Apple સામાન્ય રીતે દર વર્ષે સપ્ટેમ્બર મહિનામાં તેની નવી iPhone સિરીઝ રજૂ કરવા માટે જાણીતું છે. જોકે, વર્ષ 2026 માં આ પરંપરા તૂટી શકે તેવા સંકેતો મળી રહ્યા છે. એક તાજા રિપોર્ટ અનુસાર, ટેક જાયન્ટ Apple વર્ષ 2026માં સ્ટાન્ડર્ડ iPhone 18 લોન્ચ કરવાનું માંડી વાળી શકે છે અને આ મોડલની એન્ટ્રી 2027 સુધી લંબાઈ શકે છે.
મેમરી ચિપની અછત અને વધતી કિંમતો
Nikkei Asiaના અહેવાલ મુજબ, Apple હાલમાં મેમરી ચિપ્સ અને અન્ય મહત્વના કમ્પોનન્ટ્સની વધતી જતી કિંમતોનો સામનો કરી રહ્યું છે. પોતાના રિસોર્સિસનું યોગ્ય મેનેજમેન્ટ કરવા અને પ્રીમિયમ મોડલ્સ પર વધુ ધ્યાન કેન્દ્રિત કરવા માટે કંપની iPhone 18 ને 2027 ના પ્રથમ ત્રિમાસિક ગાળા સુધી પાછું ઠેલી શકે છે. આ રણનીતિ પાછળ સપ્લાય ચેઈનની સમસ્યાઓથી બચવાનો હેતુ પણ રહેલો છે.
Foldable iPhone ની તૈયારીઓ તેજ
આ વિલંબ પાછળનું એક મુખ્ય કારણ Appleનો પ્રથમ Foldable iPhone માનવામાં આવે છે. આ નવા ડિવાઈસ માટે કંપનીને જટિલ મેન્યુફેક્ચરિંગ પ્રોસેસ અને નવા મટિરિયલની જરૂરિયાત છે. કોઈપણ ટેકનિકલ ખામી વગર ફોલ્ડેબલ ફોન માર્કેટમાં ઉતારવા માટે Apple અત્યારે પોતાના લોન્ચિંગ પ્લાનમાં ફેરફાર કરી રહ્યું હોવાનું ચર્ચાઈ રહ્યું છે.
નિષ્ણાતોના મતે લોન્ચિંગમાં વિલંબ નક્કી
માત્ર નિક્કી એશિયા જ નહીં, પરંતુ Bloomberg ના માર્ક ગુરમેન અને જાણીતા એનાલિસ્ટ મિંગ-ચી કુઓ પણ અગાઉ સંકેત આપી ચૂક્યા છે કે 2026માં iPhone 18 જોવા નહીં મળે. કેટલીક વિગતો મુજબ, iPhone 18e મોડલને 2027ની શરૂઆતમાં લોન્ચ કરવામાં આવી શકે છે.
iPhone 18માં કયા ફેરફારોની શક્યતા?
લીક્સ અનુસાર, iPhone 18 માં ખર્ચ ઘટાડવા માટે કેમેરા કંટ્રોલ બટનને પહેલા કરતા સરળ બનાવવામાં આવી શકે છે. ટેકનિકલ સ્પેસિફિકેશનની વાત કરીએ તો, તેમાં 12GB RAM મળી શકે છે, જે હાલના 8GB RAM કરતા મોટું અપગ્રેડ હશે. આ ઉપરાંત, કેમેરા સેન્સરમાં પણ સુધારો કરીને તેને 24 મેગાપિક્સલ સુધી લઈ જવામાં આવી શકે છે.
સપ્ટેમ્બર 2026ના ઇવેન્ટમાં શું આવશે?
રિપોર્ટ્સ સૂચવે છે કે 2026ના સપ્ટેમ્બર ઇવેન્ટમાં iPhone 18 Pro, iPhone 18 Pro Max અને નવો Foldable iPhone લોન્ચ થવાની પ્રબળ શક્યતા છે. જ્યારે iPhone Air 2 માટે યુઝર્સે સપ્ટેમ્બર 2027 સુધી રાહ જોવી પડી શકે છે.
