Ahmedabad News: સત્તાવાર રીતે ચોમાસાના આગમનને એક સપ્તાહથી વધુ સમય વીતી ગયા બાદ આખરે ગુજરાતમાં મેઘરાજાએ પૂરા જોરશોરથી બેટિંગ શરૂ કરી છે. જૂન મહિનામાં વરસાદની ભારે ઘટને કારણે ચિંતામાં મુકાયેલા ખેડૂતો અને નાગરિકો માટે જુલાઈના પહેલા જ દિવસે રાહતના સમાચાર સામે આવ્યા છે. રાજ્યના અનેક વિસ્તારોમાં વરસાદી માહોલ જામ્યો છે અને ખાસ કરીને દક્ષિણ ગુજરાતમાં મેઘરાજાએ ધમાકેદાર બેટિંગ કરી છે. રાજ્ય સરકારના સ્ટેટ ઇમરજન્સી ઓપરેશન સેન્ટર (SEOC) દ્વારા જાહેર કરાયેલા તાજા આંકડાઓ મુજબ છેલ્લા 24 કલાક દરમિયાન રાજ્યના 65 તાલુકાઓમાં નોંધપાત્ર વરસાદ નોંધાયો છે. સૌથી વધુ વરસાદ વલસાડ જિલ્લાના વાપીમાં 125 મીમી (4.92 ઇંચ) નોંધાયો છે, જ્યારે ઉમરગામમાં 86 મીમી (3.39 ઇંચ), જૂનાગઢ જિલ્લાના માળીયા હાટીનામાં 57 મીમી (2.24 ઇંચ) અને છોટાઉદેપુરના કાવંતમાં 56 મીમી (2.20 ઇંચ) વરસાદ નોંધાયો છે.
સવારે 6 વાગ્યાથી બપોરે 2 વાગ્યા સુધીના આંકડા મુજબ દક્ષિણ ગુજરાતમાં વરસાદનું જોર સૌથી વધુ રહ્યું હતું. વલસાડ જિલ્લાના પારડીમાં 44 મીમી (1.73 ઇંચ), વલસાડ શહેરમાં 37 મીમી (1.46 ઇંચ), સુરત જિલ્લાના પલસાણામાં 31 મીમી (1.22 ઇંચ), પંચમહાલના કાલોલમાં 36 મીમી (1.42 ઇંચ), અમરેલીના રાજુલામાં 38 મીમી (1.50 ઇંચ), નર્મદાના તિલકવાડામાં 27 મીમી, રાજકોટના જેટપુરમાં 26 મીમી તેમજ છોટાઉદેપુરના નસવાડીમાં 28 મીમી વરસાદ નોંધાયો હતો. આ ઉપરાંત મહુવા, નેત્રંગ, દેવગઢ બારિયા, સૂત્રાપાડા, બારડોલી, કેશોદ, હાંસોટ સહિતના અનેક તાલુકાઓમાં પણ સારો વરસાદ વરસતા વાતાવરણમાં ઠંડક પ્રસરી ગઈ હતી. વરસાદને કારણે ખેડૂતોમાં ખુશીનો માહોલ જોવા મળ્યો હતો, જ્યારે કેટલાક શહેરી વિસ્તારોમાં પાણી ભરાવાની સમસ્યાઓ પણ સર્જાઈ હતી.
આ પણ વાંચો: પાવાગઢ ડુંગર પર વરસાદી માહોલ જામ્યો : પગથિયાં પર વહેતાં ઝરણાં વચ્ચે ભક્તોએ કર્યા મહાકાળી માતાના દર્શન
6 કલાકમાં પણ વલસાડ જિલ્લામાં સૌથી વધુ વરસાદ
સ્ટેટ ઈમરજન્સી ઓપરેશન સેન્ટરના સવારે 6 વાગ્યાથી બપોરે 12 વાગ્યા સુધીના અલગ બુલેટિનમાં પણ વલસાડ જિલ્લો વરસાદમાં સૌથી આગળ રહ્યો હતો. આ સમયગાળા દરમિયાન વાપીમાં 123 મીમી (4.84 ઇંચ) વરસાદ નોંધાયો હતો. ઉમરગામમાં 75 મીમી (2.95 ઇંચ), કાવંતમાં 56 મીમી (2.20 ઇંચ), પારડીમાં 44 મીમી (1.73 ઇંચ), વલસાડ શહેરમાં 37 મીમી (1.46 ઇંચ), પંચમહાલના કાલોલમાં 36 મીમી (1.42 ઇંચ) અને સુરતના પલસાણામાં 31 મીમી (1.22 ઇંચ) વરસાદ નોંધાયો હતો.
આ ઉપરાંત નર્મદાના તિલકવાડામાં 27 મીમી, છોટાઉદેપુરના નસવાડીમાં 27 મીમી, સંખેડામાં 24 મીમી, ગરુડેશ્વરમાં 17 મીમી, ગીર સોમનાથના સૂત્રાપાડામાં 15 મીમી, સુરતના બારડોલીમાં 13 મીમી તથા ભરૂચના હાંસોટમાં 10 મીમી વરસાદ નોંધાયો હતો. આ આંકડાઓ સ્પષ્ટ દર્શાવે છે કે દક્ષિણ ગુજરાત અને પૂર્વ ગુજરાતમાં વરસાદની તીવ્રતા સૌથી વધુ રહી છે અને જુલાઈના પ્રથમ જ દિવસે ચોમાસાએ પોતાની તાકાત બતાવી દીધી છે.
