Badrinath Temple Donation Case: ઉત્તરાખંડના પ્રસિદ્ધ બદ્રીનાથ ધામને લઈને એક ચોંકાવનારી ઘટના સામે આવી છે. દેશભરમાંથી લાખો શ્રદ્ધાળુઓ દર વર્ષે આ પવિત્ર ધામમાં દર્શન અને દાન માટે પહોંચે છે, પરંતુ હવે મંદિરના ચઢાવાની રકમમાં કથિત ગેરરીતિનો મામલો પ્રકાશમાં આવતા સમગ્ર ઘટનાએ ચર્ચા જગાવી છે. મંદિરની આવક અને દાન વ્યવસ્થાને લઈને ઉઠેલા સવાલો બાદ તપાસ એજન્સીઓએ કાર્યવાહી તેજ કરી છે. આ મામલે સૌથી મહત્વપૂર્ણ વિકાસ એ છે કે, બદ્રીનાથ-કેદારનાથ મંદિર સમિતિ (BKTC)ના પૂર્વ ટેમ્પલ ઓફિસર રાજેન્દ્ર ચૌહાણની પોલીસે ધરપકડ કરી છે. ખાસ વાત એ છે કે તેઓ 30 જૂને જ સરકારી સેવામાંથી નિવૃત્ત થયા હતા અને નિવૃત્તિના થોડા દિવસોમાં જ તેમની સામે કાયદાકીય કાર્યવાહી થતાં સમગ્ર મામલો વધુ ગંભીર બન્યો છે.
પૂર્વ ટેમ્પલ ઓફિસર રાજેન્દ્ર ચૌહાણની ધરપકડ
પોલીસના જણાવ્યા મુજબ, બદ્રીનાથ મંદિરમાં ચઢાવાની રકમના સંચાલન દરમિયાન કથિત ગેરરીતિ અને નાણાકીય અનિયમિતતાના આરોપોની તપાસ ચાલી રહી હતી. તપાસ દરમિયાન સામે આવેલા પુરાવાના આધારે પૂર્વ ટેમ્પલ ઓફિસર રાજેન્દ્ર ચૌહાણની ધરપકડ કરવામાં આવી છે. રાજેન્દ્ર ચૌહાણે 30 જૂનના રોજ પોતાની સરકારી ફરજમાંથી નિવૃત્તિ લીધી હતી. જોકે નિવૃત્તિ બાદ પણ તેમની સામે ચાલી રહેલી તપાસ ચાલુ રહી હતી અને અંતે પોલીસે તેમને કસ્ટડીમાં લીધા છે.
દાનની રકમના હિસાબમાં ગેરરીતિની શંકા
પ્રાથમિક તપાસમાં મંદિરમાં શ્રદ્ધાળુઓ દ્વારા આપવામાં આવેલા દાનના હિસાબ અને તેની જાળવણીમાં ગેરરીતિ થયાની આશંકા વ્યક્ત કરવામાં આવી છે. પોલીસ અને સંબંધિત તપાસ એજન્સીઓ હવે નાણાકીય દસ્તાવેજો, બેંક વ્યવહારો તેમજ દાનની નોંધ સંબંધિત તમામ રેકોર્ડની ચકાસણી કરી રહી છે. અધિકારીઓનું કહેવું છે કે, તપાસ પૂર્ણ થયા બાદ જ ગેરરીતિની ચોક્કસ રકમ અને તેમાં અન્ય કોઈ અધિકારીઓ અથવા કર્મચારીઓની સંડોવણી છે કે, નહીં તે સ્પષ્ટ થઈ શકશે.
આ પણ વાંચો: આખરે કેવી રીતે પકડાઈ રામ મંદિરની દાન ચોરી? : રૂ.40,000ની એક ગડ્ડીએ ખોલી કરોડોના કૌભાંડની પોલ
BKTCના કામકાજ પર પણ ઉઠ્યા સવાલ
આ સમગ્ર ઘટનાએ બદ્રીનાથ-કેદારનાથ મંદિર સમિતિ (BKTC)ની દાન વ્યવસ્થાને લઈને પણ અનેક પ્રશ્નો ઉભા કર્યા છે. ચારધામ યાત્રા દરમિયાન કરોડો રૂપિયાનું દાન મળતું હોવાથી તેની પારદર્શિતા અને સુરક્ષિત વ્યવસ્થા જાળવવી અત્યંત મહત્વપૂર્ણ માનવામાં આવે છે. ઘટના સામે આવ્યા બાદ મંદિર સમિતિના કાર્યપ્રણાલી અને દાન વ્યવસ્થાના નિયમોની પણ સમીક્ષા થઈ શકે તેવી શક્યતા વ્યક્ત કરવામાં આવી રહી છે.
તપાસ હજુ ચાલુ, વધુ ખુલાસાની શક્યતા
પોલીસે સ્પષ્ટ કર્યું છે કે, આ કેસની તપાસ હજુ પ્રારંભિક તબક્કામાં છે. ધરપકડ બાદ રાજેન્દ્ર ચૌહાણની પૂછપરછ કરવામાં આવી રહી છે અને તેમના નિવેદનના આધારે અન્ય દસ્તાવેજોની પણ તપાસ થશે. જો તપાસ દરમિયાન અન્ય કોઈ અધિકારી, કર્મચારી અથવા વ્યક્તિની સંડોવણી સામે આવશે તો તેમના વિરુદ્ધ પણ કાયદેસરની કાર્યવાહી કરવામાં આવશે.
ચારધામ યાત્રા વચ્ચે ઘટના ચર્ચાનો વિષય બની
દેશના સૌથી પવિત્ર તીર્થસ્થાનોમાંના એક એવા બદ્રીનાથ ધામમાં દાનની રકમ સંબંધિત ગેરરીતિનો મામલો સામે આવતા શ્રદ્ધાળુઓમાં પણ ચર્ચા શરૂ થઈ છે. ચારધામ યાત્રા ચાલી રહી હોવાના કારણે આ ઘટનાએ વધુ ધ્યાન ખેંચ્યું છે. અધિકારીઓએ જણાવ્યું છે કે, મંદિરમાં દર્શન, પૂજા અને દાનની પ્રક્રિયા યથાવત ચાલુ છે અને યાત્રાળુઓને કોઈ મુશ્કેલી ન પડે તે માટે તમામ જરૂરી વ્યવસ્થા કરવામાં આવી છે. સાથે જ દાન વ્યવસ્થામાં સંપૂર્ણ પારદર્શિતા જળવાઈ રહે તે માટે તપાસને પ્રાથમિકતા આપવામાં આવી રહી છે.
