અંબાજી: બનાસકાંઠા જિલ્લાના વિશ્વવિખ્યાત શક્તિપીઠ અંબાજી મંદિરમાં ભંડારાની ગણતરી દરમિયાન થયેલી ચોરીની ઘટનાને ગંભીરતાથી લઈને જિલ્લા વહીવટીતંત્ર અને અંબાજી મંદિર ટ્રસ્ટે સુરક્ષા વ્યવસ્થામાં મોટા ફેરફારો કર્યા છે. બનાસકાંઠાના જિલ્લા કલેક્ટર મિહિર પટેલે જણાવ્યું હતું કે સમગ્ર ઘટનાની તાત્કાલિક તપાસ કરાવી કાર્યવાહી કરવામાં આવી છે અને ભવિષ્યમાં આવી ઘટના ફરી ન બને તે માટે ભંડારાની ગણતરીની નવી સ્ટાન્ડર્ડ ઓપરેટિંગ પ્રોસિજર (SOP) અમલમાં મૂકવામાં આવી છે.
બે મહિના અગાઉ ગણતરી દરમિયાન સામે આવી હતી ચોરીની ઘટના
કલેક્ટર મિહિર પટેલના જણાવ્યા મુજબ અંબાજી મંદિરમાં દર મંગળવારે ભક્તો દ્વારા અર્પણ કરવામાં આવેલી રોકડ અને અન્ય ચઢાવાની ગણતરી કરવામાં આવે છે. લગભગ બે મહિના અગાઉ આવી જ એક નિયમિત ગણતરી દરમિયાન મંદિરના કર્મચારી ચિરાગ ઠાકોર દ્વારા રોકડના એક બંડલની ચોરી કરવામાં આવી હોવાની ઘટના સામે આવી હતી. આ ઘટના સામે આવતાં અંબાજી મંદિર ટ્રસ્ટે સમગ્ર મામલાની આંતરિક તપાસ શરૂ કરી હતી અને બાદમાં અંબાજી પોલીસ મથકે સત્તાવાર ફરિયાદ નોંધાવવામાં આવી હતી.
ત્રણ કર્મચારીઓની ધરપકડ, મંદિર ટ્રસ્ટે નોકરીમાંથી કર્યા બરતરફ
ફરિયાદના આધારે અંબાજી પોલીસે તપાસ હાથ ધરી હતી. તપાસ દરમિયાન ચિરાગ ઠાકોર ઉપરાંત વિવેક શર્મા અને નિકુલ પટેલની પણ ધરપકડ કરવામાં આવી હતી. ત્રણેય તે સમયે અંબાજી મંદિર સાથે સંકળાયેલા કર્મચારીઓ હતા.
ઘટનાને ગંભીર ગણતાં અંબાજી મંદિર ટ્રસ્ટે તાત્કાલિક અસરથી ત્રણેય કર્મચારીઓને સેવામાંથી બરતરફ કરવાનો નિર્ણય લીધો હતો. ટ્રસ્ટના આ નિર્ણય બાદ મંદિરની સુરક્ષા વ્યવસ્થાને વધુ મજબૂત બનાવવા માટે નવી વ્યવસ્થા પર કામ શરૂ કરવામાં આવ્યું હતું.
ભંડારાની ગણતરી માટે નવી SOP અમલમાં
ચોરીની ઘટના બાદ મંદિર ટ્રસ્ટ અને જિલ્લા વહીવટીતંત્રે ભંડારાની ગણતરી માટે નવી સ્ટાન્ડર્ડ ઓપરેટિંગ પ્રોસિજર જાહેર કરી છે. નવી SOP હેઠળ સમગ્ર ગણતરી પ્રક્રિયાને વધુ પારદર્શક અને સુરક્ષિત બનાવવાના અનેક મહત્વપૂર્ણ પગલાં લેવામાં આવ્યા છે. નવી વ્યવસ્થા મુજબ હવે ભંડારાની ગણતરી દરમિયાન સમગ્ર પ્રક્રિયા 20થી વધુ CCTV કેમેરાની સતત દેખરેખ હેઠળ થશે. કેમેરાના તમામ રેકોર્ડિંગ ઓછામાં ઓછા છ મહિના સુધી સુરક્ષિત રીતે સંગ્રહિત રાખવામાં આવશે, જેથી ભવિષ્યમાં જરૂર પડે તો તેની સમીક્ષા કરી શકાય.
