Puri Rath Yatra 2026: ઓડિશાના પુરીમાં ભગવાન જગન્નાથજીની વિશ્વવિખ્યાત રથયાત્રાના બીજા દિવસે ભક્તિ અને આસ્થાનો અદભૂત માહોલ જોવા મળી રહ્યો છે. વહેલી સવારથી જ શ્રીમંદિર અને રથો પાસે ભગવાન જગન્નાથ, ભાઈ બલભદ્ર અને બહેન સુભદ્રાના દર્શન માટે લાખો શ્રદ્ધાળુઓ ઉમટી પડ્યા છે. દેશના વિવિધ રાજ્યો ઉપરાંત વિદેશમાંથી આવેલા ભક્તો પણ આ પવિત્ર અવસરના સાક્ષી બનવા પુરી પહોંચ્યા છે.
સવારથી જ ભક્તોની લાંબી કતારો
શ્રીમંદિરની આસપાસના તમામ માર્ગો પર સવારથી જ ભક્તોની લાંબી કતારો જોવા મળી રહી છે. સમગ્ર શહેર 'જય જગન્નાથ'ના ગગનભેદી જયઘોષથી ગુંજી ઉઠ્યું છે. ભક્તોના ચહેરા પર ભગવાનના દર્શનની આતુરતા, આનંદ અને અખૂટ શ્રદ્ધા સ્પષ્ટ જોવા મળી રહી છે. રથો પર બિરાજમાન ભગવાનના દર્શન કરવા માટે લોકો કલાકો સુધી રાહ જોઈ રહ્યા છે. ધાર્મિક માન્યતા મુજબ ભગવાન જગન્નાથની રથયાત્રામાં ભાગ લેવો અથવા માત્ર રથના દર્શન કરવાથી પણ વિશેષ પુણ્યની પ્રાપ્તિ થાય છે. આ જ કારણ છે કે દર વર્ષે લાખો શ્રદ્ધાળુઓ આ દિવ્ય અને ઐતિહાસિક મહોત્સવમાં જોડાવા પુરી આવે છે. આ યાત્રા માત્ર ધાર્મિક પ્રસંગ જ નહીં, પરંતુ આસ્થા, સંસ્કૃતિ અને પરંપરાનું અનોખું પ્રતીક પણ માનવામાં આવે છે.
આ પણ વાંચો : પુરી રથયાત્રામાં લાખોની ભીડ વચ્ચે આવી રીતે નીકળી એમ્બ્યુલન્સ : વીડિયો થયો વાયરલ
સરકારે સુરક્ષાના ચુસ્ત બંદોબસ્ત ગોઠવ્યા
ભીડને ધ્યાનમાં રાખીને ઓડિશા સરકારે સુરક્ષાના ચુસ્ત બંદોબસ્ત ગોઠવ્યા છે. પોલીસ, સુરક્ષા દળો અને સ્વયંસેવકો સતત સેવાકાર્યમાં વ્યસ્ત છે, જેથી ભક્તોને કોઈ મુશ્કેલી વિના દર્શનનો લાભ મળી શકે. ટ્રાફિક વ્યવસ્થા, આરોગ્ય સેવાઓ અને અન્ય જરૂરી સુવિધાઓ પણ સક્રિય રાખવામાં આવી છે. રથયાત્રાના બીજા દિવસે પણ પુરી સંપૂર્ણપણે ભક્તિમય રંગમાં રંગાઈ ગયું છે. ભગવાન જગન્નાથના દર્શન અને આશીર્વાદ મેળવવા માટે લાખો શ્રદ્ધાળુઓનો ઉમટતો જનસાગર આ પવિત્ર પરંપરાની ભવ્યતા અને લોકઆસ્થાનું જીવંત દૃશ્ય રજૂ કરી રહ્યો છે. આજે પણ સમગ્ર પુરીમાં ભક્તિ, શ્રદ્ધા અને ઉત્સાહનો અનોખો માહોલ છવાયેલો છે.
