયારીઓ ચાલી રહી છે. આગામી સમયમાં જોવા મળનારા આ નવા AirPodsમાં બિલ્ટ-ઇન કેમેરા આપવામાં આવશે. જોકે આ કેમેરા સામાન્ય ફોટોગ્રાફી માટે નહીં પરંતુ IR-બેઝ્ડ લેન્સ ટેકનોલોજી પર આધારિત હશે. તેનો મુખ્ય હેતુ વિઝ્યુઅલ ઇન્ટેલિજન્સ પૂરી પાડવાનો છે જે યુઝર્સને તેમની આસપાસની વસ્તુઓ સમજવામાં મદદ કરશે. બજારના વિશ્લેષકોનું માનવું છે કે આ વર્ષના અંત સુધીમાં આ પ્રોડક્ટ રજૂ કરવામાં આવી શકે છે પરંતુ હજુ સુધી Apple તરફથી કોઈ સત્તાવાર તારીખ જાહેર કરવામાં આવી નથી.
પન્ડન્ટ સ્ટાઇલનું નવું સ્માર્ટ ડિવાઇસ
વેરેબલ ટેકનોલોજીમાં Apple એક નવો પ્રયોગ કરવા જઈ રહ્યું છે. કંપની એક એવું સ્માર્ટ પન્ડન્ટ બનાવી રહી છે જેને ગળામાં હારની જેમ પહેરી શકાશે અથવા જરૂરિયાત મુજબ કપડાં પર ક્લિપ કરી શકાશે. આ ઉપકરણ દેખાવમાં AirTag જેવું હોઈ શકે છે પરંતુ તેમાં કેમેરા, માઇક્રોફોન અને સ્પીકર્સ જેવી સુવિધાઓ હશે. જે યુઝર્સ સ્માર્ટ ગ્લાસીસ કે AirPods પહેરવાનું પસંદ નથી કરતા તેમના માટે આ પન્ડન્ટ એક આદર્શ વિકલ્પ સાબિત થશે જે સીધું જ Siri સાથે વાતચીત કરવાની સુવિધા આપશે.
Metaને ટક્કર આપવા તૈયાર સ્માર્ટ ગ્લાસીસ
સ્માર્ટ ચશ્માના માર્કેટમાં પોતાનું પ્રભુત્વ જમાવવા માટે Apple બે અલગ અલગ મોડલ પર કામ કરી રહ્યું છે. પ્રથમ મોડલ એક AI સ્માર્ટ ગ્લાસ હશે જેમાં કેમેરા અને સ્પીકરની સુવિધા મળશે પરંતુ તેમાં લેન્સ પર કોઈ ડિસ્પ્લે નહીં હોય. આ પ્રોડક્ટ આ વર્ષે જ લોન્ચ થવાની શક્યતા છે. બીજી તરફ કંપની AR સ્માર્ટ ગ્લાસીસ પર પણ સંશોધન કરી રહી છે જેના બંને ગ્લાસમાં ડિસ્પ્લે જોવા મળશે. જોકે Apple Intelligenceને વધુ સચોટ બનાવવાના પ્રયાસોને કારણે આ AR ગ્લાસીસનું લોન્ચિંગ 2028 સુધી લંબાઈ શકે છે.
