ગાંધીનગર લોકસભા ભાજપા મીડિયા વિભાગ દ્વારા જાહેર કરવામાં આવેલી અખબારી યાદી મુજબ કેન્દ્રીય ગૃહ અને સહકાર મંત્રી તથા ગાંધીનગર લોકસભા ક્ષેત્રના સાંસદ અમિત શાહ આગામી 28 અને 29 મે દરમિયાન ગુજરાત પ્રવાસે પધારશે. આ પ્રવાસ દરમિયાન તેઓ ગાંધીનગર લોકસભા વિસ્તારમાં અનેક વિકાસ પ્રકલ્પોના લોકાર્પણ અને ખાતમુહૂર્ત કાર્યક્રમોમાં હાજરી આપશે.
પ્રાપ્ત માહિતી મુજબ 28 મેના રોજ અમિત શાહ વિવિધ જાહેર વિકાસ કાર્યો અને CSR આધારિત પ્રોજેક્ટ્સનું ઉદ્ઘાટન કરશે. ભાજપ સંગઠન સાથેની બેઠકો ઉપરાંત તેઓ વિવિધ સામાજિક અને શૈક્ષણિક પ્રકલ્પોની મુલાકાત પણ લેશે.
વડસરથી સોનીપુર સુધી વિકાસ કાર્યોનું લોકાર્પણ
પ્રવાસ દરમિયાન અમિત શાહ વડસર ખાતે આનંદમ પરિવારના CSR ફંડથી નિર્માણ પામેલા જેડવા તળાવનું લોકાર્પણ કરશે. આ ઉપરાંત વડસર, જલુંદ અને સરઢવ ગામોમાં ટોયોટા કીલોસ્કર મોટર્સ લિમિટેડના CSR ફંડથી તૈયાર કરાયેલા નવા વાંચનાલયોના લોકાર્પણ કાર્યક્રમોમાં પણ હાજરી આપશે.
ખાત્રજ ખાતે અરવિંદ ફાઉન્ડેશન દ્વારા હાથ ધરાયેલા તળાવ બ્યુટિફિકેશન પ્રોજેક્ટનું ખાતમુહૂર્ત તેમજ ગ્રામ પંચાયત કચેરીનું લોકાર્પણ પણ તેમના હસ્તે યોજાનાર છે. સ્થાનિક સ્તરે પાણી સંરક્ષણ અને ગ્રામ વિકાસને પ્રોત્સાહન આપતા આ પ્રોજેક્ટ્સને મહત્વપૂર્ણ માનવામાં આવી રહ્યા છે.
મોટી ભોયણ ખાતે પે સેન્ટર પ્રાથમિક શાળાનું લોકાર્પણ પણ કાર્યક્રમમાં સામેલ છે. જ્યારે સોનીપુર ખાતે ગામ તળાવના વિકાસકાર્ય સહિત કલોલ અને ગાંધીનગર ઉત્તર વિધાનસભા વિસ્તારમાં વિવિધ વિકાસ યોજનાઓના ખાતમુહૂર્ત અને લોકાર્પણ કાર્યક્રમો પણ યોજાશે.
આ પણ વાંચો: વડોદરામાં યુવકના કપડાં કાઢી 6 હેવાનોએ પાર કરી હેવાનિયતની હદ : ઘટનાનો વીડિયો બનાવી વાયરલ કર્યો, પોલીસને ફેંક્યો ખુલ્લો પડકાર
ભાજપ કાર્યકર્તાઓ સાથે બેઠક અને સામાજિક કાર્યક્રમો
પ્રવાસ દરમિયાન અમિત શાહ સોનીપુર ગામ ખાતે ભાજપના સિનિયર કાર્યકર્તા અને પૂર્વ સરપંચ ગાંડાજી ઠાકોરના નિવાસસ્થાને બપોરનું ભોજન પણ ગ્રહણ કરશે. આ મુલાકાતને સ્થાનિક સ્તરે રાજકીય અને સંગઠનાત્મક રીતે મહત્વપૂર્ણ માનવામાં આવી રહી છે.
