All India Weather Bulletin: ભારત હવામાન વિભાગ (IMD) દ્વારા 1 જુલાઈ 2026ના રોજ જાહેર કરવામાં આવેલા ઓલ ઈન્ડિયા વેધર બુલેટિન મુજબ દેશભરમાં દક્ષિણ-પશ્ચિમ ચોમાસું વધુ સક્રિય બન્યું છે. ચોમાસાએ હવે ગુજરાત, મધ્યપ્રદેશ, ઉત્તર પ્રદેશ, ઉત્તરાખંડ, હિમાચલ પ્રદેશ, લદ્દાખ, જમ્મુ-કાશ્મીર, હરિયાણા અને પંજાબના વધુ વિસ્તારોમાં પ્રવેશ કર્યો છે. આગામી એક સપ્તાહ દરમિયાન દેશના પશ્ચિમ, મધ્ય અને પૂર્વીય વિસ્તારોમાં ભારેથી અતિભારે વરસાદ વરસવાની સંભાવના વ્યક્ત કરવામાં આવી છે. હવામાન વિભાગના અનુમાન મુજબ, ચોમાસાની સક્રિયતાને કારણે ગુજરાત સહિત પશ્ચિમ ભારતના વિસ્તારોમાં વરસાદનું જોર વધશે. અરબી સમુદ્ર અને બંગાળની ખાડીમાં સક્રિય સિસ્ટમો તથા ઓફશોર ટ્રફના પ્રભાવને કારણે અનેક રાજ્યોમાં ભારે વરસાદી સ્થિતિ સર્જાઈ શકે છે. હવામાન વિભાગે લોકોને સતર્ક રહેવા અને સ્થાનિક તંત્ર દ્વારા જાહેર કરવામાં આવતી સૂચનાઓનું પાલન કરવાની અપીલ કરી છે.
1 અને 2 જુલાઈ: ગુજરાત સહિત પશ્ચિમ ભારતમાં ભારે વરસાદની શક્યતા
હવામાન વિભાગ અનુસાર 1 અને 2 જુલાઈ દરમિયાન ગુજરાત, કોંકણ-ગોવા, કોસ્ટલ કર્ણાટક અને મધ્ય મહારાષ્ટ્રમાં ભારેથી અતિભારે વરસાદ પડી શકે છે. દક્ષિણ ગુજરાત, દરિયાકાંઠાના વિસ્તારો તેમજ પશ્ચિમ ઘાટના વિસ્તારોમાં વરસાદનું પ્રમાણ વધુ રહેવાની સંભાવના વ્યક્ત કરવામાં આવી છે.
આ સમયગાળા દરમિયાન અનેક વિસ્તારોમાં ગાજવીજ સાથે વરસાદ અને તેજ પવન ફૂંકાવાની શક્યતા પણ નકારી શકાય તેમ નથી. નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે અને વાહનવ્યવહાર પર પણ અસર પડી શકે છે.
3 અને 4 જુલાઈ: મધ્યપ્રદેશમાં વરસાદ વધશે
3 અને 4 જુલાઈ દરમિયાન પશ્ચિમ મધ્યપ્રદેશમાં ભારે વરસાદની પ્રબળ શક્યતા છે. બીજી તરફ ગુજરાત, કોંકણ, ગોવા અને મધ્ય મહારાષ્ટ્રમાં ભારેથી અતિભારે વરસાદનો દોર યથાવત રહેવાની આગાહી કરવામાં આવી છે. હવામાન વિભાગનું માનવું છે કે આ દિવસોમાં વરસાદી સિસ્ટમ વધુ મજબૂત બનશે, જેના કારણે કેટલાક વિસ્તારોમાં અતિભારે વરસાદ નોંધાઈ શકે છે. નદી-નાળાઓમાં પાણીની સપાટી વધવાની અને સ્થાનિક સ્તરે પૂર જેવી સ્થિતિ સર્જાવાની શક્યતા પણ વ્યક્ત કરવામાં આવી છે.
આ પણ વાંચો: ગુજરાતમાં જામ્યું ચોમાસું : વલસાડમાં 5 ઈંચ વરસાદ, આગામી 5 દિવસ ભારે વરસાદ અને થંડરસ્ટોર્મની આગાહી
5 થી 7 જુલાઈ: ગુજરાતમાં વરસાદનું જોર યથાવત રહેશે
5થી 7 જુલાઈ દરમિયાન પણ ગુજરાતના અનેક જિલ્લાઓમાં ભારે વરસાદની સંભાવના છે. ખાસ કરીને દક્ષિણ ગુજરાત, સૌરાષ્ટ્રના કેટલાક વિસ્તારો અને દરિયાકાંઠાના જિલ્લાઓમાં વરસાદી પ્રવૃત્તિ વધુ સક્રિય બની શકે છે. કોસ્ટલ કર્ણાટક અને મધ્ય મહારાષ્ટ્રમાં પણ ભારે વરસાદનું એલર્ટ યથાવત રાખવામાં આવ્યું છે. હવામાન વિભાગે જણાવ્યું છે કે આગામી સપ્તાહ દરમિયાન વરસાદી માહોલમાં કોઈ ખાસ ઘટાડો થવાની શક્યતા નથી.
