COVID Cases: દેશમાં કોરોના મહામારીનો ખતરો મોટા પ્રમાણમાં ઘટી ગયો હોવા છતાં કેટલાક રાજ્યોમાં સમયાંતરે કોવિડ-19ના નવા કેસો સામે આવી રહ્યા છે. આવી સ્થિતિમાં આંધ્ર પ્રદેશમાંથી આવેલા તાજા આંકડાઓએ આરોગ્ય વિભાગની ચિંતા વધારી છે. છેલ્લા કેટલાક અઠવાડિયામાં રાજ્યમાં કોરોનાના નવા કેસ નોંધાયા છે, જ્યારે કેટલાક દર્દીઓના મોત પણ થયા હોવાથી આરોગ્ય તંત્ર વધુ સતર્ક બન્યું છે. આંધ્ર પ્રદેશના આરોગ્ય વિભાગે સ્પષ્ટ કર્યું છે કે, હાલ પરિસ્થિતિ નિયંત્રણમાં છે, છતાં સાવચેતીના ભાગરૂપે હોસ્પિટલોમાં જરૂરી તૈયારીઓ શરૂ કરી દેવામાં આવી છે. ખાસ કરીને કડપ્પાની રાજીવ ગાંધી ઇન્સ્ટિટ્યૂટ ઓફ મેડિકલ સાયન્સિસ (RIMS) હોસ્પિટલમાં વિશેષ કોવિડ આઈસોલેશન વોર્ડ તૈયાર કરવામાં આવ્યો છે જેથી જરૂર પડ્યે દર્દીઓને તાત્કાલિક સારવાર મળી શકે.
26 જૂનથી 16 જુલાઈ દરમિયાન નોંધાયા 12 કેસ
રાજ્યના આરોગ્ય કમિશનર જી. વીરપાંડિયનના જણાવ્યા મુજબ, 26 જૂનથી 16 જુલાઈ વચ્ચે આંધ્ર પ્રદેશમાં કોવિડ-19ના કુલ 12 પોઝિટિવ કેસ નોંધાયા છે. આ તમામ કેસોની સતત દેખરેખ રાખવામાં આવી રહી છે અને આરોગ્ય વિભાગ દ્વારા સંપર્કમાં આવેલા લોકોની પણ માહિતી એકત્રિત કરવામાં આવી રહી છે. અધિકારીઓએ જણાવ્યું કે, હાલ રાજ્યમાં કોઈ મોટા પાયે સંક્રમણ અથવા ક્લસ્ટર ફેલાવાના સંકેતો મળ્યા નથી, જેના કારણે પરિસ્થિતિ હાલ નિયંત્રણમાં હોવાનું માનવામાં આવે છે.
4 દર્દીઓના મોત, પરંતુ તમામને પહેલાથી ગંભીર બીમારીઓ હતી
આરોગ્ય વિભાગે જણાવ્યું કે નોંધાયેલા કેસોમાંથી ચાર દર્દીઓના મોત થયા છે. જોકે, અધિકારીઓના જણાવ્યા અનુસાર આ તમામ દર્દીઓ પહેલેથી જ ગંભીર આરોગ્ય સમસ્યાઓથી પીડાતા હતા. મૃતકોમાં હાઈ બ્લડ પ્રેશર, ડાયાબિટીસ અને કિડની સંબંધિત ગંભીર બીમારીઓ જેવી કોમોર્બિડિટીઝ હતી. મૃત્યુ પામેલા ચાર દર્દીઓમાંથી ત્રણ કડપ્પા જિલ્લાના હતા જ્યારે એક દર્દી કાકીનાડાનો રહેવાસી હતો.
