વિશ્વભરની એરલાઈન્સ માટે ગઈકાલે મુશ્કેલ સમય રહ્યો હતો કારણ કે વિમાન બનાવતી દિગ્ગજ કંપની એરબસે પોતાના A320 વિમાનો માટે સોફ્ટવેર અપડેટને લઈને એક સૂચના જાહેર કરી હતી. આ અપડેટને કારણે દુનિયાભરમાં અનેક ફ્લાઈટ્સ પર અસર પડી હતી અને ભારતમાં પણ ઘરેલુ ઉડાન ભરતા વિમાનો મોડા પડ્યા હતા. જોકે હવે પરિસ્થિતિ કાબૂમાં છે અને મોટાભાગના વિમાનોમાં અપડેટનું કામ પૂર્ણ થઈ ગયું છે. મુસાફરો માટે રાહતના સમાચાર એ છે કે વિશ્વના અન્ય દેશોની જેમ ભારતમાં ફ્લાઈટ્સ રદ કરવાની નોબત આવી નથી.
ડિરેકટોરેટ જનરલ ઓફ સિવિલ એવિએશનનો રિપોર્ટ નાગરિક ઉડ્ડયન મહાનિદેશાલય એટલે કે ડીજીસીએ દ્વારા આપવામાં આવેલી તાજેતરની માહિતી મુજબ ભારતમાં આ સોફ્ટવેર અપડેટની પ્રક્રિયા ઝડપથી ચાલી રહી છે. દેશમાં કુલ 338 વિમાનો આ અપડેટથી પ્રભાવિત હતા જેમાંથી અત્યાર સુધીમાં 270 વિમાનોમાં સોફ્ટવેર અપડેટનું કામ સફળતાપૂર્વક પૂરું કરી દેવામાં આવ્યું છે. બાકી રહેલા વિમાનોમાં પણ આ કામગીરી યુદ્ધના ધોરણે ચાલી રહી છે જેથી મુસાફરોને કોઈ તકલીફ ન પડે. ડીજીસીએએ સ્પષ્ટતા કરી છે કે આ પ્રક્રિયાને કારણે ભારતમાં કોઈ મોટી અસર જોવા મળી નથી અને એર ઈન્ડિયા કે ઈન્ડિગો જેવી કંપનીઓએ પોતાની ફ્લાઈટ રદ કરી નથી.
ઈન્ડિગોના તમામ વિમાનો અપડેટ થઈ ગયા દેશની અગ્રણી એરલાઈન ઈન્ડિગોએ સત્તાવાર નિવેદન આપીને જણાવ્યું છે કે તેમના કાફલામાં રહેલા તમામ A320 વિમાનોમાં સોફ્ટવેર અપડેટ કરવાની કામગીરી પૂર્ણ થઈ ગઈ છે. હવે તમામ વિમાનો તેમના નિયત સમયપત્રક મુજબ ઉડાન ભરી રહ્યા છે. અપડેટને કારણે જે થોડી ઘણી સેવાઓ ખોરવાઈ હતી તે હવે ફરીથી રાબેતા મુજબ શરૂ કરી દેવામાં આવી છે.
એર ઈન્ડિયાની કામગીરી પણ પૂર્ણતાના આરે બીજી તરફ એર ઈન્ડિયાએ પણ લગભગ 90 ટકા કામગીરી પૂરી કરી લીધી છે. શનિવારે રાત્રે કંપનીએ માહિતી આપી હતી કે તેમના પ્રભાવિત થયેલા 25 વિમાનોમાંથી 22 વિમાનોમાં નવું સોફ્ટવેર ઈન્સ્ટોલ થઈ ગયું છે. બાકી રહેલા માત્ર 3 વિમાનોમાં પણ રવિવારે વહેલી સવાર સુધીમાં કામ પૂરું થઈ જવાનો અંદાજ હતો. આમ ભારતીય એરલાઈન્સ કંપનીઓએ આ ટેકનિકલ પડકારનો ખૂબ સારી રીતે સામનો કર્યો છે.
વિશ્વભરમાં 6000 ફ્લાઈટ્સ પર થઈ હતી અસર નોંધનીય છે કે એરબસ A320 વિમાનોમાં આવેલા આ સોફ્ટવેર ઈશ્યુને કારણે સમગ્ર દુનિયામાં આશરે 6000 જેટલી ફ્લાઈટ્સ પર તેની અસર જોવા મળી હતી. આ સમસ્યાને કારણે ખાસ કરીને યુરોપમાં 35 અને જાપાનમાં 65થી વધારે ફ્લાઈટ્સ રદ કરવી પડી હતી. જ્યારે ભારતમાં માત્ર કેટલીક ફ્લાઈટ્સ મોડી પડી હતી પરંતુ એક પણ ફ્લાઈટ કેન્સલ ન થતા મુસાફરોએ રાહતનો શ્વાસ લીધો હતો.