પૂર્વ ભારત અને ઉત્તર-પશ્ચિમ ભારતમાં પણ વરસાદની આગાહી
ગુજરાત ઉપરાંત દેશના અન્ય ભાગોમાં પણ વરસાદી પ્રવૃત્તિ તેજ બનવાની શક્યતા છે. ઓડિશા, ઝારખંડ અને પશ્ચિમ બંગાળ સહિતના પૂર્વીય રાજ્યોમાં આગામી દિવસોમાં મધ્યમથી ભારે વરસાદ વરસી શકે છે. ઉત્તરાખંડ, હિમાચલ પ્રદેશ અને ઉત્તર ભારતના કેટલાક વિસ્તારોમાં પણ વરસાદનું પ્રમાણ વધવાની શક્યતા છે. પર્વતીય વિસ્તારોમાં ભૂસ્ખલનની શક્યતા હોવાથી સાવચેતી રાખવાની સલાહ આપવામાં આવી છે.
આ પણ વાંચો: જુલાઈમાં વરસાદ આપશે દગો? : ખેતી અને પાણીની ચિંતા વચ્ચે જાણો IMDએ શું કરી આગાહી
માછીમારો માટે ખાસ ચેતવણી
અરબી સમુદ્ર અને બંગાળની ખાડીમાં પવનની ગતિ વધવાની સંભાવના હોવાથી માછીમારોને આગામી કેટલાક દિવસો સુધી દરિયામાં ન જવા સૂચના આપવામાં આવી છે. દરિયો તોફાની રહેવાની શક્યતા હોવાથી દરિયાકાંઠાના વિસ્તારોમાં પણ સાવચેતી રાખવા અનુરોધ કરવામાં આવ્યો છે.
અરબી સમુદ્રમાં ક્યાં સુધી ન જવાની સલાહ?
1થી 6 જુલાઈ દરમિયાન ગુજરાત, કોંકણ, ગોવા અને કર્ણાટકના દરિયાકાંઠા નજીકના વિસ્તારોમાં માછીમારોને દરિયો ન ખેડવાની સલાહ આપવામાં આવી છે. ઉપરાંત પૂર્વ-મધ્ય અને ઉત્તર-પૂર્વ અરબી સમુદ્ર, સોમાલિયા અને ઓમાનના કિનારા તેમજ નૈઋત્ય અને મધ્ય અરબી સમુદ્રના મોટાભાગના વિસ્તારોમાં પણ માછીમારી ટાળવા સૂચના આપવામાં આવી છે. જ્યારે 1થી 5 જુલાઈ દરમિયાન કેરળના કિનારા અને લક્ષદ્વીપ નજીકના વિસ્તારોમાં પણ દરિયો ઉગ્ર રહેવાની સંભાવના વ્યક્ત કરવામાં આવી છે. અરબી સમુદ્ર અને બંગાળની ખાડીમાં પવનની ગતિ વધવાની સંભાવના હોવાથી માછીમારોને આગામી કેટલાક દિવસો સુધી દરિયામાં ન જવા સૂચના આપવામાં આવી છે. દરિયો તોફાની રહેવાની શક્યતા હોવાથી દરિયાકાંઠાના વિસ્તારોમાં પણ સાવચેતી રાખવા અનુરોધ કરવામાં આવ્યો છે.
હવામાન વિભાગના જણાવ્યા અનુસાર, 2થી 6 જુલાઈ દરમિયાન ઓડિશા કિનારા તેમજ મધ્ય અને ઉત્તર બંગાળની ખાડીના વિસ્તારોમાં માછીમારોને ન જવાની સલાહ આપવામાં આવી છે. તે ઉપરાંત 3થી 6 જુલાઈ દરમિયાન પશ્ચિમ બંગાળ અને ઉત્તર આંધ્ર પ્રદેશના દરિયાકાંઠા નજીકના વિસ્તારોમાં પણ દરિયો તોફાની રહેવાની સંભાવના છે. આંદામાન સમુદ્રમાં પણ 6 જુલાઈ સુધી ખરાબ હવામાન રહેવાની શક્યતા વ્યક્ત કરવામાં આવી છે.
રેડ વોર્નિંગ એટલે માત્ર એલર્ટ નહીં, 'તાત્કાલિક કાર્યવાહી'નો સંકેત
ભારત હવામાન વિભાગે સ્પષ્ટતા કરી છે કે, 'રેડ કલર વોર્નિંગ'નો અર્થ માત્ર રેડ એલર્ટ નહીં પરંતુ 'Take Action' એટલે કે તાત્કાલિક પગલાં લેવા માટેની ચેતવણી છે. હવામાન વિભાગે નાગરિકોને સ્થાનિક વહીવટીતંત્રની સૂચનાઓનું પાલન કરવા, અનાવશ્યક મુસાફરી ટાળવા અને દરિયાકાંઠાના વિસ્તારોમાં ખાસ સાવચેતી રાખવા અનુરોધ કર્યો છે. આગામી દિવસોમાં ચોમાસું વધુ સક્રિય રહેવાની શક્યતા હોવાથી દેશના અનેક વિસ્તારોમાં વરસાદી માહોલ યથાવત રહેવાની સંભાવના છે.