આ પણ વાંચો: આખરે કેવી રીતે પકડાઈ રામ મંદિરની દાન ચોરી? : રૂ.40,000ની એક ગડ્ડીએ ખોલી કરોડોના કૌભાંડની પોલ
આ વર્ષે પ્રથમ કેસ 26 જૂને નોંધાયો
આંધ્ર પ્રદેશમાં વર્ષ 2026નો પ્રથમ કોવિડ કેસ 26 જૂને કડપ્પા જિલ્લામાં નોંધાયો હતો. ત્યારબાદ 1 જુલાઈથી 16 જુલાઈ વચ્ચે વધુ 11 કેસ સામે આવ્યા હતા. આરોગ્ય વિભાગના જણાવ્યા મુજબ, બે દર્દીઓ અગાઉ સંક્રમિત વ્યક્તિના સંપર્કમાં આવ્યા બાદ ચેપગ્રસ્ત બન્યા હતા. જોકે બાકીના કેસો અલગ-અલગ વિસ્તારોમાંથી નોંધાયા હોવાથી કોઈ એક વિસ્તારમાં સંક્રમણનું કેન્દ્ર (ક્લસ્ટર) બન્યું હોવાનું સામે આવ્યું નથી.
ટેસ્ટિંગ અને દર્દીઓની હાલની સ્થિતિ
રાજ્યમાં 26 જૂનથી 15 જુલાઈ દરમિયાન કુલ 67 કોવિડ ટેસ્ટ કરવામાં આવ્યા હતા. જેમાંથી 11 લોકોના રિપોર્ટ પોઝિટિવ આવ્યા હતા. જ્યારે 12મો કેસ તમિલનાડુના વેલ્લોર સ્થિત ક્રિશ્ચિયન મેડિકલ કોલેજ (CMC)માં નોંધાયો હોવાનું અધિકારીઓએ જણાવ્યું. હાલ નોંધાયેલા દર્દીઓમાંથી ત્રણ દર્દીઓ હોમ આઈસોલેશનમાં સારવાર લઈ રહ્યા છે. બે દર્દીઓ હોસ્પિટલમાં દાખલ છે, જ્યારે ત્રણ દર્દીઓ સંપૂર્ણપણે સ્વસ્થ થઈને ઘરે પરત ફરી ચૂક્યા છે.
RIMS હોસ્પિટલમાં તૈયાર કરાયો વિશેષ કોવિડ વોર્ડ
નવા કેસો સામે આવ્યા બાદ કડપ્પાની RIMS હોસ્પિટલમાં ખાસ કોવિડ વોર્ડ તૈયાર કરવામાં આવ્યો છે. આરોગ્ય વિભાગનું કહેવું છે કે આ પગલું માત્ર સાવચેતીના ભાગરૂપે લેવામાં આવ્યું છે જેથી જો દર્દીઓની સંખ્યા વધે તો સારવારમાં કોઈ મુશ્કેલી ન પડે. સાથે જ આરોગ્ય વિભાગ લોકોને ગભરાવાના બદલે સાવચેતી રાખવાની સલાહ આપી રહ્યો છે. તાવ, ઉધરસ, શ્વાસ લેવામાં તકલીફ જેવા લક્ષણો જણાય તો તાત્કાલિક તબીબી સલાહ લેવા અને જરૂર પડે ત્યારે કોવિડ ટેસ્ટ કરાવવાની અપીલ કરવામાં આવી છે.
આરોગ્ય વિભાગે શું કહ્યું?
અધિકારીઓએ ભારપૂર્વક જણાવ્યું છે કે હાલમાં રાજ્યમાં કોરોનાનો કોઈ મોટો પ્રકોપ જોવા મળતો નથી અને પરિસ્થિતિ પર સતત નજર રાખવામાં આવી રહી છે. આરોગ્ય વિભાગ તમામ હોસ્પિટલોને જરૂરી તૈયારીઓ રાખવા અને સંભવિત દર્દીઓ માટે જરૂરી સુવિધાઓ ઉપલબ્ધ રાખવા સૂચના આપી રહ્યો છે. નિષ્ણાતોનું પણ માનવું છે કે, કોવિડ હવે અનેક વિસ્તારોમાં સમયાંતરે જોવા મળતો ચેપ બની ગયો છે. તેથી ગભરાવાની જરૂર નથી, પરંતુ વૃદ્ધો, ગંભીર બીમારીઓથી પીડાતા લોકો અને ઓછી રોગપ્રતિકારક શક્તિ ધરાવતા લોકોએ વધુ સાવચેતી રાખવી જરૂરી છે.