મેટલ ડિટેક્ટરથી થશે કર્મચારીઓની ફરજિયાત તપાસ
નવી SOP મુજબ ભંડારાની ગણતરીમાં ભાગ લેતા દરેક કર્મચારી માટે સુરક્ષા ચકાસણી ફરજિયાત બનાવવામાં આવી છે. કર્મચારીઓ ભંડારામાં પ્રવેશ કરે તે પહેલાં તેમજ બહાર નીકળતી વખતે મેટલ ડિટેક્ટર દ્વારા સંપૂર્ણ તપાસ કરવામાં આવશે. આ ઉપરાંત સુરક્ષા કર્મચારીઓ દ્વારા અન્ય જરૂરી ચકાસણી પણ કરવામાં આવશે, જેથી કોઈપણ પ્રકારની અનિયમિતતા અટકાવી શકાય.
ભંડારાની ગણતરીનું થશે લાઈવ પ્રસારણ
પારદર્શિતા વધારવા માટે મંદિર ટ્રસ્ટે વધુ એક મહત્વપૂર્ણ નિર્ણય લીધો છે. હવે જ્યારે પણ ભંડારાની ગણતરી કરવામાં આવશે ત્યારે મંદિરના ચાચર ચોક ખાતે લગાવવામાં આવેલી LED સ્ક્રીન પર સમગ્ર પ્રક્રિયાનું લાઈવ પ્રસારણ કરવામાં આવશે.
આ વ્યવસ્થાથી ભક્તો અને હાજર લોકો ગણતરીની પ્રક્રિયા જોઈ શકશે, જેના કારણે ભંડારાની કામગીરીમાં વધુ પારદર્શિતા અને વિશ્વાસ જળવાઈ રહેશે.
આ પણ વાંચો: રામ મંદિર ટ્રસ્ટે બહાર પાડી CEOની ભરતી : ઉંમરથી લઈને લાયકાત સુધી જાણો તમામ વિગતો
સુરક્ષા અને પારદર્શિતાને અપાઈ પ્રાથમિકતા
કલેક્ટર મિહિર પટેલે જણાવ્યું હતું કે ચોરીની ઘટના સામે આવ્યા બાદ તંત્રે તાત્કાલિક કાર્યવાહી કરી હતી. જવાબદાર લોકો સામે પોલીસ ફરિયાદ નોંધાવી કાયદેસરની કાર્યવાહી હાથ ધરવામાં આવી છે અને ભવિષ્યમાં આવી કોઈ ઘટના ન બને તે માટે સુરક્ષા વ્યવસ્થાને વધુ મજબૂત બનાવવામાં આવી છે. તેમણે જણાવ્યું કે નવી SOPનો મુખ્ય હેતુ ભક્તોના વિશ્વાસને વધુ મજબૂત બનાવવાનો, મંદિરની ભંડારા વ્યવસ્થાને સંપૂર્ણ પારદર્શક બનાવવાનો અને કોઈપણ પ્રકારની ગેરરીતિને રોકવાનો છે.
વિશ્વવિખ્યાત શક્તિપીઠ અંબાજી મંદિર દર વર્ષે લાખો શ્રદ્ધાળુઓની આસ્થાનું કેન્દ્ર છે. આવા સંજોગોમાં મંદિરના ભંડારાની સુરક્ષા, પારદર્શિતા અને વિશ્વસનીયતા જળવાઈ રહે તે માટે વહીવટીતંત્ર દ્વારા લેવામાં આવેલા નવા પગલાંને મહત્વપૂર્ણ માનવામાં આવી રહ્યા છે.