જૂનની ખાધ હવે ઝડપથી ભરાશે
હવામાન વિભાગના આંકડા મુજબ ચાલુ વર્ષે જૂન મહિનો વરસાદની દૃષ્ટિએ અત્યંત નિરાશાજનક રહ્યો હતો. સામાન્ય રીતે જૂન મહિનામાં રાજ્યમાં સરેરાશ 110.8 મીમી વરસાદ નોંધાય છે, પરંતુ આ વર્ષે માત્ર 19.9 મીમી વરસાદ જ નોંધાયો હતો. એટલે કે સરેરાશ કરતાં લગભગ 82 ટકા વરસાદની ઘટ રહી હતી. જેના કારણે ડાંગર સહિતના ખરીફ પાકના વાવેતર પર સીધી અસર પડી હતી અને ખેડૂતોમાં ચિંતા વ્યાપી હતી. જોકે હવે જુલાઈની શરૂઆત સાથે વરસાદી માહોલ સક્રિય બનતાં આ ખાધ ઝડપથી ભરાઈ શકે તેવા સંકેતો મળી રહ્યા છે. કૃષિ નિષ્ણાતોનું માનવું છે કે આગામી દિવસોમાં સારો વરસાદ ચાલુ રહેશે તો વાવેતરમાં પણ ઝડપ આવશે અને જળાશયોમાં પાણીની આવક વધશે.
4 શક્તિશાળી સિસ્ટમ સક્રિય, આગામી પાંચ દિવસ ભારે વરસાદની શક્યતા
હવામાન વિભાગના જણાવ્યા મુજબ હાલ એકસાથે ચાર મહત્વપૂર્ણ હવામાન પ્રણાલીઓ સક્રિય થઈ છે. મહારાષ્ટ્રથી ઉત્તર કેરળ સુધી ઓફશોર ટ્રફ સક્રિય છે, જ્યારે મધ્યપ્રદેશથી કોંકણ-ગોવા સુધી બીજી ટ્રફ લાઇન પણ અસરકારક બની છે. આ ઉપરાંત 2 જુલાઈએ વેસ્ટર્ન ડિસ્ટર્બન્સ સક્રિય થશે અને 3 જુલાઈએ બંગાળની ખાડીમાં લો-પ્રેશર વિસ્તાર બનવાની શક્યતા છે. આ ચારેય સિસ્ટમના સંયુક્ત પ્રભાવથી પૂર્વીય અને પશ્ચિમી ભેજયુક્ત પવનો ગુજરાત તરફ આકર્ષાઈ રહ્યા છે. જેના કારણે આગામી પાંચથી સાત દિવસ દરમિયાન રાજ્યના અનેક જિલ્લાઓમાં મધ્યમથી ભારે અને કેટલાક વિસ્તારોમાં અતિભારે વરસાદ પડી શકે છે. હવામાન વિભાગે ભારે પવન, વીજળીના કડાકા-ભડાકા અને થંડરસ્ટોર્મને લઈને યલો એલર્ટ જાહેર કર્યું છે અને જિલ્લા વહીવટી તંત્રોને સતર્ક રહેવા સૂચના આપવામાં આવી છે.
આ પણ વાંચો: 'ધરમ કરતાં ધાડ પડી' : સુરતમાં ખાડી સાફ કરવા ગયેલું મશીન જ ફસાયું, તંત્રની કામગીરી પર ઉઠ્યા સવાલ
ખેડૂતો માટે રાહત, નાગરિકોને સાવચેતીની જરૂર
વરસાદના આગમનથી ખેતી માટે અનુકૂળ પરિસ્થિતિ ઊભી થઈ રહી છે. ખાસ કરીને ડાંગર, કપાસ અને અન્ય ખરીફ પાકના વાવેતરને વેગ મળશે તેવી આશા વ્યક્ત કરવામાં આવી રહી છે. બીજી તરફ, ભારે વરસાદને કારણે નીચાણવાળા વિસ્તારોમાં પાણી ભરાવા, નદી-નાળાઓમાં પાણીની આવક વધવા અને શહેરી વિસ્તારોમાં ટ્રાફિકની સમસ્યાઓ ઊભી થવાની પણ શક્યતા છે. હવામાન વિભાગે લોકોને વીજળીના કડાકા દરમિયાન ખુલ્લા મેદાનોમાં ન રહેવા, નદી-નાળાઓથી દૂર રહેવા અને જરૂરી ન હોય ત્યાં સુધી ભારે વરસાદ દરમિયાન મુસાફરી ટાળવાની સલાહ આપી છે. જો વર્તમાન વરસાદી સિસ્ટમો યથાવત્ રહેશે તો જુલાઈના પ્રથમ સપ્તાહમાં જ રાજ્યમાં ચોમાસું સંપૂર્ણ તાકાત સાથે જામે તેવી શક્યતા વ્યક્ત કરવામાં આવી રહી છે.
