ટેક જાયન્ટ Appleએ આ વર્ષે ભારતીય સ્માર્ટફોન માર્કેટમાં એક નવો ઈતિહાસ રચી દીધો છે. વર્ષ 2025 દરમિયાન Appleનો iPhone 16 ભારતમાં સૌથી વધુ વેચાતો સ્માર્ટફોન સાબિત થયો છે. અત્યાર સુધી ભારતીય માર્કેટમાં બજેટ અને મિડ-રેન્જ એન્ડ્રોઇડ સ્માર્ટફોનનું વર્ચસ્વ રહેતું હતું, પરંતુ આ વખતે iPhone 16એ તમામ એન્ડ્રોઇડ ફોનને પાછળ છોડીને પ્રથમ સ્થાન હાંસલ કર્યું છે. આ આંકડા દર્શાવે છે કે ભારતીય ગ્રાહકોમાં હવે પ્રીમિયમ સ્માર્ટફોન ખરીદવાનો ક્રેઝ ઝડપથી વધી રહ્યો છે. ઉલ્લેખનીય છે કે, iPhone 16ને વર્ષ 2024માં લોન્ચ કરવામાં આવ્યો હતો અને ત્યારથી તેની લોકપ્રિયતામાં સતત વધારો જોવા મળી રહ્યો છે.
iPhone 16ના 65 લાખથી વધુ યુનિટ્સનું વેચાણ
Counterpoint Researchના લેટેસ્ટ રિપોર્ટ અનુસાર, વર્ષ 2025ના પ્રથમ 11 મહિનામાં Appleએ ભારતમાં iPhone 16ના અંદાજે 65 લાખ યુનિટ્સ વેચ્યા છે. આ યાદીમાં બીજા ક્રમે Vivoનો Y29 5G રહ્યો છે, જેનું વેચાણ લગભગ 47 લાખ યુનિટ્સ નોંધાયું છે. ચોંકાવનારી વાત એ છે કે iPhone 16ની કિંમત Vivo Y29 5G કરતા ત્રણ ગણી વધારે હોવા છતાં લોકોએ આઈફોન પર વધુ પસંદગી ઉતારી છે. સામાન્ય રીતે સૌથી વધુ વેચાતા ફોન્સની લિસ્ટમાં સસ્તા એન્ડ્રોઇડ ફોન્સ આગળ હોય છે, પરંતુ આ વખતે Appleએ બાજી મારી છે. એટલું જ નહીં, આ લિસ્ટમાં ત્રીજા ક્રમે પણ Appleનો જ iPhone 15 રહ્યો છે. આ વર્ષે ભારતમાં વેચાયેલા કુલ સ્માર્ટફોન્સમાં iPhone 16 અને iPhone 15નો હિસ્સો 8 ટકા જેટલો રહ્યો છે.
iPhone 16ના પાવરફુલ સ્પેસિફિકેશન્સ
સપ્ટેમ્બર 2024માં લોન્ચ થયેલા iPhone 16માં 6.1 ઇંચની શાનદાર OLED ડિસ્પ્લે આપવામાં આવી છે. આ ફોનમાં લેટેસ્ટ A18 પ્રોસેસરનો ઉપયોગ કરવામાં આવ્યો છે, જે મલ્ટીટાસ્કિંગ અને Apple Intelligence ફિચર્સને ખૂબ જ સરળતાથી હેન્ડલ કરે છે. કેમેરાની વાત કરીએ તો તેના રિયરમાં 48MP + 12MPનો ડ્યુઅલ કેમેરા સેટઅપ છે અને સેલ્ફી માટે 12MPનો ફ્રન્ટ કેમેરા ઉપલબ્ધ છે. બેટરી બેકઅપની દ્રષ્ટિએ પણ આ ફોન ઘણો સારો છે, જે ફુલ ચાર્જિંગ પર 22 કલાક સુધીનો વીડિયો પ્લેબેક સપોર્ટ આપે છે.
ભારત પર Appleનું વધતું ધ્યાન
છેલ્લા કેટલાક સમયથી Apple ચીનથી પોતાની એસેમ્બલી લાઇન ભારત તરફ શિફ્ટ કરી રહ્યું છે, જેના કારણે ભારતમાંથી આઈફોનની નિકાસ રેકોર્ડ સ્તરે પહોંચી છે. આ ઉપરાંત, કંપનીએ ભારતીય ગ્રાહકો સુધી પહોંચવા માટે બેંગલુરુ, પુણે અને નોઈડામાં ત્રણ નવા Apple સ્ટોર્સ પણ શરૂ કર્યા છે. ઈઝી EMI ઓપ્શન્સ, બેંક કેશબેક અને એક્સચેન્જ ઓફર્સને કારણે હવે સામાન્ય લોકો માટે પણ પ્રીમિયમ આઈફોન ખરીદવો સરળ બન્યો છે.