ત્યારબાદ ગાંધીનગર સ્થિત ભાજપ પ્રદેશ કાર્યાલય “કમલમ” ખાતે તેમની ઉપસ્થિતિમાં પ્રદેશ ભાજપાના મુખ્ય પદાધિકારીઓની બેઠક યોજાશે. માનવામાં આવે છે કે આ બેઠકમાં સંગઠનાત્મક મુદ્દાઓ, આગામી રાજકીય કાર્યક્રમો અને વિવિધ ચૂંટણીલક્ષી તૈયારીઓ અંગે ચર્ચા થઈ શકે છે.
આ પણ વાંચો: અમદાવાદમાં બુલેટ ટ્રેન પ્રોજેક્ટની મોટી સિદ્ધિ : કાલુપુર ફ્લાયઓવર ઉપર વાયાડક્ટ લોન્ચિંગ સફળતાપૂર્વક પૂર્ણ
અમદાવાદમાં પણ વિવિધ કાર્યક્રમોમાં હાજરી
અમદાવાદમાં પણ અમિત શાહના અનેક કાર્યક્રમો નિર્ધારિત કરવામાં આવ્યા છે. ચાંદખેડા ખાતે CBSE પ્રાદેશિક કચેરીનું લોકાર્પણ તેમના હસ્તે કરવામાં આવશે. ઉપરાંત સોલા સ્થિત ઉમિયાધામ કેમ્પસમાં નવા હોસ્ટેલ બિલ્ડિંગનું ઉદ્ઘાટન પણ તેઓ કરશે.
સાંજના સમયે અમદાવાદ મ્યુનિસિપલ કોર્પોરેશન દ્વારા નવા વાડજ વિસ્તારમાં નિર્મિત “ભારત માતા” સ્કલ્પચરનું લોકાર્પણ કાર્યક્રમ પણ યોજાશે. શહેરના સૌંદર્યીકરણ અને રાષ્ટ્રીય પ્રતીકો સાથે જોડાયેલા આ પ્રોજેક્ટને AMC માટે મહત્વપૂર્ણ ગણવામાં આવી રહ્યો છે.
ત્યારબાદ અમદાવાદ સર્કિટ હાઉસ ખાતે ઓલિમ્પિક, કોમનવેલ્થ તેમજ વર્લ્ડ પોલીસ અને ફાયર ગેમ્સની તૈયારીઓ અંગે સમીક્ષા બેઠક પણ અમિત શાહની અધ્યક્ષતામાં યોજાશે. આ બેઠકમાં વિવિધ વિભાગોના ઉચ્ચ અધિકારીઓ અને આયોજન સાથે જોડાયેલા પ્રતિનિધિઓ હાજર રહે તેવી શક્યતા છે.
આ પણ વાંચો: દાહોદમાં આંગડિયા પેઢીનો કર્મચારી લૂંટાયો : હથિયારધારી 6 શખ્સે કરેલી ₹1.40 કરોડની લૂંટ CCTVમાં કેદ
પ્રવાસ બાદ ભુજ જવાના
28 મેના રોજ મોડી સાંજે અમદાવાદ અને ગાંધીનગરના તમામ કાર્યક્રમો પૂર્ણ કર્યા બાદ અમિત શાહ કચ્છના ભુજ જવા રવાના થશે. જોકે, 29 મેના રોજ ભુજ અને કચ્છ વિસ્તારમાં તેમના કાર્યક્રમોની સત્તાવાર વિગત હજુ જાહેર કરવામાં આવી નથી.
અમિત શાહના આ પ્રવાસને રાજકીય તેમજ વિકાસલક્ષી બંને દૃષ્ટિએ મહત્વપૂર્ણ માનવામાં આવી રહ્યો છે. ખાસ કરીને ગાંધીનગર લોકસભા ક્ષેત્રમાં CSR આધારિત વિકાસ કાર્યો અને ગ્રામ વિકાસ સાથે જોડાયેલા કાર્યક્રમો પર વિશેષ ભાર આપવામાં આવ્યો છે.
